فوتو: gov.kz
«مەملەكەت باسشىسىنىڭ جارلىعىمەن ارمان اباي ۇلى شاققاليەۆ قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى لاۋازىمىنا تاعايىندالدى», دەلىنگەن اقوردا حابارلاماسىندا.
ارمان شاققاليەۆ 1977 جىلى قاراعاندى وبلىسىندا تۋعان.
ل.ن. گۋميلەۆ اتىنداعى ەۋرازيا ۋنيۆەرسيتەتىن, ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىن, م.دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتىن بىتىرگەن.
ەڭبەك جولىن 1998 جىلى استانا جانە اقمولا وبلىسى بويىنشا «كاسىپورىنداردى قايتا ۇيىمداستىرۋ جانە تاراتۋ اگەنتتىگى» اشىق اكتسيونەرلىك قوعامىندا زاڭ كەڭەسشىسى بولىپ باستاعان.
2001-2004 جىلدار ارالىعىندا قازاقستان رەسپۋبليكاسىنىڭ كاسىپورىنداردى قايتا ۇيىمداستىرۋ جانە تاراتۋ اگەنتتىگىندە, مەملەكەتتىك ماتەريالدىق رەزەرۆتەر جونىندەگى اگەنتتىگىندە, مەملەكەتتىك كىرىستەر مينيسترلىگىندە باسشىلىق لاۋازىمداردا جۇمىس ىستەگەن.
2004-2006 جىلدارى «قازاقستان مەترولوگيا ينستيتۋتى» رمك ديرەكتورى بولىپ ەڭبەك ەتكەن.
2006-2007 جىلدارى — مەملەكەتتىك كىرىستەر مينيسترلىگىنىڭ دارمەنسىز بورىشكەرلەرمەن جۇمىس جونىندەگى كوميتەتى توراعاسىنىڭ ورىنباسارى.
2007-2008 جىلدارى ەكونوميكا جانە بيۋدجەتتىك جوسپارلاۋ مينيسترلىگىنىڭ مەملەكەتتىك اكتيۆتەردى باسقارۋ ساياساتى دەپارتامەنتىنىڭ ديرەكتورى بولىپ جۇمىس ىستەگەن.
2008-2016 جىلدار ارالىعىندا «قازاقستاندىق ستاندارتتاۋ جانە سەرتيفيكاتتاۋ ينستيتۋتى» رەسپۋبليكالىق مەملەكەتتىك كاسىپورنىنىڭ باس ديرەكتورى قىزمەتىن اتقارعان.
2016-2018 جىلدارى — ەۋرازيالىق ەكونوميكالىق كوميسسيانىڭ تەحنيكالىق رەتتەۋ جانە اككرەديتتەۋ دەپارتامەنتىنىڭ ديرەكتورى.
2018 جىلى قازاقستان رەسپۋبليكاسى ساۋدا جانە ينتەگراتسيا مينيسترلىگىنىڭ تەحنيكالىق رەتتەۋ جانە مەترولوگيا كوميتەتىنىڭ توراعاسى لاۋازىمىنا تاعايىندالعان.
2020-2022 جىلدارى قازاقستان رەسپۋبليكاسىنان ەۋرازيالىق ەكونوميكالىق كوميسسيا القاسىنىڭ مۇشەسى, ەەك باسەكەلەستىك جانە مونوپولياعا قارسى رەتتەۋ ءمينيسترى بولعان.
2022 جىلعى قاراشادان باستاپ — قازاقستان رەسپۋبليكاسى ساۋدا جانە ينتەگراتسيا ءمينيسترىنىڭ ءبىرىنشى ورىنباسارى.
2023 جىلعى 2 قىركۇيەكتە قازاقستان رەسپۋبليكاسى پرەزيدەنتىنىڭ جارلىعىمەن قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى بولىپ تاعايىندالدى.
