بايقاۋعا 3 000-نان استام ءوتىنىم ءتۇسىپ, ولاردىڭ ىشىنەن ۇزدىك دەپ تانىلعان سەگىز قالامگەر فينالعا جولداما الدى. فيناليستەردىڭ جەتەۋى 3 ميلليون تەڭگە كولەمىندە قالاماقىعا يە بولىپ, ولاردىڭ شىعارمالارى 1 000 دانامەن جارىق كوردى. كەش بارىسىندا اتالعان رومانداردىڭ تۇساۋكەسەرى ءوتىپ, وقىرمانعا ۇسىنىلدى. ءار كىتاپتىڭ 750 داناسى ۇلتتىق كىتاپحاناعا تابىستالىپ, ەلىمىزدىڭ ءار وڭىرىنە تاراتىلادى.
فيناليستەر قاتارىندا دۋمان رامازان («سىناق»), قۋانىش جيەنباي («ارالقۇمداعى اقىرعى ايالداما»), نۇرجان قۋانتاي ۇلى («وپاسىز ويىن»), اسقار التاي («كاسكاد»), مۇرات الماسبەك («ەكى جاعالاۋ»), قۋات بوراش («تاۋبە»), ايىم اقىلتاي («قارىز») سياقتى تاجىريبەلى جانە جاس قالامگەرلەر بار. ال باس جۇلدە – 15 ميلليون تەڭگە جۇسىپبەك قورعاسبەككە «كەلندەگى كوكجال» رومانى ءۇشىن بەرىلدى. سونىمەن قاتار بۇل تۋىندى نەگىزىندە كوركەم فيلم ءتۇسىرۋ جوسپارلانىپ وتىر.
جوبا ERG ديرەكتورلار كەڭەسىنىڭ توراعاسى شۋحرات يبراگيموۆتىڭ قولداۋىمەن جۇزەگە استى. ول ءوز قۇتتىقتاۋىندا ۇلتتىق قۇندىلىقتاردىڭ ماڭىزىن اتاپ ءوتىپ, قازىرگى ادەبيەتتىڭ جاڭا بۋىنعا باعىت-باعدار بەرەتىن كۇش ەكەنىن ايتتى. ونىڭ پىكىرىنشە, بۇگىنگى ادەبيەت جاڭا زامان كەيىپكەرلەرىن قالىپتاستىرۋعا ءتيىس.
سالتاناتتى كەشتە مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتى وقىلدى. سونداي-اق ءىس-شاراعا مەرەكە قۇلكەنوۆ, قانات سامات ۇلى, بەكسۇلتان نۇرجەكە ۇلى, باۋىرجان جاقىپ, عازيزا قۇدايبەرگەنوۆا, تەمىرعالي كوپباي, قاينار ولجاي, قانات اۋەسباي سەكىلدى زيالى قاۋىم وكىلدەرى قاتىستى.
جالپى, «قازىرگى زامانعى قازاق رومانى» جوباسى جەڭىمپازداردى انىقتاۋمەن شەكتەلمەي, قازاق ادەبيەتىنىڭ جاڭا كەزەڭگە قادام باسقانىن كورسەتتى. بۇل باستاما ۇلتتىق پروزانى جاڭعىرتىپ, جاڭا ەسىمدەردىڭ قالىپتاسۋىنا جول اشاتىن ماڭىزدى مادەني الاڭعا اينالدى.
