ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇيىمداستىرۋىمەن قۇرىلعان ارنايى كوميسسيا 4-24 قاڭتار ارالىعىندا تەرگەۋ جۇرگىزدى. اتالعان كەزەڭ ىشىندە توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتى توراعاسىنىڭ ورىنباسارى مۇسا تاناباەۆتىڭ توراعالىعىمەن كوميسسيا مۇشەلەرى جوبالىق قۇجاتتامانى زەردەلەپ, تەرگەۋگە 4 ساراپتامالىق ۇيىمدى, ونىڭ ىشىندە رەسەي فەدەراتسياسىنىڭ ساراپشىسىن تارتقان. ماماندار التىن ءوندىرۋشى كاسىپورىننىڭ كۋاگەرلەرى مەن لاۋازىمدى تۇلعالارى اراسىندا ساۋالناما جۇرگىزدى. سونىمەن قاتار كوميسسيا مۇشەلەرى شاحتاعا ءتۇسىپ, وقيعا ورنىن زەرتتەدى.
ء«بىزدىڭ كوميسسيا جان-جاقتى تەرگەۋ جۇرگىزە وتىرىپ, بارلىق جايتتى نازارعا الدى. كوميسسيا تاۋ-كەن ماسساسىنىڭ قۇلاۋى سالدارىنان ورىن العان توپتىق جازاتايىم وقيعانىڭ سەبەپتەرى رەتىندە كەلەسىلەردى اتايدى:
– جۇمىس ءوندىرىسى قاناعاتتانارلىقسىز دەڭگەيدە ۇيىمداستىرىلعان;
«مايقايىڭالتىن» اق جاۋاپتى تۇلعالارى تاراپىنان تاۋ-كەن جۇمىستارىنىڭ قاۋىپسىز جۇرگىزىلۋىنە وندىرىستىك باقىلاۋ ءتيىستى تۇردە جۇزەگە اسىرىلماعان;
– بلوكتاردى وڭدەۋ كەزىندە قازبالاردىڭ قۇلاۋ ۇدەرىسىن باقىلاۋ تيىسىنشە جۇزەگە اسىرىلماعان دەگەن قورىتىندىعا كەلدى.
سونىمەن قاتار شاحتا ۇستىندەگى بوس كەڭىستىكتەرگە ءتيىستى باقىلاۋ جۇرگىزىلمەگەنى, جوبالىق قۇجاتتاماعا سايكەس ازىرلەنگەن تازارتۋ كەڭىستىگىندەگى بوس جەرلەردىڭ قۇلاۋ ىقتيمالدىلىعى بار ەكەنى نازارعا الىنباعانى انىقتالدى. وسىنىڭ سالدارىنان كەنەتتەن تاۋ ماسساسى قۇلاپ, جازاتايىم وقيعا ورىن العان», دەپ حابارلادى توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتى پاۆلودار وبلىسى بويىنشا دەپارتامەنتىنىڭ باسشىسى دانيار انداسوۆ.
تەرگەۋ ناتيجەلەرى بويىنشا كوميسسيا مۇشەلەرى جازاتايىم وقيعانىڭ سەبەپتەرىن جويۋ جونىندەگى ءىس-شارالاردى جانە ولاردىڭ ورىندالۋ مەرزىمدەرىن ايقىندادى. ونىڭ ىشىندە شاحتا ديرەكتورىنىڭ, باس ينجەنەردىڭ, باس ماركشەيدەردىڭ, ۋچاسكەلىك ماركشەيدەرلەردىڭ لاۋازىمدىق نۇسقاۋلىقتارى ونەركاسىپتىك قاۋىپسىزدىك سالاسىنداعى زاڭنامانىڭ تالاپتارىن ەسكەرە وتىرىپ, قايتا قارالماق.
د.انداسوۆتىڭ ايتۋىنشا, بۇدان باسقا تاۋ-كەن قازبالارىنىڭ ونەركاسىپتىك قاۋىپسىزدىك تالاپتارىنا سايكەستىگىنە ەگجەي-تەگجەي تەكسەرۋ جۇرگىزىلەدى. قۇلاۋى مۇمكىن ايماقتاردى جانە قاۋىپسىزدىك نورمالارىن قامتاماسىز ەتۋدى ەسكەرە وتىرىپ, اۆتوكولىك قوزعالىسىنىڭ مارشرۋتتارى دا ازىرلەنەدى.
