فوتو: pixabay.com
العاش رەت اتالىپ جاتقان ازاماتتىق اۆياتسيا قىزمەتكەرلەرىنىڭ كاسىبي مەرەكەسىنە وراي كولىك مينيسترلىگىندە سالا ارداگەرلەرى مەن قىزمەتكەرلەرىنىڭ, اۆياتسيالىق كومپانيالار مەن كاسىپورىنداردىڭ, سونداي-اق شەتەلدىك سەرىكتەس ۇيىمداردىڭ وكىلدەرىنىڭ قاتىسۋىمەن سالتاناتتى ءىس-شارا ءوتتى. مينيستر مارات قاراباەۆ اۆياتورلاردى قۇتتىقتاپ, سالالىق ناگرادالاردى تابىس ەتتى.
«ازاماتتىق اۆياتسيا سالاسى وتاندىق كولىك جۇيەسىنىڭ ماڭىزدى قۇرامداس بولىگى ىسپەتتەس. بۇل يگى باستاما سالانى دامىتۋ مەن ودان ءارى نىعايتۋ, ەلىمىزدەگى اۆياتسيا ماماندارىنىڭ پاتريوتتىق رۋحىن كوتەرۋ جولىنداعى ماڭىزدى قادام بولىپ وتىر. بىرلەسكەن كۇش-جىگەردىڭ ارقاسىندا اتالعان سالا الەمدىك قوعامداستىقتا ءوزىنىڭ لايىقتى ورنىن يەلەندى. اتاپ ايتقاندا, ۇشۋ قاۋىپسىزدىگىن قامتاماسىز ەتۋ جوعارى دەڭگەيدە, سالاداعى نەگىزگى كورسەتكىشتەر مەن جەرۇستى ينفراقۇرىلىمى كۇننەن كۇنگە جاقسارىپ كەلەدى», دەدى سالا باسشىسى سالتاناتتى جيىندا.
مەرەكەلىك ءىس-شارادا «قۇرمەتتى اۆياتور» مەدالىمەن ازاماتتىق اۆياتسيا ارداگەرلەرى م.كوروۆكين جانە م.ايازباەۆا, «قازاەروناۆيگاتسيا» رمك اقتاۋ فيليالىنىڭ ديسپەتچەرى س.ميفتاحوۆا, Air Astana اۋەكومپانياسىنىڭ Airbus ترەناجەرىنىڭ نۇسقاۋشىسى ا.پەتين, SCAT اۋەكومپانياسىنىڭ كادرلىق جانە قۇقىقتىق جۇمىس دەپارتامەنتىنىڭ ديرەكتورى ا.گانەەۆ, Qazaq Air ديسپەتچەرى د.وسمانوۆ ماراپاتتالدى.
ءمينيستردىڭ قۇرمەت گراموتاسىمەن اۋە كەمەسىنىڭ كومانديرى, ازاماتتىق اۆياتسيا ارداگەرى ە.وسپانوۆ, SCAT اۋە كومپانياسىنىڭ پرەزيدەنتى ۆ.دەنيسوۆ, Air Astana ۆيتسە-پرەزيدەنتى ە.شامشيەۆ, «قازاەروناۆيگاتسيا» رمك باس ديرەكتورى ن.احمەتوۆ, «قازاقستاننىڭ اۆياتسيالىق اكىمشىلىگى» اق باس ديرەكتورى ك.رادۋ, Qazaq Air ديرەكتورى ە.ناۋرىزباەۆ, استانا اۋەجايىنىڭ باس ديرەكتورى يۋ.دجاۋدەر, الماتى حالىقارالىق اۋەجايىنىڭ پرەزيدەنتى ا.ەرسوي, ازاماتتىق اۆياتسيا اكادەمياسىنىڭ رەكتورى, باسقارما توراعاسى ب.سەيداحمەتوۆ ناگرادتالدى.
سونداي-اق ازاماتتىق اۆياتسيا قىزمەتكەرلەرى كۇنىنە وراي ۇيىمداستىرىلعان ۇستەل تەننيسى بويىنشا ءتۋرنيردىڭ جەڭىمپازدارىنا ارنايى ديپلومدار مەن كۋبوكتەر تابىس ەتىلدى.
