– مارتەبەلى ءالي اكبار مىرزا, 11 اقپان – يراننىڭ ۇلتتىق كۇنى, ياعني بيىل يران يسلام رەۆوليۋتسياسىنىڭ جەڭىسىنە 45 جىل تولادى. ءسىزدى وسى ايتۋلى مەرەكەمەن قۇتتىقتايمىز. بىزگە پارسى حالقى ءۇشىن بۇل كۇننىڭ ءمانى مەن ماڭىزى جايىندا ايتىپ بەرسەڭىز؟
– ەڭ بىرىنشىدەن, «Egemen Qazaqstan» – قازاقستانداعى تاريحى تەرەڭ باسىلىمنىڭ ءبىرى ەكەنىن جانە ءوز باسىم بۇل گازەتكە اسا قۇرمەتپەن قارايتىنىمدى ايتقىم كەلەدى. وسىدان بىرنەشە اي بۇرىن سىزدەردىڭ رەداكتسيالارىڭىزدا بولۋ باقىتى بۇيىردى. باسشىلىقپەن كەزدەسىپ, پىكىر الماسىپ, ىنتىماقتاستىق جايىن تالقىلادىق. گازەتكە جازىلىپ, ءار ءنومىرىن الىپ تۇرامىز. وزدەرىڭىز سەكىلدى اقپارات قۇرالدارىنىڭ مەملەكەتتەر اراسىنداعى بايلانىستى نىعايتۋعا ىقپالى زور ەكەنىنە ۇلكەن سەنىممەن قارايمىن. «Egemen Qazaqstan» گازەتىنىڭ دە ۇنەمى ەلدىك ماسەلەلەردى كوتەرەتىنىن جاقسى بىلەمىن, سوندىقتان ءبىز ەلشىلىك تاراپىنان سىزدەرمەن جاقىن بايلانىس ورناتىپ, يران مەن قازاقستان اراسىنداعى قارىم-قاتىناستى نىعايتۋعا سەپتىگىمىزدى تيگىزەمىز دەپ ويلايمىن.
يسلام رەۆوليۋتسياسىنا كەلسەك, ءبىزدىڭ حالقىمىز ءۇشىن ونىڭ ماڭىزى اسا زور. بۇل وقيعاعا دەيىن يراندا شاحتىق جۇيە سالتانات قۇرعانىن بىلەسىزدەر. ياعني ەلدى پاتشالار باسقاردى. ال رەۆوليۋتسيادان كەيىن ەل تىزگىنى حالىقتىڭ قولىنا ءوتتى. بۇرىنعى رەجىم سىرتقى دەرجاۆالارعا تاۋەلدى بولعان ەدى. اتاپ ايتقاندا, باتىس ەلدەرىنىڭ قاس-قاباعىنا قاراپ كۇن كەشەتىن. بۇعان قوسا, ىشكى ديكتاتۋرا دا اسقىنىپ كەتكەن-ءتىن. ول ۋاقىتتا ەلدە پارلامەنت جۇمىس ىستەگەنىمەن, حالىقتىڭ مۇڭى مەن ۇنىنە قۇلاق اسا بەرمەيتىن. يسلام رەۆوليۋتسياسى ورناعاننان كەيىن بيلىك حالىقتىڭ قولىنا ءوتىپ, عاسىرلار بويى ارمانداعان ماقسات-مۇراتىنا جەتتى.
جاڭا رەسپۋبليكا ورناعاننان كەيىن ەلدىڭ ساياسي جۇيەسىن ۇلتتىق مۇددە تۇرعىسىنان قالىپتاستىرۋعا كۇش سالىندى. ول كەزدە كوپتەگەن مەملەكەت كاپيتاليستىك باتىستىڭ نەمەسە سوتسياليستىك شىعىستىڭ ىقپالىندا بولاتىن. ال ءبىز ەكى بلوكقا دا قوسىلماي, ءوز ساياساتىمىزدى دەربەس جۇرگىزەمىز دەپ شەشتىك. سوندىقتان يسلام رەۆوليۋتسياسى ەل ومىرىندە بۇرىن-سوڭعى بولماعان ساياسي ەرەكشەلىككە يە بولدى.
