اگروبانك: شارۋالارعا سەپتىگى تيسە يگى

قولداۋ جوق ەمەس

بىلتىر جەلتوقسان ايىنىڭ باسىندا پارلامەنتتىڭ قوس پا­لاتاسىنداعى دەپۋتاتتاردىڭ باسىم بولىگى ۇكىمەت, ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگى ال­دىنا ماسەلەنى توتەسىنەن قوي­دى. مۇندا رەسپۋب­ليكا بو­يىن­شا اگرو سالاداعى كوپ ماسەلەنى شەشۋدىڭ نەگىزگى جول­دارىنىڭ ءبىرى – مەملەكەتتىك اگرارلىق بانك قۇرۋ تۋرالى فەرمەرلەر مەن شارۋاشىلىق جەتەكشىلەرىنىڭ ءوتىنىشى تاعى دا قارالدى.

سونىمەن, سەڭ قايتا جۇر­گەن­دەي. پار­لامەنت دەپۋ­تات­تارىنىڭ, اسىرەسە «اۋىل» پار­تياسى پارلامەنتتىك فراك­تسيا­س­ىنىڭ تاباندىلىعىمەن ماسە­لە وڭ باعىتقا اۋىسقانداي. ءبىر جاق­­سىسى, بانككە قاتىستى ۇسى­نىل­­عان زاڭ جوباسىن قاراعان مەم­لەكەت­تىك ورگاندار ماسەلەنىڭ وڭ شەشىم تابۋىنا قارسى ەمەس. ەندى دەپۋتاتتار جولداعان ساۋالعا بەرىلگەن جاۋاپتىڭ ناعىز سۇبەلى­سىن سوزبە-ءسوز كەلتىرسەك.

اۋىل شارۋاشىلىعى ءمينيسترى اي­داربەك ساپاروۆ «...ەلدىڭ ازىق-ت ۇلىك قاۋىپسىزدىگىن قامتاماسىز ەتۋ ءۇشىن بانك­تىك كرەديت بەرۋ بولىگىندە اۋىل شارۋا­شىلىعىن قارجىلاندىرۋدى كەڭەيتۋدىڭ ماڭىزدىلىعىن نازارعا الا وتىرىپ, مينيسترلىك مۇددەلى مەملەكەتتىك ورگاندارمەن اگروبانك قۇرۋ ماسەلەسىن پىسىقتاۋدا, ونىڭ پىسىقتاۋ ناتيجەلەرى بويىنشا قوسىمشا حابارلاناتىن بولادى» دەسە, ۇلتتىق بانك توراعاسىنىڭ ورىنباسارى ۆيتالي تۋتۋشكين «ۇلتتىق بانك ۇلتتىق دامۋ ينستيتۋتى رەتىندە اگروبانك قۇرۋعا قارسى ەمەس» دەپ جاۋاپ بەرگەن. ال قارجى نارىعىن رەتتەۋ جانە دامىتۋ اگەنتتىگى توراعاسىنىڭ ورىنباسارى ولجاس قيزاتوۆ «..اگەنتتىك دەپۋتاتتار باستاماسىنا قارسى ەمەس جانە اۋىل شارۋاشىلىعى سالاسىن دامىتۋ ينستيتۋتى رەتىندە مەملەكەتتىك اگروبانك قۇرۋ مۇمكىن دەپ سانايدى» دەگەن ەدى.

ايتا كەتەيىك, بىزدە ەندى قولعا الىن­عان اگروبانك جان-جاقتاعى كورشىلەردە الدەقاشان پايدا بولعان. وزبەكتەردەن بولەك, رەسەي, بەلارۋس, قىتاي مەملە­كەتتەرىندە اشىلعان. مۇنداي بانك ەۋروپا ەلدەرىندە دە ازىق-ت ۇلىك قاۋىپسىزدىگىن قام­تاماسىز ەتۋ جولىندا تابىستى جۇ­مىس ىستەۋدە. ناتيجەسىندە, ءبىزدىڭ دۇكەن­دەر سورەسىندە ءوزىمىزدىڭ وتاندىق ءونىم­دى ىعىستىرعان وسى مەملەكەتتەردىڭ اۋىل شارۋاشىلىعى تاۋارلارىن ءجيى باي­قايتىنىمىز جاسىرىن ەمەس. وكىنىشتىسى دە وسى.

