فوتو: gov.kz
«قازىر قۇرىلىس سالاسىندا ساراپتاما جاساۋدى مەملەكەتتىڭ يەلىگىنە قايتارۋ ماسەلەسى قىزۋ تالقىلانىپ جاتىر. ازاماتتاردىڭ قاۋىپسىزدىگىن قامتاماسىز ەتۋ – ەڭ باستى مىندەت. قۇرىلىس ساپاسىنا جاسالاتىن باقىلاۋدى مىندەتتى تۇردە كۇشەيتۋ كەرەك. بۇل – انىق دۇنيە. الايدا, مەملەكەت وسى نارىقتى تۇگەل يەمدەنىپ الماۋى قاجەت. شىنايى باسەكە بولۋعا ءتيىس. ۇكىمەت بارلىق تاراپتىڭ مۇددەسىن ەسكەرۋى كەرەك.
بۇل سالادا ۇلەسكەرلىك قۇرىلىسقا, عيماراتتاردىڭ زاڭسىز ءارى ورىنسىز سالىنۋىنا, م ۇلىك يەلەرىنىڭ بىرلەستىگىن رەفورمالاۋعا قاتىستى قوردالانعان ماسەلەلەر بار. ازاماتتار ۇنەمى شاعىمدانىپ جاتادى. الايدا, قۇزىرلى ورگاندار ءالى كۇنگە دەيىن ءتيىستى شارا قولدانباي وتىر. ۇكىمەت بۇل ماسەلە بويىنشا جىل سوڭىنا دەيىن ناقتى شەشىم قابىلداۋى كەرەك», دەگەن پرەزيدەنت سىبايلاس جەمقورلىق بارلىق سالاعا دا دەندەپ ەنىپ, ۇيالاپ العانىن ايتتى.
مەملەكەت باسشىسىنىڭ ايتۋىنشا, سىبايلاس جەمقورلىق - ەل ەكونوميكاسىن دامىتۋعا توسقاۋىل بولاتىن نەگىزى فاكتور.
«تاعى ءبىر وزەكتى ماسەلە – سىبايلاس جەمقورلىق. بۇل – قۇرىلىس سالاسىن عانا ەمەس, جالپى ەكونوميكانى دامىتۋعا توسقاۋىل بولاتىن فاكتور. سىبايلاس جەمقورلىققا قارسى جاپپاي كۇرەسۋ قاجەت. مەن بۇل تۋرالى ۇنەمى ايتىپ ءجۇرمىن. وسى باعىتتا ءبىراز جۇمىس جاسالدى, ناتيجە دە بار. بىراق, سولاي ەكەن دەپ, بوساڭسۋعا بولمايدى. جۇمىستى جالعاستىرۋ قاجەت. اسىرەسە, تسيفرلاندىرۋدى بەلسەندى تۇردە قولدانۋ كەرەك.
قازىر قۇرىلىس سالاسىندا بىرنەشە اقپاراتتىق جۇيە بار. وسىنداي تاسىلدەر ارقىلى بولىنگەن قاراجاتتىڭ ماقساتقا ساي جۇمسالۋىن قامتاماسىز ەتۋ قاجەت, ياعني بارىنشا اشىق جانە قاتاڭ باقىلاۋ بولۋعا ءتيىس. بۇل – وتە ماڭىزدى ماسەلە. سەبەبى, قارجىنىڭ ۇرلانۋى, ەڭ الدىمەن, قۇرىلىستىڭ ساپاسىنا اسەر ەتەدى جانە بيۋدجەتكە قوسىمشا سالماق سالادى. اقشاعا تسيفرلىق تەڭگە ارقىلى ەن سالۋ جانە ونى قاداعالاۋ, باسقاشا ايتقاندا, «اقشانى بوياۋ» بيۋدجەت قاراجاتىنىڭ جۇمسالۋىن باقىلايتىن وتە ماڭىزدى تەتىك بولۋى مۇمكىن», دەدى ق.توقاەۆ.
پرەزيدەنت تسيفرلىق ۆاليۋتانى قولدانۋعا قاتىستى پيلوتتىق جوبالار ءتيىمدى بولعانىن ايتىپ, سىبايلاس جەمقورلىققا قارسى ءىس-قيمىل اگەنتتىگىنە ۇكىمەتپەن جانە ۇلتتىق بانكپەن بىرلەسىپ, وسىنداي جوبالاردىڭ اۋقىمىن كەڭەيتۋدى, ونىڭ ىشىندە قۇرىلىس سالاسىنا بارىنشا ەنگىزۋدى تاپسىردى.
