سۋرەت جي كومەگىمەن جاسالعان
ءمينيستردىڭ سوزىنشە, ەلىمىزدە جاڭا اەروتاكسي سەگمەنتىن دامىتۋ شەڭبەرىندە وتاندىق كومپانيالار پيلوتسىز سىناق ۇشاقتارىن ساتىپ الىپ جاتىر. سونداي-اق قونۋ الاڭدارى مەن وپەراتسيالىق ورتالىقتىڭ قۇرىلىسى باستالعان.
«تسيفرلىق تەحنولوگيالار جۇك سەگمەنتىندە دە قارقىندى ەنگىزىلىپ جاتىر. E-Freight اقپاراتتىق جۇيەسىن ىسكە قوسۋ پروتسەستەردى ەلەكتروندى فورماتقا تولىعىمەن اۋىستىرۋعا جانە اۆياجۇكتەردى وڭدەۋ ۋاقىتىن ءبىر كۇننەن ءبىر ساعاتقا دەيىن قىسقارتۋعا مۇمكىندىك بەرەدى», دەدى نۇرلان ساۋرانباەۆ.
بۇدان بولەك ول اۋەجايلاردا Q-Gate تسيفرلىق جۇيەسى ەنگىزىلىپ جاتقاندىعىن ايتتى. جۇيە ارقىلى ەندى باقىلاۋ ۋاقىتى 3 مينۋتتان 50 سەكۋندقا دەيىن قىسقارادى.
بيىل استانا مەن الماتىداعى 16 تەرمينالعا شىمكەنت, اتىراۋ, اقتوبە جانە اقتاۋ قالالارىنداعى تاعى 16 تەرمينال قوسىلادى.
سونىمەن قاتار, استانا-شىمكەنت باعىتى بويىنشا ىشكى رەيستەردە بيومەتريانى ەنگىزۋ بويىنشا پيلوتتىق جوبا ىسكە قوسىلماق.
ەسكە سالا كەتەيىك, بۇعان دەيىن الماتى اسپانىندا اەروتاكسيلەر سىناقتاپ ءوتىپ جاتقاندىعىن جازعان بولاتىنبىز. بۇدان بولەك, ەندى ەلىمىزدەن توكيو مەن نيۋ-يورككە جاڭا رەيستەر قاتىناماق.