بانك باسىمدىعى نەدە؟

«اۋىل» حدپپ توراعاسى, ءماجىلىس دەپۋتاتى سەرىك ەگىزباەۆپەن تىلدەسكەنىمىزدە قۇرىلۋعا ءتيىس اگروبانك بىرنەشە ماقسات­تا جۇمىس جۇرگىزۋى كەرەك. سونىڭ ىشىندە نەگىزگىسى – اۋىل شارۋاشىلىعى سالاسىنا بەرىلىپ جاتقان قاراجاتتىڭ بىرنەشە ءتۇرىن وڭتايلاندىرۋ جانە ءبىر كوزدەن بەرۋ, سول ارقىلى قارجىنى دۇرىس باس­قا­رۋ, باسقارا وتىرىپ, ءارى كەتكەندە ەكى نە­مەسە ءۇش پايىزبەن شارۋالاردى نەسيە­لەندىرۋ.

– ەكىنشىدەن, بانكتىڭ فيليالدىق جەلىسىن دامىتۋ ارقىلى حالىقتىڭ, اۋىل­دا­عى كاسىپكەرلەر مەن فەرمەرلەردىڭ قو­لىندا جاتقان بوس اقشانى دەپوزيت, تاعى دا باسقا باعدارلامالار ارقى­لى اينالىمعا ەنگىزۋ كەرەك. سول ارقى­لى اۋىل شارۋاشىلىعى سالاسىنا بولى­نە­تىن قارجى كولەمىن ۇلعايتۋعا بولا­دى. سونداي-اق اگرارلىق بانكتى بىزدە­گى ەكىنشى دەڭگەيلى بانكتەر سياقتى كوم­مەر­تسيالىق ماقساتتا ەمەس, ەڭ الدىمەن, شا­رۋالار مۇددەسىنە جۇمىس ىستەتۋ قاجەت. ول ءۇشىن مەملەكەتتىڭ 100 پايىز اكتسيونەر بولماعانى دۇرىس. ونىڭ ءبىر بولىگىن اكتسيونەر رەتىندە شارۋالاردىڭ وزدەرى يە بولا الادى. تاعى ءبىر دۇنيە, كەپىلدىك ساياساتىن جەڭىلدەتۋ جانە كەپىلسىز نەسيە بەرۋ. قارجى ينستيتۋتى بانك رەتىندە جۇمىس ىستەگەننەن كەيىن ءار نەسيە الۋشىنىڭ ءوز ەسەپشوتى بولادى. ول ەسەپشوتتى, كەلگەن-كەتكەن قار­جىنى, ونىڭ ماقساتتى-ماقساتسىز باعى­تىن بانكتىڭ ءوزى قاداعالايدى. سول ارقىلى بانكتىڭ شوت يەسىنە دەگەن كوز­قاراسى قالىپتاسادى. جاڭا بانك اۋىل شارۋاشىلىعىمەن اينالىسا­تىن جاس كاسىپكەرلەرگە بەلگىلى ءبىر مولشەردە كەپىلسىز نەسيە الۋعا مۇمكىندىك بەرىپ جانە ۇلكەن نەسيەلەر بويىنشا كەپىلدىكتى جەڭىلدەتكەنى دۇرىس. قوسىمشا جيناقتاۋ جۇيەسىن ەنگىزىپ, اۋىل جاستارى وسى ارقىلى ءوز شوتتارىن اشسا, سوندا قارجىسىن جيناقتاپ, بەلگىلى ءبىر مولشەرگە جەتكىزگەن ۋاقىتتا ولاردى قاراجاتپەن قامتاماسىز ەتىپ, نەسيەلەندىرسە, ۇتارىمىز كوپ, – دەيدى دەپۋتات.

ونىڭ ايتۋىنشا, اگرارلىق بانك بۇرىن بولماعان جاڭا باعدارلامانى ىسكە قوسىپ, بيزنەسكە ارنالعان نىسانداردى, قۇرال-جابدىقتاردى وڭتايلى شارتتارمەن ليزينگكە بەرۋمەن اينالىسسا, تىپتەن جاقسى.

جوبا ءوز-ءوزىن اقتاي ما؟

اگروبانك بويىنشا ارنايى زاڭ قا­بىلداناتىن بولسا, الدىن الا قار­جى­لىق مودەلى جاسالدى ما؟ جوبا ءوزىن ءوزى اقتاي ما؟ وسىنداي سۇراقتار تۋاتىنى زاڭدىلىق.

