اشىلعاننان باستاپ بىرنەشە اي ۋاقىت ىشىندە ورتالىقتا 400-گە جۋىق بالا ەم الىپ شىقتى. ونىڭ ىشىندە 52 بالا ەمىن-ەركىن جۇرە باستاسا, 29-ى سويلەي باستاعان. ورتالىقتا تاجىريبەلى نەۆروپاتولوگتەر, وڭالتۋ دارىگەرلەرى, جاتتىعۋ تەراپياسىنىڭ نۇسقاۋشىلارى, پسيحولوگتەر, لوگوپەدتەر مەن رەابيليتولوگ ماماندار جۇمىس ىستەيدى. تسەرەبرالدى سال اۋرۋى, اۋتيزم جانە دامۋدىڭ كەشەۋىلدەۋى بار بالالار رەابيليتاتسيا مەن وڭالتۋدان وتەدى. بۇگىندە ورتالىق ايىنا – 50, جىلىنا 600 بالانى قابىلدايدى. اۋرۋحانا ديرەكتورىنىڭ مەديتسينالىق ءبولىم بويىنشا ورىنباسارى نينا دەركاچتىڭ اۋرۋحانانىڭ جاڭا عيماراتقا كوشۋى وڭالتۋ ورتالىعىنىڭ اشىلۋىنا مۇمكىندىك بەرگەنىن ايتادى.
– جاڭا عيماراتقا كوشكەنگە دەيىن بىزدە وڭالتۋ ورتالىعى بولعان جوق. وسى جەردە وسىنداي ماڭىزدى قىزمەتتى ىسكە قوستىق. ەرتە ارالاسۋ ورتالىعىندا 3 ايدان 3 جاسقا دەيىنگى بالالار كومەك الادى. وڭالتۋ ورتالىعىنا 18 جاسقا دەيىنگى بالالار قابىلدانادى. تۇز شاحتاسى, شۋنگيت بولمەسى, سەنسورلىق بولمە, تولىعىمەن جابدىقتالعان ەمدىك-دەنە شىنىقتىرۋ كابينەتتەرى جۇمىس ىستەپ تۇر. كىشكەنتايلار ءۇشىن «پوسەيدون» يممەرسيالىق ۆانناسى بار. قازىردىڭ وزىندە ناتيجەلەر جامان ەمەس. اتا-انالار دا ريزا بولىپ قايتادى, – دەيدى نينا گريگورەۆنا.
مۇندا تۇراقتى تۇردە وڭالتۋ كۋرسىن الاتىندار كەلەدى. ەم-دومىن تولىق قابىلداپ العان سوڭ, اراعا بىرنەشە اي سالىپ, جولدامامەن قايتا كەلە الادى. الىس اۋدانداردان كەلگەندەر تاۋلىكتىك ستاتسيوناردا بولسا, قالا باسىنان كەلگەندەر كۇندىز كەلىپ تۇرادى. بىرەگەي ورتالىق وسىنداي مۇمكىندىكتى ويلاستىرىپ قويعان.
ەرەكشە بالانىڭ اناسى سىمبات بەكماعامبەتوۆا وسىمەن ەكىنشى رەت كەلىپ, وڭالتۋ كۋرسىنان ءوتىپ جاتىر.
– بۇعان دەيىن باسقا جەرلەردە بولدىق. بىراق مۇنداعى مامانداردىڭ بالاعا دەگەن قارىم-قاتىناسى ەرەكشە. بالاعا جانى اشىپ تۇرادى. سودان دا بولار, ناتيجە دە بار, – دەيدى ول.
ارتەم ەسىمدى بالانىڭ اناسى انيا دا ورتالىققا ەكىنشى رەت كەلىپ, ەم-دوم شارالارىن قابىلداپ جاتىر.
– ءبىز وسىمەن ەكىنشى رەت كەلدىك. مولودەجنىي كەنتىنەنبىز. وسىندا كەلگەلى بالام وزدىگىنەن تۇرا الاتىن بولدى. بىرنەشە سەكۋند بولسا دا, بۇل – ءبىز ءۇشىن ۇلكەن جەتىستىك. ءبىر جاسىندا رەانيماتسياعا ءتۇسىپ, دامۋ ۇدەرىسى تەجەلگەن ەدى. قازىر ءبارىن قايتادان ۇيرەنىپ جاتىرمىز, – دەيدى انيا.
