جازۋشى قالامىنان تۋعان «تايگا تولعاۋى», ء«ور التاي, مەن قايتەيىن بيىگىڭدى», «مۇنار تاۋدى, مۇزارت شىڭدى اڭسايمىن», «ەرتە تۇسكەن بوزىقراۋ», «قۇتمەكەن», تاعى دا باسقا كوپتەگەن تۋىندى قازاق ادەبيەتىندە وزىندىك ورنىمەن ايشىقتالىپ, وقىرمان قاۋىم تاراپىنان باياعىدا-اق لايىقتى باعاسىن العان.
جيھانكەز جازۋشى التايدىڭ اردا تابيعاتىمەن عانا تىلدەسكەن جوق, سوناۋ افريكا, ياكۋتيا ەلدەرىنە بارعان ساپارلارى تۋرالى سافاري جانرىنداعى جاۋھار تۋىندىلار دا وقىرمان قاۋىمنىڭ تانىمىن كەڭەيتكەن.
بۇگىنگى ادەبي شاراعا ۇلكەن نارىن, سولونوۆكا, كوكباستاۋ, بالعىن مەن كوكتەرەك اۋىلدارىنىڭ ونەرپازدارى قاتىسىپ, باقتارىن سىنادى. جينالعان جۇرت اۋەلى الىبەك اسقاروۆتىڭ شىعارماشىلىعىنان سىر شەرتەتىن شاعىن كورمەنى تاماشالادى.
جيىندا ءسوز العان كاتونقاراعاي اۋدانى اكىمىنىڭ ورىنباسارى رادجان ءىلياسوۆ ادەبيەتسۇيەر قاۋىمدى قۇتتىقتاپ, سايىسقا تۇسكەلى تۇرعان شەبەرلەرگە ساتتىلىك تىلەدى. سونداي-اق بەلگىلى اقىن, قازاقستان جازۋشىلار وداعىنىڭ استانا قالالىق فيليالىنىڭ توراعاسى داۋلەتكەرەي كاپ ۇلىنىڭ جولداعان قۇتتىقتاۋ حاتىن وقىدى.
بايقاۋ ستسەناري بويىنشا ءۇش بولىمنەن تۇردى. «التاي جىرشىسى» دەپ اتالعان ءبىرىنشى بولىمدە قاتىسۋشىلار الىبەك اسقاروۆتىڭ سافاري جانرىنداعى تۋىندىلارىنان ۇزىندىلەرىن جاتقا وقىپ, سايىستى. بۇل كەزەڭدە كوكباستاۋ, ۇلكەن نارىن, سولونوۆكا اۋىلدارى ونەرپازدارىنىڭ ونەرى كورەرمەننىڭ كوڭىلىنەن شىقتى. اسىرەسە ۇلكەن نارىن اۋىلدىق ليتسەيىنىڭ ۇستازى ايگەرىم ساعيتقانقىزىنىڭ بايقاۋعا دايىندىعى, ساحناداعى ونەرى كوپشىلىكتى ءتانتى ەتتى. ول «اجال تاۋى» شىعارماسىنان ازىرلەگەن كولەمدى ءۇزىندىسىن ءبىر مۇدىرمەي مانەرلەپ جاتقا وقىعاندا, قالىڭ كوپشىلىك شىتىرمان شىعارما ىشىنە ەنىپ كەتكەندەي بولدى.
ەكىنشى كەزەڭ ء«ور التاي, مەن قايتەيىن بيىگىڭدى» دەپ اتالدى. مۇندا سايىسكەرلەر جازۋشىنىڭ وقىرمان جىلى قابىلداعان سان تاعدىرلى اۋىل كەيىپكەرلەرىنىڭ وبرازىنا ەندى. اسىرەسە ق.داميتوۆ اتىنداعى ورتا مەكتەبى ۇستازدارىنىڭ ونەرلەرىنە ۇزاق قول سوقتى. ساحنالىق مادەنيەت, ارتىستىك قابىلەت, كەيىپكەرلەر وبرازىن اشۋ, ساحنالىق دەكوراتسيا, ءبارى دە وزدەرىنە جاراسىمدى بولىپ تۇردى.
«ايەل پاراساتى» دەپ اتالاتىن بايقاۋدىڭ سوڭعى كەزەڭىندە قاتىسۋشىلارى ساحنالىق كورىنىس ارقىلى جازۋشى شىعارمالارىنداعى قازاق ايەلىنىڭ ءومىرى مەن سان قيلى تاعدىرىن, اسىل قاسيەتتەرىن كورەرمەنگە جەتكىزۋگە تىرىستى. بۇل بولىمدە ءار قاتىسۋشى ۇلكەن جاۋاپكەرشىلىكپەن دايىندالعاندارىن كورسەتتى.
قازىلار القاسىنىڭ ءتورايىمى جانار سىدىقوۆا بايقاۋدىڭ ۇيىمداستىرۋشىلارى مەن بارلىق قاتىسۋشىلارىنا العىسىن ايتىپ, ءىس-شارانىڭ جوعارى دەڭگەيدە وتكەندىگىن, سايىسكەرلەردىڭ كورەرمەنگە ادەمى ونەر كەشىن تارتۋ ەتكەندىگىن اتاپ ءوتتى. بايقاۋ قورىتىندىسى بويىنشا الىبەك اسقاروۆ وقۋلارىندا جۇلدەلى ءۇشىنشى ورىندى ۇلكەن نارىن اۋىلدىق ليتسەيى يەلەنسە, ەكىنشى ورىن كاتونقاراعاي اگرارلىق-تەحنيكالىق كوللەدجىنە بۇيىردى. ءبىرىنشى ورىندى كوكباستاۋ مەن سولونوۆكا اۋىلدارىنىڭ ونەرپازدارى ەنشىلەدى. ال باس جۇلدەگە قازىلار القاسى ءبىراۋىزدان ق.داميتوۆ اتىنداعى ورتا مەكتەپتىڭ وقۋشىلارى لايىق دەپ تانىلدى. بايقاۋدا جەڭىمپاز اتانىپ, جۇلدەگە يە بولعان ونەرپازدار ديپلوم جانە ەستەلىك سىيلىقتارمەن ماراپاتتالدى.
ۇلكەن نارىن اۋداندىق ءماسليحاتى توراعاسى جانار سىدىقوۆانىڭ تورايىمدىلىق ەتكەن قازىلار القاسىنىڭ قۇرامىندا كاتونقاراعاي اۋداندىق جاستار رەسرۋستىق ورتالىعىنىڭ ديرەكتورى اياۋلىم قابدۋاليەۆا, تىلدەر ورتالىعىنىڭ ديرەكتورى الەم سۇلەيمەنوۆا, كىتاپحانا ارداگەرى كۇلباعيلا قۇرمانوۆا مەن اۋداندىق دوستىق ءۇيىنىڭ ادىسكەرى انار مانياروۆا بولدى.
ايتا كەتەيىك, الىبەك وقۋلارى كاتونقاراعاي اۋدانىنىڭ باسقا دا اۋىلدارىندا ۇيىمداستىرىلىپ, كوركەمسوز وقۋدىڭ شەبەرلەرى انىقتالىپ جاتتى.
شىعىس قازاقستان وبلىسى,
كاتونقاراعاي اۋدانى