نەگىزىنەن پارسى حالقىنىڭ بوستاندىققا جەتۋگە تالپىنعان كۇرەسى رەۆوليۋتسيادان كوپ ۋاقىت بۇرىن باستالعان ەدى. ءبىز تاياۋ شىعىس ايماعىندا ءبىرىنشى بولىپ پارلامەنتىمىزدى جاساقتادىق. وسى تۇرعىدان العاندا يران – دەموكراتيا قۇندىلىقتارىن ورناتۋدا ايماقتاعى كوشباسى ەلدەردىڭ ءبىرى. پارسى حالقى ەركىندىككە جەتۋ ءۇشىن قانشاما بوزداعىنان ايىرىلدى, كوپ زيان شەكتى, الايدا ارمانى ورىندالدى.
– بۇگىندە قازاقستان مەن يران اراسىنداعى بايلانىستار نەگىزىنەن قانداي باعىتتاردا ءجۇرىپ جاتىر؟
– ەكى ەل اراسىنداعى بايلانىستار قازىرگى كۇنى بارلىق سالانى قامتيدى. ءبىز ىنتىماقتاستىقتىڭ جان-جاقتى جولدارىن دامىتىپ كەلەمىز. بىراق مەن ءبىزدىڭ ءوز مۇمكىندىكتەرىمىزدى تولىققاندى پايدالانا الماي كەلە جاتقانىمىزدى ايتقىم كەلەدى. ساياسي تۇرعىدان الساق, بايلانىستارىمىز وتە جوعارى دەڭگەيدە. ەكى ەلدىڭ باسشىلارى مەن ساياساتكەرلەرى ۇنەمى ءبىر-بىرىنە ساپارلاپ, كەزدەسىپ, پىكىر الماسىپ تۇرادى. ەكونوميكالىق ىنتىماقتاستىق ۇيىمى, ەۋرازيالىق ەكونوميكالىق وداق, شانحاي ىنتىماقتاستىعى ۇيىمى, يسلام ىنتىماقتاستىعى ۇيىمى سەكىلدى ايماقتىق قۇرىلىمدار شەڭبەرىندە دە قارىم-قاتىناسىمىز نىعايىپ كەلەدى. ال ءدال قازىرگى تاڭدا يران مەن قازاقستان اراسىنداعى بايلانىستاردىڭ نىعايۋىنا قازاقستان پرەزيدەنتى قاسىم-جومارت توقاەۆ ۇلكەن دەن قويىپ وتىر. ونىڭ 2022 جىلعى يرانعا ساپارى ءوزارا ىنتىماقتاستىقتىڭ جاڭا كەزەڭىنە جول اشتى.
مادەني بايلانىستارعا كەلسەك, بۇل سالادا ەكى حالىقتىڭ كوزقاراستارى مەن باعىتتارى وتە ۇقساس جانە ءبىزدىڭ مادەنيەتىمىز, سەنىمىمىز, تاريحىمىز ءبىر-بىرىمەن ساباقتاسىپ جاتىر. سوندىقتان ءاربىر ءىس-ارەكەتىمىز بەن تالپىنىسىمىز ءبىزدىڭ مادەني, ءدىني, باسقا دا بايلانىستارىن تەرەڭدەتۋگە باعىتتالعان. دەگەنمەن بۇل سالادا دا ءوز الەۋەتتەرىمىزدى ءالى تولىق كولەمدە پايدالانىپ جاتقان جوقپىز. وسى ولقىلىقتىڭ ورنىن تولتىرۋىمىز كەرەك دەپ ويلايمىن.
– مىسالى, قانداي ماسەلەگە كوڭىل بولگەن ءجون؟
– ماسەلەن, جوعارى وقۋ ورىندارىمىزدا, عىلىمي-زەرتتەۋ ورتالىقتارىندا ەكى ەل تۋرالى قانداي زەرتتەۋلەر جۇرگىزىلىپ جاتىر؟ كينو سالاسىن الايىق, يراندا قازاقستان فيلمدەرىنىڭ قانشاسى كورسەتىلەدى نەمەسە قازاق رەجيسسەرلەرى يران تۋرالى قانشا فيلم ءتۇسىردى؟ ەكى ەلدىڭ كورنەكتى تۇلعالارىن حالىقتارىمىزعا تانىستىراتىن قانشا كىتاپ شىقتى؟ بۇقارالىق اقپارات قۇرالدارىمىز ءبىزدىڭ مەملەكەتتەرىمىز جايىندا ءجيى جازا ما؟ وسىنداي مىسالداردى جالعاستىرا بەرۋگە بولادى. مىسالى, يراندا وتەتىن ونەر, مادەنيەت, كينوفەستيۆالدەرىنە, ءتىپتى كىتاپ كورمەلەرىنە قازاقستاننان گورى ەۋروپادان قاتىساتىن ادامداردىڭ سانى كوپ. سونداي-اق يراندىقتار دا قازاق ەلى تۋرالى كوپ بىلە بەرمەيدى.