راسىمەن, بۇل ءبىر كۇندە تۋا سالعان جالاڭ يدەيا ەمەس. سالا ماماندارى ارقى­ل­ى بىرنەشە جىل بويى زەرتتەلگەنى انىق. شەت مەملەكەتتەردىڭ بۇل باعىتتاعى تاجىريبەلەرى دە ساراپتالعان.

– قارجىلىق مودەل بويىنشا قىس­قا­شا ايتار بولساق, مۇندا بانك كليەنتتەرىنە نەسيە بەرۋدى قارجىلان­دىرۋ كوزدەرىندەگى نەگىزگى ۇلەسى (49-83%)  مەملەكەتكە تيەسىلى بولادى. اۋەلى اگروونەركاسىپتىك كەشەندى دامىتۋعا مەملەكەتتىك باعدارلامالار ارقىلى بولىنگەن قاراجاتتى پايدالانۋ كوزدەلگەن. مىسالى, العاشقى جىل­دارى كليەنتتەرگە نەسيە بەرۋ مەملەكەت­تىك رەسۋرستار ەسەبىنەن جۇزەگە اسسا, كەيىن­نەن مەملەكەتتىڭ قاتىسۋ ۇلەسى بىرتىن­دەپ تومەندەيتىن بولادى. بارلىق ارالىق­تاعى پايىزدىق كىرىستەردىڭ ورتاشا جىلدىق ءوسۋ قارقىنى جىلىنا 24,1 پايىز دەپ بولجانۋدا. كليەنتتەردى نەسيەلەندىرۋگە نارىقتا ۇسىنىلاتىن دەپوزيتتەر ارقىلى قاراجات تارتۋ, بورىشتىق باعالى قاعازدار شىعارۋ سىندى رەسۋرستار – بارلىق رەسۋرس كولەمىنىڭ 5-15 پايىز جانە رەسۋرستاردى نەسيەلەندىرۋگە جىبەرىلەتىن جەكە قاراجات (ۋاقىتشا بوس اقشا) بارلىق رەسۋرستار كولەمىنىڭ 5-35 پايىز كولەمىندە باعىتتالادى. اگروونەركاسىپتىك كەشەن شىعىندارىنىڭ ءبىر بولىگى نارىقتىق پايىزدىق مولشەرلەمەلەر مەن مەملەكەت­تىك باعدارلامالار شەڭبەرىندە قاراجات بەرىلەتىن مولشەرلەمەلەر اراسىنداعى ايىرما رەتىندە مەملەكەتتىك سۋبسيديالار تۇرىندە وتەۋدى دە كوزدەپ وتىر. بۇل جەردە پايىزدىق مولشەرلەمە 1,5-2,5 پايىزعا دەيىن سۋبسيديالانادى. ال قازىر جىل سايىنعى سۋبسيديالاۋ كولەمى 56 ملرد تەڭگەگە تەڭ, – دەيدى سەرىك ەگىزباەۆ.

ايتا كەتۋ كەرەك, اگرارلىق بانكتە مەكەمە نەسيە پورتفەلىنىڭ ۇلكەن ۇلەسىن باعدارلامالار شەڭبەرىندە نارىقتىق مولشەرلەمەلەردەن ەداۋىر تومەن پايىزبەن الاتىن بولعاندىقتان, ورتا ەسەپپەن نارىقتىق دەڭگەيدەن تومەن بولادى. ءبىر سوزبەن ايتقاندا, بانك ءوزىن ءوزى ءار ءتۇرلى ستسەناري بويىنشا 7-11 جىل ىشىندە اقتايدى.