باستىسى, بىرەگەي ورتالىقتا اقش, گەرمانيا, ۇلىبريتانيا, رەسەي جانە قازاقستان وندىرگەن ەڭ زاماناۋي مەديتسينالىق وڭالتۋ جانە دياگنوستيكالىق جابدىقتار بار. مۇنى «سامۇرىق-قازىنا» جانە «قازاقستان حالقىنا» قورلارى جەتكىزگەن. وتكەن اپتادا سول قوردىڭ وكىلدەرى ورتالىقتىڭ جۇمىسىمەن تانىسقان ەدى. ءبىزدىڭ وڭىردەگى ورتالىق قور اتسالىسقان 35-نىسان ەكەن.
– «سامۇرىق-قازىنا» قورى 2020 جىلدان بەرى ەرەكشە بالالاردى وڭالتۋدان وتكىزەتىن ورتالىقتارعا قارجىلاي قولداۋ كورسەتىپ كەلەدى. ءۇش جىل ىشىندە ءبىز قازاقستاندا ينكليۋزيۆتى قوعامدى دامىتۋعا باعىتتالعان 15 وڭالتۋ, 14 ەرتە ارالاسۋ جانە ءاۋتيزمى بار بالالارعا ارنالعان 5 ورتالىقتىڭ تۇساۋىن كەستىك. وسى جىلدار ىشىندە 40 مىڭعا جۋىق بالا وڭالتۋدان ءوتتى, – دەيدى «Samruk-Kazyna Trust» قورىنىڭ باسشىسى الفيا اديەۆا.
الداعى ۋاقىتتا قاراعاندى وبلىسىندا تاعى ءبىر وڭالتۋ ورتالىعى, 4 اۋىلدا انگارلىق تيپتەگى سپورت كەشەنىن اشۋ جوسپارى بار ەكەن. مۇنداي يگىلىكتى حابارمەن «قازاقستان حالقىنا» قايىرىمدىلىق قورىنىڭ باسقارما توراعاسىنىڭ ورىنباسارى ءلاززات شىڭعىسباەۆا ءبولىستى.
– پرەزيدەنت وڭالتۋ قىزمەتى قولجەتىمدى بولۋىن تاپسىردى. ەكى جىلدىڭ ىشىندە «قازاقستان حالقىنا» قايىرىمدىلىق قورى قاراعاندى وبلىسىندا جالپى سوماسى 11 ملرد تەڭگە بولاتىن 23 جوبانى جۇزەگە اسىردى, – دەدى ول.
وسى ورايدا وبلىس اكىمىنىڭ ورىنباسارى ەرمەك الپىسوۆ تاعى ءبىر ورتالىقتىڭ اشىلاتىنىنان حاباردار ەتتى.
– قازىرگى ۋاقىتتا ەرتە ارالاسۋ ورتالىعى جۇيەلى جۇمىس ىستەپ تۇر. ەندى 18 جاسقا دەيىنگى بالالارعا ارنالعان وڭالتۋ ورتالىعى اشىلادى. ماماندارىمىزدى ۇيرەتكەن, وسىنداي زاماناۋي قۇرال-جابدىقتارمەن قامتاماسىز ەتكەن «Samruk-Kazyna Trust», «قازاقستان حالقىنا», «قامقورلىق» قورلارىنا العىس ايتامىز. مۇنداي الەۋمەتتىك جوبا بالقاش, شاحتينسك قالالارىندا دا جالعاسىن تابادى دەپ ويلايمىن, – دەدى ە.الپىسوۆ.
وسىلايشا ايماعىمىزدا ەرەكشە بالالارعا جاسالىپ جاتقان قامقورلىق ايتارلىقتاي-اق. تاجىريبەلى ماماندار مەن اتا-انالاردىڭ بىرلەسە اتقارعان جۇمىسىنىڭ ناتيجەسى بالانىڭ دامۋىنا زور ىقپال ەتە الادى.
قاراعاندى وبلىسى