ال ەكونوميكالىق سالادا قازىر ەكى ەلدىڭ تاۋار اينالىمى ءتۇرلى سەبەپتەرگە بايلانىستى تومەن دەڭگەيدە قالىپ وتىر. ءبىز كاسپي تەڭىزى ارقىلى كورشىمىز. ءبىر گەوگرافيالىق جانە گەوساياسي ايماقتا ورنالاسقانبىز. ەكى مەملەكەتتە دە ۇلكەن ادامي جانە تابيعي رەسۋرستار بار. بىراق سوعان قاراماستان, وكىنىشكە قاراي, ەكونوميكالىق بايلانىستار ءالى دە تومەن. بۇعان وتكەن جىلى ەكى ەلدىڭ تاۋار اينالىمى 302 ملن دوللاردى عانا قۇراعانىن ايتسام جەتكىلىكتى.
بۇنىڭ سەبەپتەرىنىڭ ءبىرى – يرانعا سالىنىپ وتىرعان بىرجاقتى جانە زاڭسىز سانكتسيالار. سوندىقتان ءبىز قازىر ءوز الەۋەتتەرىمىزدى تولىق ىسكە اسىرا الماي جاتىرمىز. دەگەنمەن ەل باسشىلارى ءوزارا الىس-بەرىستى ارتتىرۋعا جىگەر تانىتىپ وتىر. اسىرەسە, پرەزيدەنت قاسىم-جومارت توقاەۆتىڭ بۇل باعىتتاعى ىنتاسى وتە جوعارى. كەدەرگىلەر مەن قيىندىقتارعا قاراماستان, جۇيەلى تۇردە جۇمىس جۇرگىزە بەرەمىز. الداعى ۋاقىتتا ەكىجاقتى بىرلەسكەن شارالاردىڭ ارقاسىندا ەكونوميكالىق بايلانىستارىمىز جاڭا دەڭگەيگە كوتەرىلەدى دەپ ۇمىتتەنەمىن.
– يران تاراپىنان ءبىزدىڭ ەلىمىزگە ناقتى قانداي تاۋارلار جەتكىزىلەدى جانە ءبىز سىزدەرگە نەنى ەكسپورتتايمىز؟
– يران دا, قازاقستان دا مۇناي ءوندىرۋشى ەلدەر بولعاندىقتان, ەكى ارادا مۇناي ساۋداسى جۇرمەيدى. قازاقستاننان يرانعا ەكسپورتتالاتىن تاۋارلاردىڭ كوپشىلىگى – اۋىل شارۋاشىلىعى داقىلدارى, اتاپ ايتقاندا بيداي, ارپا, جۇگەرى, ەت ونىمدەرى. ال يراننان قازاقستانعا نەگىزىنەن وڭدەلگەن ازىق-ت ۇلىك, جەمىس-جيدەكتەر, كوكونىستەر, جۋعىش زاتتار, پوليمەرلەر جانە قۇرىلىس ماتەريالدارى ەكسپورتتالادى. سانكتسيالار جاعدايىندا بولعاندىقتان, ءبىز كوپ تاۋاردى ءوز ەلىمىزدە شىعارامىز. مىسالى, تۇرمىستىق زاتتار, ءۇي جيھازىن, ت.ب. ءوندىرۋ بويىنشا تاماشا جەتىستىكتەرگە جەتىپ وتىرمىز.
