شىمكەنت قالاسى № 10 ارناۋلى الەۋمەتتىك قىزمەتتەر كورسەتۋ ورتالىعىندا قىزمەت الۋشى ەكى قارتتىڭ كوڭىلى جاراسىپ, باس قۇردى. قوس ارداگەردىڭ قۋانىشىنا وراي دەمەۋشىلەر ەسەبىنەن توي جاسالىپ, جاقسى تىلەكتەر ايتىلدى.
72 جاستاعى راقىمقۇل بەگالى ۇلى مەن 62 جاستاعى نايلا مۇحاممەدقىزى وسى قارتتار ۇيىندە تانىسىپ, باس قوسقان.
ەكەۋى دە №10 الەۋمەتتىك قىزمەتتەر كورسەتۋ ورتالىعىنا 2023 جىلدىڭ ماۋسىم ايىندا كەلگەن.
جىل سوڭىنا قاراي قوس ارداگەر ۇيلەنۋ جونىندە شەشىم قابىلداپ, 23 قازاندا زاڭدى نەكەگە تۇرعان.
بۇگىن قوعام بەلسەندىسى سامات بەكەباەۆ دەمەۋشىلەردىڭ ەسەبىنەن دۇبىرلەتىپ تويىن ۇيىمداستىرىپ بەردى.
تويعا قارتتار ءۇيىنىڭ قىزمەتكەرلەرى, جۇبايلاردىڭ زامانداس-قۇرداستارى قاتىستى.
جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى جانات وتەباەۆا قۋانىش يەلەرىن ۇيلەنۋ تويىمەن قۇتتىقتاپ, دەنىنە ساۋلىق تىلەدى.
- باقىتتى بولۋعا نيەت ەتكەن ادامعا ۋاقىت كەدەرگى ەمەس ەكەنىن وزدەرىڭىز تاعى ءبىر رەت دالەلدەدىڭىزدەر. كوڭىلى جاراسقان ادام قانداي كەزدە دە ءبىر-بىرىنە سۇيەۋ. سىزدەردى بۇگىنگى شاتتىق كۇنمەن قۇتتىقتاي وتىرىپ, وسى تويعا اتسالىسقان بارشا جانعا العىس ايتامىن, — دەدى باسقارما باسشىسى.
ايتا كەتسەك, قازىرگى تاڭدا № 10 ارناۋلى الەۋمەتتىك قىزمەتتەر كورسەتۋ ورتالىعىندا 47 قىزمەت الۋشى بار. ونىڭ 15-ءى ايەل, 32-ءسى ەر ادام.
