قازىرگى ەلەكتروندى تەستىلەۋدە تالاپكەرلەردىڭ جيناعان ۇپايلارى تەستىلەۋ سوڭىندا ەكرانعا شىعارىلادى. سوندا كورسەتىلگەن قورىتىندىسىمەن كەلىسپەگەن جاعدايدا تەستىلەنۋشى سول مەزەتتە اپەللياتسياعا بەرە الادى. اپەللياتسياعا بەرۋگە تەست ناتيجەلەرىندەگى سۇراقتاردىڭ مازمۇنىنا نەمەسە تەحنيكالىق كەمشىلىكتەرگە قاتىستى ماسەلەلەر سەبەپ بولۋى مۇمكىن. سۇراقتاردىڭ مازمۇنى بويىنشا اپەللياتسيا تەستىلەۋ اياقتالعاننان كەيىنگى العاشقى 30 مينۋتتا بەرىلەدى. اپەللياتسيا دالەلدى تۇسىنىكتەمەمەن نەگىزدەلۋى كەرەك. ال ەگەر تەستىلەنۋشى دۇرىس جاۋاپتى تابۋعا كەدەرگى كەلتىرەتىن تاپسىرما شارتتارىندا فراگمەنتتىڭ ء(ماتىن, سحەما, سىزبالار, كەستەلەر) جوقتىعىن انىقتاسا, تەحنيكالىق سەبەپتەر بويىنشا اپەللياتسياعا بەرۋى قاجەت.
ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ اتالعان ماسەلەگە قاتىستى: «اپەللياتسيانى تەك قىزىق كورىپ نەمەسە قوسىمشا ۇپايلارعا ۇمىتتەنىپ, ءتيىستى نەگىزدەمەسىز بەرۋگە بولمايتىنىن اتاپ وتكەن ءجون. اپەللياتسيا سۇراقتاردىڭ نەمەسە جاۋاپتاردىڭ سايكەس كەلمەۋى, سونداي-اق تەحنيكالىق سەبەپتەر بويىنشا عانا بەرىلۋى كەرەك. اپەللياتسيالىق سۇراقتاردىڭ بارلىعىن رەسپۋبليكالىق اپەللياتسيالىق كوميسسيا 30 جۇمىس كۇنى ىشىندە قارايدى», دەپ تۇسىنىكتەمە بەردى.
تەستىلەنۋشى سەرتيفيكاتىن اپەللياتسيالىق شاعىم تۋرالى شەشىم قابىلدانعاننان كەيىن جەكە كابينەتىنەن كورە الادى.
ەسكە سالا كەتەيىك, قاڭتار ايىنداعى ۇبت باستالعاننان بەرى 53 مىڭنان اسا ادام تەست تاپسىردى. ونىڭ ىشىندە تالاپكەرلەردىڭ 73,6%-ى قازاق تىلىندە, 26,3%-ى ورىس تىلىندە, 35 ادام اعىلشىن تىلىندە تەستىلەۋدەن ءوتتى. شەكتى ۇپايدى 73%-عا جۋىق تالاپكەر جينادى. ورتاشا ۇپاي 65-ءتى, ەڭ جوعارى ۇپاي 134-ءتى قۇرادى. تەستكە قاتىسۋشىلاردىڭ باسىم بولىگى «ماتەماتيكا-فيزيكا» جانە «بيولوگيا-حيميا», «ماتەماتيكا-ينفورماتيكا» باعىتىن تاڭداعان. ەڭ از تاڭدالعانى «حيميا-فيزيكا» باعىتى بولىپ تۇر.
ورتالىق باسشىسى ر.ەمەلباەۆتىڭ ايتۋىنشا, 63 ەرەجە بۇزۋشىلىق انىقتالعان. ونىڭ ىشىندە 43 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 20 ادام شىعارىلىپ, ولاردىڭ ناتيجەلەرى جويىلدى. بوگدە تۇلعالار بولعان جوق.
ايتپاقشى, ەرەكشە ءبىلىم بەرۋ قاجەتتىلىكتەرى بار تالاپكەرلەرگە دە تەستىلەۋدى وزگە زامانداستارىمەن بىردەي تاپسىرۋعا جاعداي جاسالعان. مىسالى, قاڭتارداعى ۇبت-نى ءدال وسىنداي 158 تالاپكەر تاپسىرىپتى.
2024 جىلعى ۇبت اياقتالعاننان كەيىن بيىلعى قازان ايىنىڭ سوڭىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلاتىنىن اتاپ وتكەن ءجون.