– يراننىڭ عىلىم جانە قورعانىس سالاسىنداعى جەتىستىكتەرىن دە ەستىپ جاتىرمىز. ءبىر-ەكى مىسال كەلتىرە الاسىز با؟
– ءيا, ءبىزدىڭ ەلىمىز كوپجىلعى سانكتسيالار مەن شەكتەۋلەرگە قاراماستان, عىلىم-ءبىلىم سالاسىندا زور تابىسقا جەتتى. ءوزىڭىز ايتقانداي, اسكەري-قورعانىس سالاسىندا اۋىز تولتىرىپ ايتارلىق جەتىستىكتەر بار. يادرولىق سالادا ماگاتە-ءنىڭ تولىق قاداعالاۋىمەن عىلىمي-زەرتتەۋ جۇمىستارىمىز ناتيجەسىن بەرىپ كەلەدى. مۇنىڭ ءبارى تەك بەيبىت ماقساتتا جۇرگىزىلەدى, مىسالى, اتوم ەلەكتر ستانساسىن سالۋ, مەديتسينالىق ماقساتتا جانە اۋىل شارۋاشىلىعى سالاسىنداعى زەرتتەۋلەر ءۇشىن پايدالانامىز.
قۋانىشتى حاباردىڭ تاعى ءبىرى – جۋىردا يران عارىشقا ەكى زىمىران تاسىعىش ۇشىرىپ, وربيتاعا 4 جاساندى جەرسەرىگىن شىعاردى. سونداي-اق ءبىز كەيىنگى جىلدارى وزىق مەديتسيناعا, نانو-تەحنولوگيالىق ونىمدەرگە قول جەتكىزدىك, ستارتاپتارىمىز وتە قارقىندى دامۋ ۇستىندە جانە يننوۆاتسيالىق ەكونوميكا سالاسىندا ۇزدىك ناتيجەلەرىمىز بار. باتىس ەلدەرىمەن سالىستىرعاندا ءبىز عىلىمي جاڭالىقتارىمىزدى وزگە مەملەكەتتەرمەن بولىسۋگە دايىنبىز.
– جوعارىدا ەكى ەلدىڭ مادەني بايلانىستارىن ءسوز ەتتىڭىز. بيىل ءبىزدىڭ گازەتىمىزگە بەرگەن سۇحباتىندا قاسىم-جومارت توقاەۆ ناۋرىز مەرەكەسىنىڭ مازمۇنىن بايىتىپ, جاڭاشا اتاپ ءوتۋ كەرەك ەكەنىن ايتتى. بىلۋىمىزشە, يران ەلىندە دە بۇل مەرەكە ايرىقشا تويلانادى. وسى تۇرعىدا ەكى ەلدىڭ ءبىر-بىرىنەن ۇيرەنەرى كوپ سەكىلدى...
– ءوز باسىم قاسىم-جومارت كەمەل ۇلىن وتە قاتتى قۇرمەتتەيمىن. ول كىسى – وزىق ويلى ءارى تەرەڭ ءبىلىمدى, حالقىنىڭ مۇددەسى جولىندا ەڭبەك ەتىپ جۇرگەن ادام. گازەتتەرىڭىزگە بەرگەن سۇحباتىندا ناۋرىز مەرەكەسىنىڭ مارتەبەسىن ارتتىرۋ تۋرالى ويىن دا حالىقتىڭ ۇلتتىق قۇندىلىقتارىنا دەگەن جاناشىرلىعى دەپ بىلەمىن.
ورتالىق ازيا مەن يراندا مىڭداعان جىلدان بەرى جاڭا جىل ناۋرىزدان باستالعان. سوندىقتان بۇل مەرەكە ايماق جۇرتشىلىعى ءۇشىن ۇلتتىق قۇندىلىق سانالادى. مەنىڭ ويىمشا, قاسىم-جومارت توقاەۆتىڭ ناۋرىزعا قاتىستى باستاماسى – ءوڭىر ەلدەرىنىڭ بايلانىستارىن بۇرىنعىدان دا نىعايتۋ جولىنداعى ماڭىزدى قادام.
