نەمىستىڭ ونەر تەورەتيگى فريدريح شەللينگ ء«مۇسىن – تاستا قاتىپ قالعان اۋەن» دەيدى. كورمەنى دە زاتقا قونعان ءۇن نەمەسە وي دەسەك بولادى. سۋرەتشى جان ليۋك كورنە ەسكى قالالىق تەلەفوندارعا ۇلى ونەردىڭ قاسيەتىن قوندىرا ءبىلدى. ول «تەلەفون قويلار» دەگەن كورمە ۇيىمداستىرىپ, كورگەن جانعا ەرەكشە سەزىم سىيلادى. سۋرەتشى وزگەشە «قويلاردى» تەلەفون كابىلدەرىنەن جانە ەسكى تەلەفونداردان جاساپ شىعارعان.
كورمە جانسىز زاتقا ءتىل بىتىرە الۋىمەن ەرەكشەلەنەدى. قاراپايىم دۇنيەدەن كورەرمەن كوزايىمىنا اينالعان ءمۇسىن تەحنولوگيانىڭ قانشالىقتى جىلدام دامىپ كەلە جاتقانىن جانە ەسكى زاتتاردى قالاي ءتيىمدى پايدالانۋعا بولاتىنىن كورسەتەدى.
قازىر سىمى بار ستاتسيونارلىق تەلەفوندار قولدانىستان شىقتى. ولاردىڭ بارلىعى دەرلىك قىتايعا قايتا وڭدەۋگە كەتتى, بىراق كەيبىرى ەرەكشە فرانتسۋز سۋرەتشىسى جان ليۋك كورنەنىڭ قولىنا ءتۇستى. فرانكفۋرتتاعى بايلانىس مۇراجايىنداعى كورمە ونەرتانۋشىلار تاراپىنان ء«بىرتۇرلى كورمە» دەگەن باعا العان. 32 باسى بار ءتۇرلى-ءتۇستى قويلار كورمەسى ۇنەمى جاڭارىپ تۇرادى. ولاردىڭ اياقتارى تەلەفون تۇتقالارىنان, باستارى اپپاراتتاردىڭ وزىنەن, ال قالىڭ قوي تەرىسى بۇرالعان سىمداردان جاسالعان. اۆتور تسيفرلىق داۋىردە ۇدەرىستىڭ قانشالىقتى جىلدام جۇرەتىنىن كورسەتكىسى كەلگەن.
جاھان جىلدام جاڭارادى, ءبىر ورىندا تۇرمايدى. ءسات سايىن جاڭا تەحنولوگيالار پايدا بولىپ, ەسكىلىك ەسىك تابالدىرىعىندا قالىپ جاتىر. بىراق وسى كورمەدەگى «قويلار» سەكىلدى, دۇنيە وزگەرسە دە ءبىر قالىپتا تۇرا بەرەتىن وشپەس, ولمەس دۇنيەلەر تاعى بار. سۋرەتشىنىڭ ايتقىسى كەلگەنى دە – وسى.
