قازاقستان نامىسىن سپورتتىڭ 5 تۇرىنەن (9 باعدارلاما) 41 ءجاسوسپىرىم قورعادى. ناتيجەسىندە, سپورتشىلارىمىز 1 التىن, 2 قولا مەدالمەن بەيرەسمي جالپىكوماندالىق ەسەپتە 20-ورىنعا تابان تىرەدى. 14 كۇن بويى جالاۋى جەلبىرەگەن بايراقتى باسەكەدە ۇلتتىق قۇراما سپورتشىلارىنىڭ جەكەلەگەن باعدارلاماداعى ناتيجەسىنە كوز جۇگىرتىپ وتسەك.
تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى حابارلاعانداي, الدىمەن وليمپيادانىڭ العاشقى كۇنى شاڭعىمەن تۇعىردان سەكىرۋ جارىسىندا قازاقستان ءانۇرانى شىرقالدى. يليا ميزەرنىح 214 ۇپاي جيناپ, جاسوسپىرىمدەردىڭ قىسقى وليمپياداسىندا تۇڭعىش قازاقستان چەمپيونى اتاندى. بۇل كۇنى اليونا سۆيريدەنكو – 27, سوفيا شيشكينا – 29, يليا شيلنيكوۆ 30-ورىن الدى. ارالاس كوماندالىق سايىستا قازاقستان (يليا ميزەرنىح, يليا شيلنيكوۆ, سوفيا شيشكينا مەن اليونا سۆيريدەنكو) 491,3 ۇپاي جيناپ, 13-ساتىعا تابان تىرەدى.
شورت-ترەكتەن قازاقستان ويىندارعا تولىق قۇرامدا (2 ۇل, 2 قىز) قاتىسقان توعىز ەلدىڭ ءبىرى بولدى. مۇندا پولينا ومەلچۋك 1 000 مەترگە جارىستا قولا جۇلدەگە قول جەتكىزدى. سونداي-اق ول 1 500 مەترگە جارىستا فينالعا شىققانىمەن مەدال الا المادى (6-ورىن). اناستاسيا استراحانتسەۆانىڭ ۇزدىك كورسەتكىشى – ۆ فينالى (6-ورىن). ۇلدار اراسىندا ەراسىل شىڭعىسحان مەن مەيىرجان تولەگەننىڭ جەكەلەي سىنداعى ۇزدىك ناتيجەسى شيرەك فينال بولدى. ەستافەتادا قازاقستان جارتىلاي فينالدا ەراسىلدىڭ قۇلاپ قالۋىنا بايلانىستى جارىستى اياقتاي المادى. حوككەيدەن (3×3) ۇلتتىق قۇراما جارادى. قولا جۇلدە ءۇشىن بولعان كەزدەسۋدە اۋستريادان 6:5 ەسەبىمەن باسىم ءتۇسىپ, جۇلدەگەرلەر قاتارىنان كورىندى. جاسوسپىرىمدەر وليمپياداسىنا (3×3) حوككەي العاش رەت قوسىلعانىن ايتا كەتەيىك. قازاقستان توپتىق كەزەڭدە پولشا, يسپانيا, ۇلىبريتانيا, قىتايدىڭ تايپەيىن ءىرى ەسەپپەن جەڭگەن-ءدى. الايدا دانيا, اۋستريا, لاتۆياعا تارتىستى ماتچتا جول بەردى. سوعان قاراماستان پلەي-وفقا شىعىپ, جارتىلاي فينالدا لاتۆياعا تاعى ەسە جىبەردى.
– جاسوسپىرىمدەر وليمپياداسىندا العاش رەت باق سىناپ, قارسىلاستارىمىزبەن سوڭىنا دەيىن ايقاستىق, – دەپ باستادى اڭگىمەسىن حوككەيشى جاھانگەر تىلەۋحان. – العاشقى پولشامەن وتكەن كەزدەسۋدە ءىرى جەڭىسكە جەتكەنىمىزبەن, اۋستريامەن تەڭدەي ويىندا 8:9 ەسەبىمەن جەڭىلدىك. ءبىرىنشى جەڭىلىس كوماندامىزعا ەموتسيالىق تۇرعىدا اسەر ەتتى. دەگەنمەن قولا جۇلدە ءۇشىن ويىندا قايتا جولىعىپ, ەسەمىزدى قايتارا الدىق. قانداي قورىتىندى شىعارۋعا بولادى؟ سالىستىرمالى تۇردە ءبىز لاتۆيادان كەيىن ەڭ كوپ 104 شايبا سوققان كوماندا اتاندىق. ايتسە دە كوپتەگەن مۇمكىندىكتى قولدانا المادىق. كەمشىلىگىمىز – قورعانىسىمىزدىڭ تۇراقسىزدىعى. سەبەبى 9 ويىندا قاقپامىزعا 83 شايبا وتكىزىپ الدىق. ءتىپتى چەمپيون اتانعان لاتۆيانى ءبىرىنشى كەزەڭدە ۇتقانىمىزبەن, كەيىن بىرنەشە شايبا جىبەردىك. جالپى, وليمپيادادا قازاقستان ۇلتتىق قۇراماسىنىڭ تىزىمىنە ەنىپ, ەل نامىسىن قورعاعانىمدى ماقتان تۇتامىن.
