الەۋمەتتىڭ الەۋەتىن ارتتىراتىن جوبا الەۋمەتتىك تولەم جاساۋدى جەڭىلدەتەدى. تسيفرلىق تولەم قۇرالى ۇلتتىق بانكتىڭ جەدەل تولەم جۇيەسىمەن ىسكە اسادى. وتاندىق «BTS Digital» IT-كومپانياسى ازىرلەگەن ءاميان «eGov» ءموبيلدى قوسىمشاسىنا بىرىكتىرىلدى. وندا بارلىق الەۋمەتتىك تولەمدى الۋعا, قاراجاتتى كارتالارعا اۋدارۋعا, سونداي-اق تەگىن ءدارى-دارمەك پەن مەكتەپتە تۇسكى اس الۋعا مۇمكىندىك بار. الەۋمەتتىك ءاميان جوباسىنىڭ قاناتقاقتى قادامى وتكەن جىلدىڭ قاراشا ايىندا تسيفرلىق الەمگە اياق باسقان. سودان بەرى بىرقاتار ساۋدا جانە قىزمەت كورسەتۋ نىسانى جوباعا قوسىلىپ, ونى ءىس جۇزىندە سىناپ كوردى.
– حالىق مەملەكەتتىك تولەم الۋشىلارمەن بىرگە الەۋمەتتىك امياندارعا ەسەپتەلگەن الەۋمەتتىك جاردەماقى ەسەبىنەن ازىق-تۇلىك پەن شارۋاشىلىق تاۋارلارىن, ءدارىحانادان تەگىن ءدارى-دارمەك ساتىپ الىپ ءجۇر. ءوز باقىلاۋىمىزدان ءوتتى. جوبا – قاۋىپسىز ءارى ىڭعايلى. مىسالى, دەرەكتەردى جاڭارتۋ ءۇشىن مەكەمەلەرگە, ءدارى نۇسقاۋلىعىن الۋ ءۇشىن ءاردايىم دارىگەرلەرگە بارۋدىڭ قاجەتى جوق. تەك تەلەفوندا جاڭارتۋ جۇمىستارىن جاساۋ جەتكىلىكتى, – دەيدى «قازاقتەلەكومنىڭ» ستراتەگيالىق باسقارۋ جونىندەگى باس ديرەكتورى باتىر ماحانبەتاجيەۆ.
راسىندا دا, قىزمەت مۇمكىندىگىنشە قاراپايىم ءارى قولدانۋعا ىڭعايلى. «eGov-mobile» قوسىمشاسىنىڭ كومەگىمەن كاسسادا كورسەتىلگەن «QR» كودىن سكانەرلەۋ جەتكىلىكتى. ەشقانداي كوميسسيا مەن قوسىمشا تولەمدەر دە جوق. الەۋمەتتىك ءامياندى قولدانىپ جۇرگەن گالينا ۆىسوچانسكايا «مەن قوسىمشانى ءۇش ايدان بەرى پايدالانامىن. ءاميان – وتە ىڭعايلى. ويتكەنى ۇنەمى ءبىر جەرگە بارۋدىڭ, قولما-قول اقشا الۋدىڭ قاجەتى جوق. ءبارىن تەلەفونمەن-اق جاسايمىن», دەپ تاجىريبەسىمەن ءبولىستى.
الەۋمەتتىك ءامياننىڭ تاعى ءبىر ارتىقشىلىعى – وقۋشىعا قاجەت قىزمەت كورسەتۋ ءتۇرىن انىقتاۋعا مۇمكىندىك بەرەدى. ياعني اتا-انالار بالانىڭ تاماعى مەن قاجەتتەلىكتەرى ءۇشىن مەكتەپكە بارىپ جۇرمەيدى. ەگەر بالاعا ىستىق تاماق قاجەت بولسا, ولار مەملەكەتتەن ءتيىستى «SMS» الادى. قىزمەتتى الۋعا كەلىسىم بەرەتىندەرىن جاۋاپ حابارلاماسىمەن جىبەرسە جەتكىلىكتى, قوسىمشا قۇجاتتار كەرەك ەمەس. بۇل سونىمەن قاتار مەكتەپ قىزمەتكەرلەرىنە تۇسەتىن جۇكتەمەنى دە ازايتادى.
اقكول قالاسى پ.يساكوۆ اتىنداعى №1 مەكتەپتىڭ ديرەكتورى اسەل سادىقوۆا «قاناتقاقتى جوباعا ءبىزدىڭ مەكتەپتىڭ قاتىسقانىنا قۋانىشتىمىز. قاعازباستىلىقتان قۇتىلۋ جانە ۋاقىتتى ۇنەمدەۋ ارقىلى جۇمىستى جەڭىلدەتتى. اتا-انالار دا بالالارىنىڭ قالاي تاماقتاناتىنىن كورىپ, ۋايىمسىز ءجۇر», دەدى.
قازىر الەۋمەتتىك ءامياندا مەملەكەتتىك قولداۋدىڭ كوپتەگەن ءتۇرى بار. بولاشاقتا جەڭىلدەتىلگەن باعامەن ونىمدەردى ساتىپ الۋ, ينۆاتاكسي قىزمەتتەرى, ەرەكشە قاجەتتىلىكتەرى بار ادامدارعا وڭالتۋ قۇرالدارىن ساتىپ الۋ سىندى مۇمكىندىكتەردى قوسۋ جوسپارلانىپ وتىر.
