فوتو: ن.بايبۋلين.
ماۋلەن اشىمباەۆ قازىرگىدەي تەحنولوگيا زامانىندا كرەاتيۆتى يندۋستريانىڭ ەكونوميكالىق مۇمكىندىگى مەن كەلەشەگى زور ەكەنىن, مەملەكەت باسشىسى قاسىم-جومارت توقاەۆتىڭ تاپسىرماسىمەن قازاقستاندا وسى سالانى دامىتۋ باعىتىندا اۋقىمدى شارالار ىسكە اسىرىلىپ جاتقانىن اتاپ ءوتتى.
«پرەزيدەنتىمىز جولداۋىندا كرەاتيۆتى يندۋستريانى جانە زاماناۋي تەحنولوگيانى دامىتۋ جونىندە ناقتى مىندەتتەر جۇكتەدى. سونداي-اق مەملەكەت باسشىسى ءىرى قالالارمەن بىرگە اۋدانداردا دا شىعارماشىل جاستاردى قولداۋعا ارنالعان ورتالىقتار اشۋ قاجەت ەكەنىن ايتتى. سونىڭ شەڭبەرىندە وسىنداي حابتاردىڭ ماڭىزى زور. بۇل جەردە ءبىز كرەاتيۆتى الاڭداردىڭ جاي-كۇيىمەن, جۇمىسىمەن جانە الداعى جوسپارلارىمەن تانىسا الامىز. وزدەرىڭىزگە بەلگىلى, تاياۋدا كرەاتيۆتى سەكتور ءۇشىن سالىقتىق جەڭىلدىكتەر قاراستىرىلدى. وسىنداي ناقتى شارالار ەلىمىزدە بۇل سالانى دامىتۋعا تىڭ سەرپىن بەرەدى دەپ سەنەمىز», دەدى ماۋلەن اشىمباەۆ.
سونىمەن قاتار سەنات توراعاسى كرەاتيۆتى يندۋستريانىڭ جاعدايى ادامي كاپيتالدىڭ ساپاسىن كورسەتەتىن نەگىزگى فاكتورلاردىڭ ءبىرى ەكەنىن ايتتى. قازىرگى ۋاقىتتا كرەاتيۆتى سەكتوردىڭ ەل ەكونوميكاسىنداعى ۇلەسى 1 پايىزدان اسپايدى. وسى كورسەتكىشتى جاقسارتۋ ءۇشىن الداعى ۋاقىتتا اتالعان يندۋستريانى دامىتۋ جولىندا جان-جاقتى, ونىڭ ىشىندە, زاڭنامالىق باعىتتا دا بىرلەسكەن ءارى جۇيەلى جۇمىس قاجەت.
«بۇل باعىتتى ءتيىمدى دامىتۋ ءۇشىن سالالىق زاڭنامانى جەتىلدىرۋ دە اسا ماڭىزدى. وسىعان وراي دەپۋتاتتار ءتيىستى جۇمىستاردى اتقارىپ جاتىر. سونداي-اق قازىر كرەاتيۆتى يندۋستريا ءبىلىم بەرۋ ۇدەرىسىنىڭ دە اجىراماس بولشەگىنە اينالعانىن كورىپ وتىرمىز», دەدى سەنات توراعاسى.
ءىس-شاراعا مادەنيەت جانە اقپارات مينيسترلىگىنىڭ وكىلدەرى, كينورەجيسسەرلار, پروديۋسەرلەر, تەاتر اكتەرلەرى, سۋرەتشىلەر جانە باسقا دا ونەر قايراتكەرلەرى قاتىستى.