يرانعا كەلەر بولساق, ناۋرىز – ءبىزدىڭ باستى مەرەكەلەرىمىزدىڭ ءبىرى, ءشامسي جىل ساناۋى بويىنشا جاڭا جىلدىڭ باستاۋى. پارسى حالقى ناۋرىزدى تابيعاتتىڭ جاندانۋىمەن بايلانىستىرىپ, تىرشىلىكتىڭ جاڭارۋىنىڭ سيمۆولى سانايدى. يراندا سىزدەردىڭ كۇنتىزبەلەرىڭىز بويىنشا اقپاننىڭ سوڭىندا ەسفاند ايى باستالادى. بۇل – ءبىزدىڭ كۇنتىزبەمىزدەگى سوڭعى 12-اي. وسى كەزدە حالقىمىز جاپپاي ناۋرىزعا دايىندالادى. باتىس ەلدەرىندە جاڭا جىل قارساڭىندا, ياعني جەلتوقسان ايىندا ساۋدا-ساتتىق قىزاتىن بولسا, بىزدە ەسفاند ايىندا ادامدار ۇيلەرىنە زات ساتىپ الىپ, ءبىر-بىرىنە سىيلىق دايىنداپ, مارە-سارە كۇيگە ەنەدى. ناۋرىز قارساڭىندا ورىندالاتىن يگى داستۇرلەردىڭ ءبىرى – جۇرتشىلىق ۇيلەرىن تولىق تازالايدى جانە رۋحاني تۇرعىدا دا تازارۋعا قادام جاسايدى. مىسالى, رەنجىسكەن ادامدار بولسا, ءبىر-ءبىرىن كەشىرەدى. ءتىپتى ارالاسپاي كەتكەن ادامدار ءبىر-ءبىرىنىڭ ۇيىنە ارنايى بارىپ, تاتۋلاسىپ, ۇزىلگەن قاتىناستى جالعاپ جاتادى. نەگىزى بۇل مەيرام جايىندا وتە كوپ نارسە ايتۋعا بولادى. بالكىم مەرەكە قارساڭىندا وعان ارنايى سۇحبات ۇيىمداستىرعانىمىز دۇرىس شىعار. ويتكەنى مۇنىڭ ءوزى – ءبىر سۇحباتقا جۇك بولارداي ۇلكەن تاقىرىپ.
– ەلدەرىمىزدىڭ تەڭىز ارقىلى ءتۇيىسىپ جاتقان قوڭسى مەملەكەتتەر ەكەنىن ايتتىڭىز. تۋريستىك قاتىناستارىمىز قانداي دەڭگەيدە دەپ ويلايسىز؟ قازاقستان تۋريستەرىن يران نەسىمەن قىزىقتىرا الادى؟
– وتە ماڭىزدى سۇراق. وكىنىشكە قاراي, يران مەن قازاقستاننىڭ تۋريزم سالاسىنداعى قارىم-قاتىناسى تىم تومەن دەڭگەيدە قالىپ وتىر. مۇلدەم دامىماعان دەسەم دە بولادى. ستاتيستيكاعا نازار سالساق, بىلتىر ەكى ەلدى قوسقاندا 3 مىڭداي عانا تۋريست ءبىر-بىرىنە ساپار شەككەن. ولاردىڭ كوپ بولىگى كاسىپكەرلەر, ءىس-شارالارعا قاتىسۋ ءۇشىن كەلگەن قوناق بولۋى مۇمكىن. ءبىز دوس ەلدەرمىز, تاريحي تامىرىمىز, مادەنيەتىمىز ورتاق, الايدا ءبىر-ءبىرىمىزدىڭ تاماشالاۋعا تۇراتىن تارتىمدى جەرلەرىمىزدى كورۋگە بارا بەرمەيمىز. جىل سايىن يراننىڭ ميلليونداعان ازاماتى تۇركيا, كاۆكاز, پارسى شىعاناعى, ەۋروپا ەلدەرىنە ساياحاتتايدى. ال قازاقستان تاراپى ازىرگە كوزدەن تاسا قالىپ تۇر.
يران وسى كەمشىلىكتىڭ ورنىن تولتىرۋ ماقساتىندا تۋريزم سالاسىن دامىتۋعا كۇش سالىپ وتىر. جىل سايىن ناۋرىز ايىنان قىركۇيەككە دەيىن الماتىدان جانە اقتاۋدان يرانعا قاتىنايتىن ارنايى چارتەرلىك رەيستەر اشىلادى. مەنىڭ ويىمشا, قازاقستان تۋريستەرىنە يران ەلى وتە قىزىقتى بولۋعا ءتيىس. ەلىمىزدىڭ سولتۇستىگىندە, كاسپي تەڭىزى جاعالاۋىنداعى گۇلستان پروۆينتسياسىندا قازاقتار كوپ تۇرادى. الەمدىك تۋريزمدە وزىندىك ورنى بار تاريحي مەكەندەرىمىز جەتەرلىك. شيراز, يسفاحان, يەزد, تابريز, شۋشتار سەكىلدى كونە قالالارىمىزدىڭ كونە ساۋلەتتىك ەسكەرتكىشتەرىمەن كوز تارتادى.
