فوتو: 24.kz
24.kz-ءتىڭ مالىمەتىنشە, شىمكەنت قالاسىندا اشىلعان مەكتەپ ءداستۇرلى وقىتۋ جۇيەسىنەن وزگەشە فورماتتا جۇمىس ىستەيدى. مۇندا ءدارىس پەن كونسپەكتىنىڭ ورنىنا كوماندالىق جۇمىس پەن ناقتى جوبالارعا باسىمدىق بەرىلەدى. وقۋشىلار تەوريانى جاتتاپ قانا قويماي, بىردەن تسيفرلىق ءونىم ازىرلەۋگە ماشىقتانادى.
مەكتەپتىڭ وڭىرلىك ديرەكتورى ءۋاليحان سلامبەكوۆ بۇل جۇيەنىڭ حالىقارالىق دەڭگەيدە تيىمدىلىگىن دالەلدەگەنىن ايتتى.
«01EDU جۇيەسى ءوزىن الەمدە دالەلدەدى. ول قازاقستاندا عانا ەمەس, فرانتسيا, كەنيا سەكىلدى ەلدەردە دە قولدانىلادى. بۇل – ءداستۇرلى فورمات ەمەس. مۇندا مۇعالىم, لەكتسيا, كونسپەكت بولمايدى. وقۋ تولىقتاي تەگىن», دەدى ول.
مەكتەپكە قابىلدانۋ ءۇشىن ۇمىتكەرلەر ارنايى كومپيۋتەرلىك ويىننان وتەدى. وسى ارقىلى ولاردىڭ ەستە ساقتاۋ قابىلەتى, لوگيكاسى جانە سىني ويلاۋ دەڭگەيى تەكسەرىلەدى. ىرىكتەۋدەن وتكەندەر كاسىبي ازىرلەۋشىلەرمەن بىرگە جوبالار جاساپ, ەكى جىل ىشىندە كەمىندە 50 جوبا ازىرلەۋى ءتيىس.
سونىمەن قاتار قالادا جاساندى ينتەللەكت زەرتحانالارى, روبوتوتەحنيكا باعىتتارى مەن IT-ستارتاپتار دا قارقىندى دامىپ كەلەدى.
Tashenev University پرورەكتورى جانار رىسبەكوۆا جاساندى ينتەللەكتىنى زامان تالابى دەپ باعالادى.
«بۇل – بۇگىنگى كۇننىڭ شىندىعى. قازىردىڭ وزىندە جاستار جاڭا جۇيەلەر مەن باعدارلامالار ويلاپ تاۋىپ جاتىر. ءبىز بۇدان قاشىپ قۇتىلا المايمىز. كەرىسىنشە, جاساندى ينتەللەكتىنى كومەكشى قۇرال رەتىندە قابىلداۋىمىز كەرەك», دەدى ول.
وقۋشىلار درون قۇراستىرىپ, ولاردى باسقارۋدى جانە روبوتتاردى باعدارلامالاۋدى ۇيرەنەدى. ءتىپتى كەي زەرتحانالاردا ۇشقىشسىز اپپاراتتار ميني-فۋتبول وينايدى.
Shymkent Hub الاڭىندا دا جاساندى ينتەللەكت نەگىزىندەگى جوبالار جۇزەگە اسىرىلىپ جاتىر. قازىر وندا ونداعان IT-ستارتاپ جۇمىس ىستەيدى. ولاردىڭ كەيبىرى قالاداعى ينفراقۇرىلىم ماسەلەلەرىن شەشۋگە باعىتتالعان.
Shymkent Hub وڭىرلىك مەنەدجەرى قۇرمانعازى مۇراتوۆ ايتۋىنشا, قازىر قۇبىرلاردى سكانەرلەيتىن جوبا بار. ول قۇبىردىڭ قاي بولىگى ەسكىرگەنىن انىقتاپ, قاي جەرىن اۋىستىرۋ قاجەت ەكەنىن كورسەتەدى. بۇعان دەيىن قۇبىر تولىق كەسىلىپ, تۇگەل جاڭارتىلاتىن.
قازاقستاندا بيىل اشىلاتىن جي ۋنيۆەرسيتەتىنە كىمدەر تۇسە الادى؟
ال حيميا-تەحنولوگيالىق عىلىمدار عىلىمي-زەرتتەۋ ينستيتۋتى ديرەكتورى جامبىل ايمەنوۆ شىمكەنتتە ءىرى جاساندى ينتەللەكت جانە روبوتوتەحنيكا ورتالىعى اشىلاتىنىن مالىمدەدى.
«تەحنوگەندىك قالدىقتار نەگىزىندە قۇرىلىس ماتەريالدارىن ءوندىرۋدىڭ بارلىق تەحنولوگيالىق پروتسەسى روبوتتار مەن روبوتوتەحنيكا كومەگىمەن, ادام قاتىسۋىن بارىنشا ازايتا وتىرىپ جۇزەگە اسىرىلادى. بۇل باعىتتا ءبىز قالامىزداعى بىرقاتار وزىق كاسىپورىندارمەن جۇمىس ىستەپ جاتىرمىز. جوباعا قىتاي, ۆەنگريا جانە بىرنەشە ەۋروپا ەلدەرىنىڭ كاسىپورىندارى قاتىسادى», دەدى جامبىل ايمەنوۆ.
بۇگىندە جاساندى ينتەللەكت ءبىلىم بەرۋ, قالا قىزمەتتەرى مەن ءوندىرىس سالاسىنا بەلسەندى ەنگىزىلىپ جاتىر. شىمكەنتتە بۇل باعىتتاعى مەكتەپتەر مەن زەرتحانالار كوبەيىپ, جاڭا تەحنولوگيالىق ستارتاپتار ىسكە قوسىلىپ وتىر.
وسىدان بىرەر جىل بۇرىن قازاقستاندا العاشقى جاساندى ينتەللەكت مەكتەبى اشىلاتىنى تۋرالى حابارلاعانبىز.
