قولدانىستاعى كيىم نىساندارى مەملەكەت باسشىسىنىڭ تاپسىرماسى بويىنشا مۇددەلى مەملەكەتتىك ورگاندارمەن بىرلەسىپ قايتا وڭدەلدى. وتكەن جىلعى 12 جەلتوقساندا پرەزيدەنتتىڭ 2011 جىلعى 25 تامىزداعى «قازاقستان رەسپۋبليكاسى قارۋلى كۇشتەرىنىڭ, باسقا دا اسكەرلەرى مەن اسكەري قۇرىلىمدارىنىڭ اسكەري قىزمەتشىلەرىنىڭ اسكەري كيىم نىسانى مەن ايىرىم بەلگىلەرى تۋرالى» جارلىعىنا وزگەرىستەر ەنگىزىلدى.
اسكەري قىزمەتشىلەر قاراكول جاعالى قىسقى كۇرتەنىڭ ورنىنا «الياسكا» ءتيپتى كۇرتەلەر كيەدى. جوعارى وفيتسەرلىك قۇرامنان وزگە اسكەري قىزمەتشىلەردىڭ باس كيىمدەرى كۇنقاعارسىز بولادى. ماۋسىمدىق كۇندەلىكتى پلاشش كامۋفلياج ءتۇستى دالالىق كۇرتەشەگە, ال كۇندەلىكتى سۆيتەر دالالىق سۆيتەرگە اۋىستىرىلدى. اسكەري قىزمەتشى ايەلدەر ءۇشىن پيلوتكانىڭ ورنىنا كەپي قاراستىرىلعان.
جوعارى وفيتسەرلىك قۇرامنان, قورعانىس مينيسترلىگى مەن باس شتابتىڭ قۇرىلىمدىق بولىمشەلەرىنىڭ, قارۋلى كۇشتەر باس باسقارمالارىنىڭ باستىقتارىنان, باس قولباسشىلاردان, قولباسشىلاردان جانە ولاردىڭ ورىنباسارلارىنان وزگە اسكەري قىزمەتشىلەردىڭ بارلىق ساناتى ءۇشىن كيتەل, شالبار, جەيدەلەر, گالستۋكتار الىنىپ تاستالدى.
كەڭسەلىك كيىم نىسانى تەك باسقارۋ ورگاندارى, جوعارى وقۋ ورىندارىنىڭ تۇراقتى قۇرامى, اسكەري ءبولىم كومانديرلەرى, ولاردىڭ ورىنباسارلارى جانە اسكەري قاتىناستار كومەنداتۋرالارى ءۇشىن كۇندەلىكتى كيىم ۇلگىسى بولىپ ايقىندالادى. قارا ءتۇستى قونىشى ۇزىن باتەڭكەمەن قاتار تۇراقتى قۇرامعا ارنالعان قۇم ءتۇستى جازعى باتەڭكەمەن قامتاماسىز ەتۋ دە قاراستىرىلعان. بۇل نۇسقا ەلىمىزدىڭ گەوگرافيالىق ەرەكشەلىكتەرىنە, سونداي-اق ىستىق وتكىزبەيتىن جانە بۇركەمەلەۋ قاسيەتتەرىنە بايلانىستى.
جاڭا ۇلگىدەگى دالالىق كيىم-كەشەككە كوشۋ 2024 جىلدىڭ ءتورتىنشى توقسانىنا, قالعان كيىمدەرگە كوشۋدى ءۇش جىل ىشىندە جۇزەگە اسىرۋ جوسپارلانعان.