جالپى, گەوگرافياسى, الەمدىك وركەنيەتتەگى ورنى, تاريحي-مادەني جەرلەرى جاعىنان يران دۇنيەجۇزىلىك تۋريزم وشاقتارىنىڭ ءبىرى سانالادى. قازاقستان حالقى بىلمەيتىن شىعار, الەمدەگى ەڭ ءىرى سۋلى ۇڭگىر ءبىزدىڭ ەلىمىزدە ورنالاسقان. ءالي-سادر دەپ اتالاتىن بۇل ۇڭگىردىڭ ىشىندە قايىقپەن سەرۋەندەۋگە بولادى. قازاقستاندا قاقاعان قىس كەزىندە يرانعا كەلىپ دەمالۋعا تاماشا مۇمكىندىكتەر بار. مىسالى, ەلدىڭ وڭتۇستىگىندەگى پارسى شىعاناعىندا كيش, كەشم, حەنگام اتتى تۋريستىك ارالدارىمىز كوپكە تانىمال. ول جاقتىڭ اۋا رايى دا جايلى, تابيعاتى دا كەرەمەت. سونداي-اق يران ۇلتتىق تاعامدارىنىڭ الۋاندىعى, قولونەر بۇيىمدارىنىڭ ەرەكشەلىگى بويىنشا دا الەم تۋريستەرىنىڭ نازارىندا. مۇنى دا سىزدەر كوپ بىلە قويمايتىن شىعارسىزدار. سوندىقتان بۇل باعىتتا قولعا الاتىن جۇمىس كوپ. ونى وزدەرىڭىز سەكىلدى باق وكىلدەرى ناسيحاتتاپ جاتسا قۇبا-قۇپ.
قازىرگى كۇنى قازاقستاندا پارسى ءتىلى مەن ادەبيەتى فاكۋلتەتىندە وقىپ جاتقان ستۋدەنتتەردىڭ سانى ەۋروپانىڭ كىشكەنتاي مەملەكەتتەرىندەگى ستۋدەنتتەردەن دە از. ال قازاق ءتىلى مەن ادەبيەتى يراندا ءتىپتى وقىتىلمايدى دەسە دە بولادى. وسى ماسەلەگە ەكى جاق تا كوڭىل اۋدارۋى كەرەك. ويتكەنى ءبىز نە بولسا دا, ءبىر ايماقتا ءومىر ءسۇرىپ جاتقان حالىقتارمىز جانە ماڭگى كورشى بولىپ قالامىز. ەكى ەل جۇرتى ءبىر-ءبىرىن جاقسىراق تانيتىن بولسا, باسقا دا سالاداعى بايلانىستارىمىز بەكي تۇسەدى. سوندىقتان بۇقارالىق اقپارات قۇرالدارى ەكى ەلدىڭ ۇلى تۇلعالارىن, تاريحي جەرلەرىن, ۇلتتىق قۇندىلىقتارىن ناسيحاتتاۋدا بەلسەندى ءرول اتقارسا دەيمىن. ءبىزدىڭ ەلشىلىگىمىز دە, كونسۋلدىقتارىمىز دا وسى ماقساتتا جۇمىس جۇرگىزىپ جاتىر.
– سوڭعى سۇراعىم, قازاقستان – الەمدىك مۇحيتتارعا شىعا المايتىن ەڭ ۇلكەن ەل. ءبىزدىڭ بىلۋىمىزشە, كەزىندە يران اۋماعى ارقىلى كاسپيدەن پارسى شىعاناعىنا سۋ ارناسىن قازىپ, كەمە ءجۇزدىرۋ تۋرالى جوسپارلار بولعان ەكەن. بۇدان حابارىڭىز بار ما؟
– ول جايىندا ەستىگەنىم بار. الايدا بۇل – وتە كۇردەلى ءارى قىمبات جوبا. ونىڭ ءوزى تولىق زەرتتەلدى دەپ ايتا المايمىن.
– ۋاقىت تاۋىپ, سۇحبات بەرگەنىڭىزگە راحمەت!
اڭگىمەلەسكەن –
ەسكەندىر زۇلقارناي,
«Egemen Qazaqstan»
