كوللاجدى جاساعان – زاۋرەش سماعۇل, «EQ»
باعدارلاما «وتباسى بانك» اق ارقىلى ەلوردادا باستاپقى نەمەسە قايتالاما نارىقتا پاتەر ساتىپ الۋعا مۇمكىندىك بەرەدى. وتىنىمدەردى قابىلداۋ ەلەكتروندى تۇردە birge.astana.kz پورتالى ارقىلى جۇزەگە اسىرىلادى. الايدا بانك نەبارى 80 نەسيە عانا بەرەدى. شارت بويىنشا قارىزدىڭ ەڭ جوعارى سوماسى – 18 ملن تەڭگە. باستاپقى جارنا – 10, قارىز بويىنشا مولشەرلەمە – جىلدىق 5 پايىز. ال نەسيەلەۋ مەرزىمى – 25 جىلعا دەيىن.
«قاتىسۋشى استانا قالاسىندا كەم دەگەندە كەيىنگى ءبىر جىل ىشىندە تۇراقتى تىركەۋدە بولۋى قاجەت. ءارى ءوتىنىش بەرۋ ساتىندەگى قاتىسۋشىنىڭ تاڭدالعان سالاداعى رەسمي جۇمىس ءوتىلى كەيىنگى ءبىر جىلدان كەم بولماۋعا ءتيىس. «وتباسى بانكىندە» ساتىپ الاتىن باسپانا قۇنىنىڭ 10 پايىزى, ياعني 1 ملن 800 مىڭ تەڭگە العاشقى جارناسى بار دەپوزيتى بولۋى كەرەك. ءوز اتىندا باسپاناسى بارلار باعدارلاماعا قاتىسا المايدى. ياعني باعدارلاماعا قاتىسۋشىنىڭ جانە ونىڭ وتباسى مۇشەلەرىنىڭ قازاقستان اۋماعى بويىنشا كەيىنگى 5 (بەس) جىل ىشىندە ساتىپ الۋ قۇقىعىمەن جالعا بەرىلەتىن تۇرعىن ءۇيدىڭ, ساتىپ الۋ قۇقىعىنسىز جالعا بەرىلەتىن تۇرعىن ءۇيدىڭ نەمەسە مەنشىك قۇقىعىمەن تۇرعىن ءۇيدىڭ (ەرلى-زايىپتىلاردىڭ ورتاق بىرلەسكەن مەنشىگى, وتىنىشكە ەنگىزىلەتىن وتباسىنىڭ باسقا مۇشەلەرىمەن بىرلەسىپ ورتاق ۇلەستىك مەنشىك) بولماۋى ماڭىزدى. وتباسىنىڭ ءاربىر مۇشەسىنە كەيىنگى 6 اي ءۇشىن ەڭبەك نەمەسە كاسىپكەرلىك قىزمەتتەن (زەينەتاقى اۋدارىمدارىن, جەكە تابىس سالىعىن جانە وزگە دە مىندەتتى اۋدارىمداردى ەسەپكە الماعاندا) ەڭ تومەنگى كۇنكورىس دەڭگەيىنىڭ 6 ەسەلەنگەن شاماسىنا دەيىنگى كىرىسىنىڭ بولۋى (260 442 تەڭگە) دا ەسكەرىلەدى», دەدى استانا قالاسى اكىمدىگى ءباسپاسوز حاتشىسى اقمارال ولجاباەۆا.
قاتىسۋشىلاردى ىرىكتەۋ ەڭ جوعارى بالدان ەڭ تومەن بالعا ەسەپتەۋدى پايدالانا وتىرىپ جۇرگىزىلمەكشى. ماسەلەن, تاڭدالعان سالاداعى جۇمىس ءوتىلىنىڭ تولىق 1 جىلى – 5 بالل, تولىق ەمەس جىلى – 3 بالل. ەسكەرە كەتەتىنى, ءوتىنىش بەرۋشىدە نەمەسە جولداسى نەمەسە جۇبايىندا I, II, III توپتاعى نەمەسە بالالاردا مۇگەدەكتىكتىڭ بولۋىنا 10 بالل قوسىلادى.
