فوتو: تۋريزم جانە سپورت مينيسترلىگىنىڭ ءباسپاسوز قىزمەتى
2023 جىلى ازەربايجاننىڭ باس شاھارى – باكۋدە وتكەن نىسانا كوزدەۋدەن 53-ءشى ليتسەنزيالىق الەم چەمپيوناتىندا وتانداسىمىز ەرلەر اراسىندا 10 مەترگە پنەۆماتيكالىق مىلتىقتان اتۋ جاتتىعۋىندا 206,5 ۇپايمەن 4-ورىن الىپ, وليمپيادا ليتسەنزياسىنا يە بولعان ەدى.
يسلام ساتباەۆ 1998 جىلدىڭ 21 قىركۇيەگىندە الماتى قالاسىندا دۇنيەگە كەلگەن. نىسانا كوزدەۋ سپورتىمەن 7-سىنىپتان بەرى اينالىسىپ كەلەدى. مەكتەپ قابىرعاسىندا جۇرگەندە سىنىپتاسى وعان تير اتىپ كورۋدى ۇسىنعان. سودان باستاپ ونىڭ وق اتۋعا دەگەن قىزىعۋشىلىعى ويانىپ, بىردەن نىسانا كوزدەۋ ۇيىرمەسىنە جازىلادى. العاشقى جاتتىقتىرۋشىسى ۆالەنتينا دەريگلازوۆانىڭ ءتالىم-تاربيەسىمەن اتالعان سپورتتىڭ قىر-سىرىنا قانىعا باستايدى. ەڭبەك سىڭىرگەن جاتتىقتىرۋشى 5 جىل بويى ونى بالالار سپورت مەكتەبىندە جاتتىقتىرعان.
كەيىن يسلام ساتباەۆ مامانداندىرىلعان جوعارى سپورت شەبەرلىگى مەكتەبىنە اۋىسىپ, كۇنى بۇگىنگە دەيىن ەڭبەك سىڭىرگەن جاتتىقتىرۋشى گەننادي ناسونوۆتان جاتتىعىپ كەلەدى.
جەرلەسىمىز 2023 جىلعى الەم كۋبوگىندە ەكى مارتە كۇمىس جۇلدە جەڭىپ السا, قىتايدىڭ حانچجوۋ قالاسىندا وتكەن ازيا ويىندارىندا قولا مەدالدى موينىندا جارقىراتتى.
پاريج وليمپياداسىنا جولداما جەڭىپ العانان كەيىن ول العاشقى اسەرىن تۋعان-تۋىستارىمەن بولىسكەن. ولار تەلەديدار ارقىلى تاماشالاپ, ليتسەنزيا ولجالاعانىن سپورتشىنىڭ وزىنەن بۇرىن بىلگەن. قازىرگى ۋاقىتتا يسلام ساتباەۆ جەكە جاتتىقتىرۋشىسىمەن بىرگە تورتجىلدىقتىڭ باستى دوداسىنا قارقىندى دايىندالىپ جاتىر.
«مەنىڭشە, پەر كۋبەرتەننىڭ «ەڭ باستىسى – جەڭىس ەمەس, ويىندارعا قاتىسۋ» دەگەن ۇرانى ەسكىردى. وليمپياداعا قاتىساتىن كەز كەلگەن سپورتشى مەدال ولجالاعاسى كەلەدى. مەن دە ءدال سولاي ويلايمىن. بىراق وليمپيادادا ءساتتى ونەر كورسەتۋ ءۇشىن سپورتشى ناعىز سپورتتىق بابىندا بولۋى كەرەك. ول ءۇشىن دايىندىقتى ءبىر ساتكە دە توقتاتپاي, ۇنەمى شەبەرلىگىڭدى شىڭداپ وتىرۋعا ءتيىس», دەيدى يسلام ساتباەۆ.