اينالىمعا اقشا قايدان الىنادى؟

بۇگىندە ەلدەگى اگروونەركاسىپتىك كەشەندەردى «بايتەرەك» حولدينگىنىڭ ەنشىلەس قۇرىلىمدارى «اگرارلىق نەسيە كورپوراتسياسى» مەن «قازاگروقارجى» قارجىلاندىرادى. 2022 جىلى قارجى­لان­دىرۋعا باعىتتالعان 768,3 ملرد تەڭگەدەگى «بايتەرەكتىڭ» ەنشىلەس ۇيىم­دارىنىڭ ۇلەسى 522,3 ملرد, ال ەكىن­شى دەڭگەيدەگى بانكتەردىڭ ۇلەسى 246 ملرد تەڭگە بول­عان. 2014 جىلى قارجى­لاندىرۋعا باعىت­تالعان 612 ملرد تەڭ­گەنىڭ 451 ملرد تەڭگە­سى ەكىنشى دەڭگەي­لى بانكتەرگە, ال 161 ملرد تەڭگەسى «قازاگرو» قۇرىلىمدارىنا تيەسىلى بولىپتى. سالىستىرىپ قاراساق, سەكتوردى قارجىلاندىرۋداعى بانكتەر ۇلەسى 8 جىل ىشىندە ەكى ەسەگە قىسقارىپ, حولدينگتىكى ءۇش ەسەگە ۇلعايعان. بۇل جەردە ەكىنشى دەڭگەيلى بانكتەردىڭ اۋىل شارۋاشىلىعىنا قاتىستى جوبالارعا نەسيە بەرۋدى اسا قۇپتامايتىنى كوزگە كورىنىپ-اق تۇر. مىسالى, بىلتىر وسى بانكتەر 28 ترلن نەسيە بەرسە, ونىڭ ىشىن­دە اۋىل شارۋاشىلىعىنا قاتىستى كرە­ديتتەردىڭ ۇلەسى – 3,5 پايىز-اق. ال تۇ­­تىنۋشىلىق كرەديتتەر ۇلەسى 54 پايىز­عا جەتكەن. بۇل – فەرمەرلەر اينالىم قاراجاتىن تولىقتىرۋ ءۇشىن كوبىنە تۇ­ت­ىنۋشىلىق نەسيە الۋعا نەمەسە پايىز­دىق مولشەرلەمەسى 56 پايىزعا دەيىن جەتەتىن ميكروقارجى ۇيىمدارىنا جۇگىنۋگە ءماجبۇر دەگەن ءسوز.

ماماندار پىكىرىنشە, «بايتەرەك» حولدينگىنە قاراعاندا اگروبانك بۇل ماسەلەلەردى بانكارالىق نەسيەلەر, جەكە جانە زاڭدى تۇلعالاردىڭ دەپوزيتتەرى, كليەنتتەردىڭ شوتتارىنداعى قالدىقتار, ەكىنشى دەڭگەيلى بانكتەردە ۋاقىتشا ورنالاستىرىلاتىن مەملەكەتتىك باعدارلا­مالار قاراجاتى مەن ولار بويىنشا الى­نا­تىن, جىل سايىن جۇزدەگەن ميلليارد تەڭگە بولاتىن پايىزدىق كىرىستەر سياقتى بانكتىك تولەم كوزدەرى ارقىلى شەشە الادى. بانكتىڭ جارعىلىق كاپيتالىن تو­لىقتىرۋدىڭ تاعى ءبىر كوزى – بانك اكتسيالارىن باعا ۇسىنىستارىن العاننان كەيىن بيرجاعا شىعارۋ. وسىلار­دى ەسكەرسەك, جاڭا بانكتىڭ بىرنەشە قار­جىلاندىرۋ كو­زى بولادى دەپ ايتۋعا تولىق نەگىز بار.  

پىكىرلەر توعىسى

ساراپشىلاردىڭ سوزىنشە, جوعارىدا ايتقانداي, جاڭا سالالىق بانك قۇرۋ ءۇشىن وزگە ەلدەردىڭ تاجىريبەسىن ءبىر زەردەلەپ الۋ كەرەك. مىرزاحمەت وكسىكباەۆتىڭ پىكىرىنشە, اگروبانكتىڭ قۇرىلۋى شا­رۋا­­لاردىڭ جۇمىسىن ايتارلىقتاي جەڭىل­دەتەدى.