كوميسسيا شەشىمى بويىنشا, توپتىق جازاتايىم وقيعانىڭ ورىن الۋىنا كىنالى رەتىندە 7 ادام جاۋاپتى دەپ تانىلىپ وتىر. ەڭبەك زاڭناماسىنا سايكەس تەرگەۋ ماتەريالدارى قۇقىق قورعاۋ ورگاندارىنا جىبەرىلدى.
اپات بولعان جەردە اۆاريالىق-قۇتقارۋ جۇمىستارى وقيعا ورىن العان ساتتەن باستاپ ۇدايى جۇرگىزىلىپ جاتىر. بۇعان دەيىن ويىق تۇبىنە شاعىن ەكسكاۆاتور ءتۇسىرىلىپ, گەولوگيالىق سكانەر ارقىلى بەلگىلەنگەن جەرلەردى قازۋ جۇمىستارى جالعاسىپ جاتىر.
«قازىرگى ۋاقىتتا قۇتقارۋشىلار ەكسكاۆاتوردىڭ جولىنا بوگەۋ بولىپ تۇرعان سالماعى 5 توننادان اساتىن اسا ءىرى ەمەس تاستاردى پنەۆمو-ەلەكتر قۇرالدارىنىڭ كومەگىمەن الىپ تاستاپ جاتىر. قۇتقارۋشىلار اۋىر جاعدايدا جۇمىس ىستەۋدە. ويىق شەتىندەگى توپىراقتىڭ تومەن سىرعۋى ءالى دە جالعاسىپ جاتىر. بارلىق جۇمىسقا 147 ادام, 45 تەحنيكا جۇمىلدىرىلعان», دەيدى پاۆلودار وبلىسى توتەنشە جاعدايلار دەپارتامەنتى باستىعىنىڭ ورىنباسارى ولەگ ترەششەۆ.
قۇتقارۋشىلاردىڭ سوزىنە سۇيەنسەك, شۇڭقىردىڭ استىندا بوس كەڭىستىكتەر بار. جۇمىس ىستەپ جاتقاندار كەز كەلگەن ساتتە الگى ويىقتارعا ءتۇسىپ كەتۋى ابدەن مۇمكىن. سوندىقتان قۇتقارۋشىلار اسا ساقتىقپەن قيمىلداپ جاتىر.
ايتپاقشى, جەر استىنا ءتۇسىپ كەتكەن قۇتقارۋشىلاردى ىزدەۋگە ايگۇل ەسىمدى كورىپكەلدىڭ مايقايىڭعا كەلگەنى تۋرالى اقپار تاراعان ەدى. توتەنشە جاعداي دەپارتامەنتى بالگەردى تابىلماي جاتقان ازاماتتاردىڭ تۋىستارى شاقىرتقانىن حابارلادى.
«توتەنشە جاعدايلار دەپارتامەنتىنىڭ بۇل كورىپكەلدىڭ كەلۋىنە ەشقانداي قاتىسى جوق, قايعىلى وقيعا ورنىنا ىزدەلىپ جاتقان قۇتقارۋشىلاردىڭ تۋىستارى شاقىرتقان. ولاردىڭ بۇل ارەكەتىنە ەشقانداي ۆەدومستۆو كەدەرگى كەلتىرە المايدى. كورىپكەل ايەل تۋىستارىمەن بىرگە ويىقتان قاۋىپسىز اراقاشىقتىقتا تۇردى. قۇتقارۋشىلار جۇرگىزىپ جاتقان ىزدەستىرۋ-قۇتقارۋ جۇمىستارىنا جاقىنداعان جوق. توتەنشە جاعداي ماماندارى مەن وزگە دە ماماندار نۇسقاۋلىققا سايكەس جۇمىس ىستەپ جاتىر. جۇمىستا توپىراقتىڭ قوزعالۋىن سكانەرلەيتىن تەحنيكا, گەولوگيالىق سكانەر جانە مەتالل ىزدەگىش قولدانىلعان. سونداي-اق ويىقتىڭ تۇبىندە كينولوگيالىق توپ ىزدەستىرۋ شارالارىن جۇرگىزىپ جاتىر. جۇمىس باعىتىمىز ارنايى اسپاپتاردىڭ كورسەتكىشتەرى نەگىزىندە تۇزەتىلىپ وتىرادى», دەپ حابارلادى وڭىرلىك توتەنشە جاعدايلار دەپارتامەنتىنىڭ ءباسپاسوز قىزمەتىنەن.
پاۆلودار وبلىسى,
باياناۋىل اۋدانى,
مايقايىڭ كەنتى
