فوتو: ا.بايجۇمانوۆ
اتالمىش قۇجات ءبىلىم بەرۋ جانە جەتىم بالالاردىڭ قۇقىقتارىن قورعاۋ سالاسىنداعى زاڭنامانى جەتىلدىرۋگە باعىتتالعان.
زاڭ مەكتەپتەردە ۇيالى تەلەفونداردى پايدالانۋ قاعيدالارىن بەكىتۋدى, بالاباقشاعا ورىن بەرۋدىڭ بىرىڭعاي كەزەگىن قامتاماسىز ەتۋدى, تالىمگەرلىك ينستيتۋتىن رەتتەۋ جونىندەگى نورمالاردى, سونداي-اق ءبىلىم بەرۋ ۇيىمدارىندا زورلىق-زومبىلىقتى ناسيحاتتايتىن جانە سۋيتسيدكە يتەرمەلەيتىن اقپاراتتىڭ تارالۋىنا جول بەرمەۋ جونىندە شارالار قابىلداۋدى كوزدەيدى.
سونىمەن قاتار بالالار قاۋىپسىزدىگىن قامتاماسىز ەتۋ ماقساتىندا بالالاردىڭ تەرەزەنى اشۋىنا كەدەرگى كەلتىرەتىن ارنايى تەتىكتەردى مىندەتتى تۇردە ورناتۋ جونىندە زاڭنامالىق تالاپتار بەلگىلەنەدى, سونداي-اق مەكتەپ, بالاباقشا مەن اۋرۋحانالار قۇرىلىسىن ەسكەرمەي كوپقاباتتى تۇرعىن ءۇي سالۋعا تىيىم سالىنادى.
سەناتورلاردىڭ ايتۋىنشا, زاڭنىڭ قابىلدانۋى ءبىلىم بەرۋدى رەتتەۋدىڭ ۇلتتىق جۇيەسىنىڭ تيىمدىلىگىن ودان ءارى كۇشەيتۋگە جانە ءبىلىم بەرۋ ۇيىمدارىنداعى جەتىم بالالار مەن اتا-اناسىنىڭ قامقورلىعىنسىز قالعان بالالارعا جەكە قولداۋ كورسەتۋگە ىقپال ەتەدى.
كوميتەت مۇشەلەرى تالقىلاۋ قورىتىندىسى بويىنشا زاڭدى پالاتا وتىرىسىندا قاراۋعا جىبەرۋ تۋرالى شەشىم قابىلدادى.