– قازىر حالىقتىڭ 46 پايىزى اۋىل­دا تۇراتىنىن, مال مەن ەگىن شارۋا­شى­­لىعىمەن اينالىساتىن نەگىزگى قۇرىلىم­دار سوندا ەكەنىن ەسكەرسەك, اگروبانك قۇ­رى­لۋعا ءتيىس. ال بانك قۇرىلسا, ونداعى كا­سىپ­كەرلەردىڭ ءبارى سول جەردە ەسەپشوت اشا­رى انىق. ونداعى اقشا اينالىمىن كورىپ وتىرعان بانك تە سەنىم ءبىلدىرىپ, كەپىلسىز نە كەپىلدىك بويىنشا تالاپتارىن جەڭىلدەتىپ, نەسيە بەرەتىنى بەلگىلى. سونداي-اق اۋىلداعى زەينەتكەرلەر مەن بيۋدجەتتىك مەكەمەلەردەن جالاقى الاتىن ازاماتتاردىڭ تاپقان تابىسى وسى بانك ارقىلى بەرىلسە, ونداعى قارجى اينالىمى دا بەلگىلى ءبىر پايىزعا ارتاتىنى ءسوزسىز. ەڭ نەگىزگىسى, «اگرارلىق نەسيە كورپوراتسياسى», «قازاگروقارجى» جانە باسقا قارجى ينستيتۋتتارىنىڭ باسىن بىرىكتىرىپ, مەملەكەتتەن جىل سايىن ءبولىنىپ جاتقان اقشانى توپتاستىرىپ, مەملەكەتتىڭ قاتىسۋىمەن اگروبانك اشۋ وتە ءتيىمدى. تاعى ءبىر ايتاتىن نار­سە, قا­زىر نەسيە بەرەتىن ۇيىم كوپ. بىراق ولار شا­رۋا مۇددەسىن ويلامايدى. كەرى­سىنشە, سولاردىڭ ەسەبىنەن تابىس تابۋدى كوزدەيدى. قۇجات راسىمدەۋگە دە ۋاقىت كوپ كەتەدى. ءوزىڭىز بىلەسىز, اۋىلداعى شارۋالار مۇنى دايىن­داۋدا ءسۇرىنىپ جاتادى. ونىڭ ۇستىنە نەسيە بەرەتىن ۇيىمدار 25-30 قۇجاتتىڭ تىزبەگىن بەرىپ, اۋرەگە سالىپ جاتادى. مەنىڭشە, قازىرگى تسيفرلاندىرۋ زامانىندا جاڭاشىلدىققا, وزىق تا­جى­­ريبەگە نەگىزدەلگەن سالالىق بانك قۇ­رىل­­سا, حالىققا سول ۇنامدى بولادى. مى­سا­لى, قازىر كاسپي بانكتىڭ تسيفرلىق قىز­­مەتى ەلىمىزدە جاقسى دامىعان ەمەس پە؟ – دەيدى اۋىل شارۋاشىلىعى ساراپشىسى.

الماتى وبلىسى, ۇيعىر اۋدانىنا قاراستى اۆات اۋىلىندا تۇراتىن ارمي­دين تايروۆ 1995 جىلدان بەرى ءوز شارۋا قوجالىعىن جۇرگىزىپ كەلەدى. «يلتيز» اتتى قوجالىقتىڭ باستى كاسىبى – باق ءوسىرۋ. 2000 جىلدان بەرى قاراي 10 گەكتار جەرگە ورىك جانە ءتۇرلى سۇرىپتاعى الما كو­شەتتەرىن وتىرعىزىپتى. العاشقى جىل­دارى قارجىدان قينالعان ول «ەلدە تەك اۋىل شارۋاشىلىعىنا قولداۋ بىلدى­رەتىن بانك بولسا», دەپ ارمانداعانىن جاسىرمادى.

– اگروبانك ماسەلەسىنە كەلسەك, مۇنى مەن عانا ەمەس, ەلدىڭ ءار تۇپكىرىندەگى شا­رۋا­شىلىق يەلەرى قوس قولىن كوتە­رىپ قولدايدى. كەزىندە ءبىز كوشەت الۋعا اقشا تاپپاي, قارىز ىزدەپ سەندەلگەن ۋا­قىتىمىز بولدى. قازىر دە وڭاي ەمەس. مىسالى, «اگرارلىق نەسيە كورپورا­تسياسى» اق ارقىلى نەسيەگە ۇمتىلعانىڭمەن ولاردىڭ كوپ قۇجات تالاپ ەتۋى, شارۋالاردىڭ ءارى-بەرى شاپقىلاپ, بىرنەشە مارتە ءىس-قاعازداردى تولىقتىرىپ ءجۇرىپ, قارجىعا ازەر قول جەتكىزەتىنىڭ وتىرىك ەمەس. وسىنىڭ اراسىندا 4-5 اي, ءتىپتى جارتى جىلعا دەيىن ۋاقىت كەتەدى. ەكىنشى دەڭگەيلى بانك­تەر شارۋاشىلىقتارعا نەسيە بەرۋگە, ءتىپتى قۇشتار ەمەس. ولار ءبىزدىڭ سالاداعى قۇرعاقشىلىق, مال اۋرۋلارى, سونداي-اق قىستاعى ايازدان جەمىس باقتارىنىڭ ءۇسۋى سياقتى مىڭ سان ماسەلەدەن قورقادى, ياعني بەرىلگەن نەسيە وتەلمەيدى دەپ ويلايدى. ال اگروبانك قۇرىلىپ, بارلىق اۋدان ورتالىقتارىندا بولىمشەلەرى اشىلسا جانە قۇجاتتاردى جيناقتاۋدا بەلگىلى ءبىر جۇيەگە كەلسە, نەسيە الۋ شارتتارى جەڭىلدەپ, قارجى قارالۋ ۋاقىتى تىم قىسقا بولسا, وندا ءسوز جوق, مال مەن ەگىن ءوسىرىپ, ودان ءونىم الىپ وتىرعان شارۋاشىلىقتار جۇمىسى جانداناتىنى ءسوزسىز, – دەيدى توراعا.

