فوتو: ۆيدەودان سكرينشوت
قۇزىرلى ورگان ىزدەۋدە جۇرگەن 300 قىلمىسكەرمەن قاتار, حابار-وشارسىز كەتكەن 200 ادامدى تاپتى.
«ماسەلەن, پاۆلودار وبلىسىنىڭ كەنتتەرىنىڭ بىرىندە جەدەل-ىزدەستىرۋ ءىس-شارالارىن جۇرگىزۋ كەزىندە پاۆلودارلىق تۇرعىندى اتىس قارۋىمەن اتىپ ولتىرگەنى ءۇشىن 2011 جىلدان بەرى حالىقارالىق ىزدەۋدە جۇرگەن دانات باكيباەۆ ۇستالدى.
الماتى وبلىسىندا سابىرجان ماساحباەۆ قولعا ءتۇستى. ول 2023 جىلدىڭ اياعىندا الماتىدا توپ قۇرامىندا بولا وتىرىپ, الدىن الا ءسوز بايلاسۋ ارقىلى سينگاپۋر ازاماتىنا شابۋىل جاساپ, 3 ملن تەڭگە مەن 13 مىڭ اقش دوللارىنان استام سومادا اقشانى تارتىپ العان. ۇستالعان ادامنىڭ سىبايلاستارى بۇرىن ۇستالعان.
تۇركىستان وبلىسىندا پوليتسيا 10 جىل بويى حالىقارالىق ىزدەۋدە جۇرگەن وزبەكستان ازاماتى جامشيد احمەدوۆتى ۇستادى. شەتەلدىك سارىاعاش اۋدانىنداعى «جىبەك جولى» شەكارا بەكەتىندە شەكارادان ءوتۋ كەزىندە قاماۋعا الىندى. ەر ادام 2014 جىلدان باستاپ رەسەي فەدەراتسياسىنىڭ يركۋتسك قالاسىندا كىسى ولتىرگەنى ءۇشىن ىزدەۋدە بولدى.
ءىىم جەدەل بولىنىستەرىنىڭ قىزمەتكەرلەرى شىمكەنتتە كورشى مەملەكەتتىڭ قۇقىق قورعاۋشىلارىمەن الاياقتىق جاساعانى ءۇشىن ىزدەۋدە جۇرگەن تاعى ءبىر وزبەكستاندىق مارۋفجون جۋراەۆتى ۇستادى», دەدى قر ءىىم كريمينالدىق پوليتسيا دەپارتامەنتى باسقارما باستىعىنىڭ ورىنباسارى جانگەلدى تابيلوۆ.
