عاسىر جاساعان كەيۋانا قاراعاندى وبلىسى وساكاروۆ اۋدانىندا تۇرادى. 1943 جىلى 18 جاسىندا ۆورونەج وبلىسىنان 2-ۋكراينا مايدانىنىڭ 65-ەۆاكۋاتسيالىق اۋرۋحاناسىنا جىبەرىلگەن جاس مەدبيكە مايدان دالاسىنان جەتكىزىلگەن جارالىلاردى ورنالاستىرۋ, دارىگەرلەرگە وپەراتسيا كەزىندە ينە سالۋعا جانە تاڭۋعا, ءدارى-دارمەكتەر تاراتۋ, ءتىپتى اراسىندا ەدەن جۋ, پەش جىلىتۋ, كيىم جۋ سەكىلدى ىستەردە قولعابىس ەتكەن. ونىڭ مەيىرىمدىلىگى مەن سەنىمدىلىگىنىڭ, تاباندىلىعىنىڭ ارقاسىندا ءتىرى قالۋدان ءۇمىتى از جارالىلار دا تەز وڭالىپ, اياققا تۇرعان. اۋىر جارالانعاندارعا جىلى سوزىمەن دەمەۋ بولا بىلگەن.
– شەكسىز مەيىرىمىڭىز, ادال ەڭبەگىڭىز بەن قاجىماس قايراتىڭىز ءۇشىن سىزگە العىس ايتامىز. ءسىز ءجۇرىپ وتكەن ءومىر جولى – ناعىز ءپاتريوتيزمنىڭ, جانقيارلىق پەن ومىرگە دەگەن سۇيىسپەنشىلىكتىڭ ۇلگىسى, – دەدى وساكاروۆ اۋدانى قورعانىس ىستەرى ءبولىمىنىڭ باسشىسى, مايور ۆلاديمير گەرەگا.
اننا كوتوۆا جەڭىستەن ءبىر جىل وتكەن سوڭ عانا ەلگە ورالدى. 1977 جىلى زەينەتكە شىققانعا دەيىن ول وساكاروۆتاعى دەنساۋلىق ساقتاۋ مەكەمەلەرىندە جۇمىس ىستەدى. ارداگەر انا وزىنە ارنايى كوڭىل ءبولىپ كەلگەندەرى جانە جىلى لەبىزدەرى ءۇشىن اسكەري قىزمەتشىلەرگە العىس ايتتى. «تۋعان جەردى كوزدىڭ قاراشىعىنداي قورعاپ, قاستەرلەي بىلىڭدەر! ەلىمىزدە تىنىشتىق پەن بەرەكە-بىرلىك بولسىن», دەگەن ىزگى تىلەگىن دە جەتكىزدى.
اننا نيكانوروۆنا داڭقتى ەڭبەگى ءۇشىن II دارەجەلى وتان سوعىسى وردەنىمەن, «1941-1945 جىلداردا ۇلى وتان سوعىسىنداعى گەرمانيانى جەڭگەنى ءۇشىن», «ۋكراينانىڭ فاشيستىك باسقىنشىلاردان ازات ەتىلگەنىنە 60 جىل» مەدالدارىمەن, «سانيتارلىق قىزمەتتىڭ ۇزدىگى» بەلگىسىمەن ماراپاتتالعان.