ا.تايروۆتىڭ ايتۋىنشا, بۇل مۇمكىن­دىك سىرتتان كەلەتىن اۋىل شارۋاشىلىعى ونىمدەرىنە دە ۇلكەن تەجەۋ. سونداي-اق بار­لىق شارۋاشىلىق جۇرگىزىپ وتىرعان ازاماتتار جاڭا زاماناۋي تەحنولوگيامەن جۇمىس ىستەگىسى كەلەدى. ال بۇعان قارجى قول­بايلاۋ. سالاعا قاتىستى جەكە بانك قۇ­رىلسا, كۇرمەۋلى ماسەلە شەشىمىن تابارى انىق. قىزىلوردا وبلىسىنداعى «اگرو وركەن» جشس ديرەكتورى مەدەۋ ەس­قو­جاەۆ تا جاڭا بانك قۇرىلسا, اۋىل شارۋا­شىلىعىنا تىڭ سەرپىن بەرەتىنىن ايتتى.

– اۋىل – قالانىڭ اسىراۋشىسى دەسەك, مۇندايدا ەلدى مەكەندەردەگى مال مەن ەگىن شارۋاشىلىعىندا جۇرگەن شاعىن قوجالىقتارعا باسا نازار اۋدارعان ءجون. سالاعا باعىتتالعان جەكە قارجى ۇيىمى پايدا بولسا, ونى دامىتىپ جۇرگەن ازاماتتار ارزان پايىزبەن نەسيە راسىمدەپ, شارۋاشىلىعىن العا سۇيرەيدى. تەحنيكا پاركىن جاڭارتىپ, اسىل تۇقىمدى مال ءوسىرۋ, استىقتىڭ جاڭا سۇرىپتارىنا قول جەتكىزۋ, ت.ب. مۇمكىندىكتەرگە جول اشىلادى. اسىرەسە سۋ تاپشىلىعىن ءجيى كورەتىن وڭتۇستىك ايماقتاردا تامشىلاتىپ نە جاڭبىرلاتىپ سۋارۋعا قاجەتتى جابدىقتاردى الۋعا قارجى جەتىسپەيتىنى جاسىرىن ەمەس, – دەيدى ول.

بىزدەگى بارلىق اگروونەركاسىپتىك كەشەن سۋبەكتىسىنىڭ 70 پايىزى – شاعىن جانە ورتا دەڭگەيدەگى شارۋا قوجالىق­تارى. كوبىنە قارجىلاندىرۋسىز جانە قولداۋسىز قالاتىن دا – ءدال وسى كونتينگەنت. اگروبانك جۇمىس ىستەگەن كەزدە بۇل ماسەلەلەردىڭ بارلىعى ەسكەرىلۋگە ءتيىس.

اگروبانك قارجى نارىعى­نىڭ زاماناۋي جەتىستىكتەرىن ەسكەرە وتى­رىپ, فەرمەرلەر ءۇشىن بەلگىلى ءبىر پور­تال جانە قىزمەتتەردىڭ بارلىق ءتۇرى – كرەديتتەر, كونسۋلتاتسيالار, بانكينگ, قارجىلىق ينۆەستيتسيالار, نارىقتىق شولۋ مەن زەرتتەۋ ناتيجەلەرىن, مونيتورينگ جانە ت.ب. قاجەتتىنى الا الاتىن بانك بولۋعا ءتيىس. جاڭا بانكتىڭ تاعى ءبىر ماقساتى – شارۋاعا نەسيە بەرۋ عانا ەمەس, قارجىلىق ساۋاتتى فەرمەر, تابىستى جانە وزىنە سەنىمدى كاسىپكەر تاربيەلەۋ. سونىمەن, سەڭ قوزعالدى, سەن دە قوزعال, قازاق شارۋاسى!