فوتو: kolesa.kz
قىستىڭ كۇنى قاز قاتار تىزىلگەن كولىكتەردى اۋلادا قىزدىرىپ تۇرعان جۇرگىزۋشىلەردى ءجيى بايقايمىز. اسىلىندا اۋلادا توقتاپ تۇرعان كولىكتى قىزدىرۋ زاڭ اياسىندا قالاي رەتتەلەدى؟
قر «جول ءجۇرىسى» تۋرالى زاڭنىڭ 17 بولىگى, 2-تارماعىندا توقتاپ تۇرعان كولىكتى تۇرعىن ءۇي اۋلالارىندا قىزدىرۋعا تىيىم سالىنسا, 12-تارماعىندا: «بۇل تۇرعىندارعا قولايسىزدىق تۋدىراتىن بولسا, ەلدى مەكەندەردە قوزعالتقىشتى قوسىپ قويىپ تۇراقتاۋعا تىيىم سالىنعان», دەپ جازىلعان. الايدا جۇرگىزۋشىلەر مەن پاترۋلدىك پوليتسيا بۇل ەرەجەنى ەسكەرە بەرمەيدى.
ەرەجە بويىنشا كولىك بەلگىلى ءبىر سەبەپتەرگە بايلانىستى 5 مينۋتتان اسا قوزعالتقىشى قوسۋلى كۇيدە ايالداسا, وسى ۋاقىت شەگىنەن اسسا ونىڭ تۇراقتا تۇرعانىن بىلدىرەدى. ەگەر سىز كولىگىڭىزدى وتالدىرىپ, ول قىزعانشا ۇيگە كىرىپ كەتسەڭىز بۇل ەرەجەنى بۇزۋ بولىپ سانالادى.
ال كولىكتى قىزدىرۋ قاجەت پە دەگەن تارتىسقا توقتالساق, ماماندار ديزەل وتىندى پايدالاناتىن كولىكتى مىندەتتى تۇردە قىزدىرۋ قاجەت دەپ ەسەپتەيدى. ال قىزدىرۋ ۋاقىتىن سىرتتاعى اۋا تەمپەراتۋراسىنا قاراي باعامداۋ كەرەك.
+5 - 0 گرادۋس اراسىنداعى اۋا تەمپەراتۋراسى كەزىندە كولىكتى 1 مينۋت قىزدىرۋ جەتكىلىكتى.
ال كۇن رايى 0, - 10 گرادۋس بولسا قوزعالتقىشتىڭ قىزۋىنا 2 مينۋت بولگەن دۇرىس.
-10, - 20 گرادۋس ايازدا اۆتوكولىكتى 5 مينۋت شاماسىندا قىزدىرۋ ۇسىنىلادى.
اۋا تەمپەراتۋراسى - 20 گرادۋستان جوعارى بولسا كولىكتى 7-10 مينۋتقا دەيىن قىزدىرۋ قاجەت.
العاشقى توپتىڭ پىكىرىنشە كولىكتى قىزدىرۋ ونىڭ ۇزاق ءارى سەنىمدى قىزمەت ەتۋىنە, توك تسيركۋلياتسياسىنىڭ قالىپقا كەلۋىنە سەپتەسىپ, قاۋىپسىز قيمىلداۋعا سەنىم ارتادى دەگەن ۇستانىمدا.
ال كولىكتىڭ قىزعانىن كۇتۋدىڭ قاجەتى جوق دەپ سانايتىن توپ كۇن سايىن تىزگىنگە وتىرىپ, كولىكتى قوزعالتقاندا العاشىندا جىلدامدىقتى اسىرماي ايداپ, باعدارشامعا توقتاعاندا, كەپتەلىستە تۇرعاندا-اق ماشينا قىزادى دەپ ەسەپتەيدى. بۇل توپتىڭ پىكىرىنشە قوزعالتقىش قالىپتى تەمپەراتۋراعا تۇسكەندە عانا جىلدامدىقتى قوسۋعا بولادى.
ەكولوگتار كولىكتى قىزدىرۋ پروتسەسى اۋا ساپاسىنىڭ ايتارلىقتاي ناشارلاۋىنا اكەلىپ سوعاتىنىن ايتىپ دابىل قاعادى. وسى قاعيدا نەگىزىندە گەرمانيا, اقش-تىڭ 31 شتاتىندا ت.ب. مەملەكەتتەردە كولىكتى قىزدىرۋعا تىيىم سالىنعان. الايدا الىپ اقش-تىڭ ايماقتارىنداعى كليماتتىق ەرەكشەلىكتەر نەگىزىندە قاعيدا قۇبىلىپ تۇر.
ال ايازدا وتالماي قالعان كولىكتى ىسكە قوسۋدىڭ شىعىنسىز ءارى ەڭ وڭاي نۇسقالارىن مىنا سىلتەمەگە ءوتىپ بىلە الاسىزدار.