تاۋ شاڭعىسىندا ەل نامىسىن الەكساندرا سكوروحودوۆا مەن ۆلاديسلاۆ حوحلوۆ قورعادى. الەكساندرانىڭ ۇزدىك كورسەتكىشى – 5-ورىن (گيگانت سلالوم). ال ۆلاديسلاۆتىڭ ناتيجەسى – 19-ورىن (سلالوم). كونكيمەن جۇگىرۋدە اپكەلى-ءسىڭلىلى كريستينا جانە الينا شۋمەكوۆالار, رۋسلان ءجانادىلوۆ پەن ميحايل ماتريۋحين سىنعا ءتۇستى. ولاردىڭ ناتيجەسى مىناداي: كريستينا شۋمەكوۆا – 7-ورىن, (500 جانە 1 500 م), الينا شۋمەكوۆا – 10-ورىن (500 م), رۋسلان ءجانادىلوۆ – 8-ورىن, (1 500 م) جانە ميحايل ماتريۋحين 17-ورىننان (1 500 م) كورىندى.
بۇعان دەيىنگى ويىنداردا ەڭ كوپ جۇلدە العان بياتلوننان بۇل جولى جۇلدەسىز قالدىق. ارالاس جۇپتىق سىندا ءىلياس پەن الەما قاراباەۆالار 10-ورىندا بولسا, ارالاس كوماندالىق ەستافەتادا قازاقستان 11-ورىننان كورىندى. جەكەلەي سىنداعى جاقسى ناتيجە – كيريلل زوتوۆتىڭ ەنشىسىندە (23-ورىن, 12,5 كم). فريستايلدىڭ موگۋل تۇرىندە يۋليا فەكليستوۆا 9, ال دەنيس راسترۋبا ۇلدار اراسىندا 10-ساتىدان كورىندى. كوماندالىق جارىستى ەكەۋى دە 12-ورىنمەن اياقتادى.
كيورلينگتەن ۇلتتىق قۇراما مۇشەلەرى يبراگيم مەن مەرەي تاستەمىرلەر توپتىق كەزەڭنەن شىعا المادى. العاشقى كەزەڭدە ولار يتاليادان باسىم تۇسكەن-ءدى. الايدا اۋستريا, گەرمانيا, شۆەيتساريا مەن دانيا قۇراماسىنا ەسە جىبەردى. شاڭعىمەن جارىستا قازاقستان قۇراماسى (بەرىك بورانباەۆ, اۋباكىر توتانوۆ, ميلانا مامەدوۆا, ۆيولەتتا ميتروپولسكايا) ەستافەتادا 16-بولىپ مارە سىزىعىن كەستى. بۇل – ولاردىڭ الپەنسيا كەشەنىندەگى ەڭ جاقسى ناتيجەسى. جەكەلەي سىنداعى جاقسى كورسەتكىش – بەرىك بورانباەۆ (22-ورىن, ەركىن ءادىس) پەن ۆيولەتتا ميتروپولسكايادا (25-ورىن, كلاسسيكالىق ءادىس).
كانۆون تورىندە قازاقستان سپورتشىلارى العاش رەت فريستايل-موگۋل, حوككەي (3×3) مەن كيورلينگتەن جۇلدەگە تالاستى. بارلىق 4 قىسقى وليمپيادانى قوسا ەسەپتەگەندە, قازاقستان جەڭىپ العان مەدال سانى 8-گە جەتتى (1 التىن, 1 كۇمىس, 6 قولا). وڭتۇستىك كورەيادا قازاقستان قورجىنىنا العاشقى التىن مەدال ءتۇستى. تۋنيس پەن ءباا ەلىنىڭ سپورتشىلارى العاش رەت قىسقى جاسوسپىرىمدەر وليمپياداسىندا باق سىنادى. ولار 7 سپورت تۇرىنەن (15 باعدارلامادا) 81 جۇلدە جيىنتىعىن ساراپقا سالدى. كوش باسىندا 11 التىنى بار يتاليا تۇرسا, ودان كەيىن گەرمانيا جايعاستى. ەڭ كوپ جۇلدە العان مەملەكەت – اقش (21). كاننىندا برازيليا, تايلاند, تۇركيا مەن تۋنيس سپورتشىسى العاش رەت ءوز ەلىنە جۇلدە سىيلادى. كەشەندى جارىس 12 نىساندا ءوتتى. ونىڭ جەتەۋى 2018 جىلعى پحەنچحان وليمپياداسى كەزىندە سالىنعان.
سونىمەن, 2 اقپاندا كاننىن قالاسىنداعى «Youth Olympic Park» كەشەنىندە وتكەن جابىلۋ سالتاناتىندا ەلىمىزدىڭ كوك بايراعىن بەرىك بورانباەۆ پەن مەرەي تاستەمىر ۇستاپ شىقتى. 2028 جىلعى قىسقى ويىنداردى قابىلدايتىن ەل 2025 جىلى بەلگىلى بولادى. ال 2026 جىلى سەنەگالدا (داكار-2026) جازعى سپورت تۇرلەرىنەن جاسوسپىرىمدەر وليمپياداسى وتەدى.
