قۋاتتاۋدى قاجەت ەتپەيتىن يادرولىق باتارەيا جاساپ شىققان قىتايدىڭ «Betavolt» كومپانياسى اتالعان ونىمىنە «ماڭگىلىك باتارەيا» دەپ ايدار تاعىپتى. كومپانيانىڭ حابارلاۋىنشا, بۇل – الەم تاريحىنداعى اتوم ەنەرگياسىن پايدالاناتىن تۇڭعىش كىشكەنتاي باتارەيا. «63 يادرولىق يزوتوپ قولدانىلعان Betavolt اتوم ەنەرگەتيكالىق باتارەيالارى اەروعارىش, جاساندى ينتەللەكت جابدىقتارى, مەديتسينالىق قۇرال-جابدىقتار, ميكروپروتسەسسورلار, جەتىلدىرىلگەن داتچيكتەر, شاعىن ۇشقىشسىز ۇشۋ اپپاراتتارى, سەنسورلار مەن ميكروروبوتتار سياقتى ونىمدەرگە ۇزاقمەرزىمدى ەنەرگيانى بەرە الادى», دەلىنگەن كومپانيانىڭ ءباسپاسوز حابارلاماسىندا.
باتارەيا العاش رەت حح عاسىردا زەرتتەلگەن ۇدەرىس نەگىزىندە يزوتوپتاردىڭ ىدىراۋىنان بولىنەتىن ەنەرگيانى ەلەكتر ەنەرگياسىنا اينالدىرۋ ارقىلى جۇمىس ىستەيدى. كەڭەس وداعى مەن اقش عالىمدارى عارىش اپپاراتتارىندا, سۋاستى جۇيەلەرىندە جانە قاشىقتاعى عىلىمي ستانسالاردا پايدالانۋ تەحنولوگياسىن جاساي الدى, بىراق تەرمويادرولىق باتارەيالار قىمبات ءارى كولەمدى بولدى. يادرولىق باتارەيالاردى مينياتيۋريزاتسيالاۋ (ىڭعايلى كولەمگە كەلتىرىپ كىشىرەيتۋ) جانە كوممەرتسيالاندىرۋ 2021-2025 جىلدارى ەلدىڭ ەكونوميكاسىن نىعايتۋعا باعىتتالعان قىتايدىڭ 14-ءشى بەسجىلدىق جوسپارى اياسىندا جۇزەگە اسىرىلدى. اقش پەن ەۋروپاداعى عىلىمي زەرتتەۋ ينستيتۋتتارى دا وسىنداي ءونىمدى ازىرلەپ جاتىر. ال ءبىرىنشى بولىپ جاساعان قىتايلىق «Betavolt» كومپانياسى ۇسىنعان باتارەيا كولەمى 15x15x5 تەكشە ميلليمەتردى قۇرايدى, 100 ميكروۆاتت قۋات پەن 3 ۆ بەرە الادى ءارى –60-تان 120°C-قا دەيىنگى تەمپەراتۋرادا جۇمىس ىستەيدى.
كومپانيا باتارەيالاردىڭ قاۋىپسىزدىگىنە قاتىستى: «Betavolt ازىرلەگەن اتوم ەنەرگەتيكالىق باتارەياسى مۇلدەم قاۋىپسىز, سىرتقى ساۋلەلەنۋى جوق جانە ادام اعزاسىنداعى كارديوستيمۋلياتورلار, جاساندى جۇرەكتەر سياقتى مەديتسينالىق قۇرىلعىلاردا قولدانۋعا جارامدى. ءبىزدىڭ باتارەيالار قورشاعان ورتاعا زيانسىز. ىدىراۋ كەزەڭىنەن كەيىن يزوتوپتاردىڭ 63-ءى تۇراقتى مىس يزوتوپىنا اينالادى, بۇل راديواكتيۆتى ەمەس جانە ەشقانداي قاۋىپ توندىرمەيدى نەمەسە قورشاعان ورتانى لاستامايدى», دەپتى.
يادرولىق باتارەيا قۋاتتاۋدى, سونداي-اق قانداي دا ءبىر تەحنيكالىق قىزمەت كورسەتۋدى قاجەت ەتپەستەن 50 جىل بويى قۋات بەرۋگە قاۋقارلى. كومپانيا جاڭا ءونىمدى تەستىلەۋدەن وتكىزىپ ۇلگەردى. ەندى الداعى ۋاقىتتا تەلەفوندار مەن درونداردا پايدالانۋ ءۇشىن ساتۋعا شىعارماق. 2025 جىلعا قاراي كومپانيا قۋاتى 1 ۆاتت باتارەيا جاساۋدى جوسپارلاپ وتىر.
