فوتو: aqorda_resmi
«الدىمىزدا ۇلتتىق ەكونوميكانى ساپالى ءارى قارقىندى دامىتۋ دەگەن وتە ماڭىزدى مىندەت تۇرعانىن تەرەڭ ءتۇسىنۋ قاجەت. تابىس پەن م ۇلىككە سالىق سالۋدىڭ جاڭا جۇيەسىن ەنگىزبەسەك, كاسىپكەرلەردى تابىسىن قالتاعا باسپاي, بيزنەسىن دامىتۋ ءۇشىن جۇمساۋعا ىنتالاندىرماساق, ارنايى سالىق رەجيمدەرىن وزگەرتپەسەك, بۇل مىندەتتى ورىنداي المايمىز. سوندىقتان سالىق كودەكسى سەكىلدى ستراتەگيالىق ماڭىزى بار قۇجاتتى ازىرلەۋگە وسى سالا ماماندارىنان بولەك ەكونوميستەر مەن بيزنەس وكىلدەرى جۇمىلدىرىلۋى قاجەت. ارينە, بيۋدجەت قورجىنىن تولتىرۋ مىندەتىن ۇمىتۋعا بولمايدى. ەكونوميكا نەعۇرلىم قۋاتتى بولسا, سوعۇرلىم كوپ سالىق تۇسەدى دەگەن قاعيداتتى بەرىك ۇستانۋ كەرەك. سالىقتى جايدان جاي كوبەيتە سالۋعا بولمايدى. ەڭ الدىمەن, سالىق سالۋ جۇيەسىن رەتتەپ, ونى جەتىلدىرۋ قاجەت. سونداي-اق كولەڭكەلى ەكونوميكانى بارىنشا ازايتۋ كەرەك. ياعني, سالىق جۇيەسىن باسقارۋ جۇمىسى دۇرىس جولعا قويىلماسا, ەڭ وزىق دەگەن سالىق ساياساتىنىڭ ءوزى ءتيىمسىز بولىپ شىعادى. ۇكىمەت سالىق جەڭىلدىكتەرىن بەرۋدىڭ اشىق ءارى ناقتى ەرەجەلەرىن ازىرلەۋگە ءتيىس. قارجى مينيسترلىگىنىڭ مالىمەتى بويىنشا جەڭىلدىك بەرۋدىڭ سالدارىنان جىل سايىن بيۋدجەتكە ورتاشا ەسەپپەن 7 تريلليونعا جۋىق تەڭگە كەم تۇسەدى», دەدى ق.توقاەۆ.
پرەزيدەنت بۇعان دەيىن دە سالىق جەڭىلدىكتەرىن 20 پايىزعا ازايتۋ تۋرالى تاپسىرما بەرگەنىن, بىراق, ءالى كۇنگە دەيىن ورىندالماعانىن سىنعا الدى. ءتىپتى بۇرىنعى ۇكىمەت ماسەلەنىڭ شەشۋ جولىن دا ازىرلەمەگەنىن ەسكەرتتى.
«ميكرو جانە شاعىن كاسىپكەرلىك ءۇشىن ەڭبەكاقى تولەۋ قورىنان ءبىر رەتتىك تولەم جاساۋدى ەنگىزۋ ءىسى دە اياقسىز قالدى. بۇل نورمانىڭ ەنگىزىلگەنىنە ءبىر جىلدان استى. ۋاكىلەتتى ورگاندار جۇمىستىڭ تابىستى اتقارىلعانى تۋرالى ەسەپ بەردى. ال بيزنەس وكىلدەرى بۇرىنعىسىنشا سالىق پەن جارنانى بيۋدجەتتىك ەمەس قورلارعا جەكە-جەكە تولەۋدى جالعاستىرىپ جاتىر. ءبىر جاعىنان, ورتا بيزنەسكە ناقتى قولداۋ كورسەتۋ ماسەلەسىنە ايرىقشا ءمان بەرۋ كەرەك. مىسالى, كوپ جاعدايدا بيزنەستى قولدان ۇساقتاپ جاتادى. كاسىپكەرلەردى ءتيىستى ساناتقا ءبولۋ ادىستەمەسى دۇرىس جولعا قويىلماعان. مەملەكەتتىك ساتىپ الۋ جانە مەملەكەتتىك قولداۋ شارالارىن ۇسىنۋ كەزىندە ورتا بيزنەسكە باسىمدىق بەرىلۋى كەرەك. وسى ماسەلەلەردى مىندەتتى تۇردە شەشۋ قاجەت. بيزنەسكە اكىمشىلىك قىسىم كورسەتۋدى ازايتۋ كەرەك, سونىڭ ىشىندە رەتتەۋ قاعيداتىن قولدانۋ ارقىلى ىقپال ەتۋدى دوعارعان ءجون», دەگەن مەملەكەت باسشىسى بۇل سالاعا تۇبەگەيلى وزگەرىس جاسايتىن كەز كەلگەنىن ايتتى.
