باستاپقى كەزدەسۋىندە جارىستىڭ ءبىرىنشى راكەتكاسى, يتاليالىق فەدەريكو چينانى ۇتىپ, سەنساتسيا جاساعان 16 جاسار تەننيسشى ەكىنشى اينالىمدا ۇلىبريتانيالىق ۆيكتور فريدريحپەن شەبەرلىك بايقاستى. ءبىرىنشى پارتيادا ۇلىبريتانيالىق 6:3 ەسەبىمەن باسىمدىق تانىتتى. ەكىنشى سەتتە تاي-برەيكتە ءامىر ءساتتى وينادى – 7:6 (8:6). شەشۋشى, ءۇشىنشى پارتيادا ءا.ومارحانوۆ ماتچتى تاعى ءبىر برەيكپەن تۇيىندەدى – 6:3. تارتىستى ماتچ 2 ساعات 13 مينۋتقا سوزىلدى. قاراعاندى تەننيس مەكتەبىنىڭ تۇلەگى شيرەك فينالعا شىعۋ ءۇشىن دودانىڭ 14-راكەتكاسى, وڭتۇستىككورەيالىق حيون كيممەن تالاسادى.
قىزدار اراسىندا 17 جاسار اسىلجان ارىستانبەكوۆا اۋستراليالىق تاليا كوكينيسكە جول بەرىپ, العاشقى اينالىمنان اسا المادى.
ەسەسىنە ءامىر ومارحانوۆ پەن اسىلجان ارىستانبەكوۆا جۇپتىق سىندا دودانى جەڭىسپەن باستادى. ءا.ومارحانوۆ وڭتۇستىككورەيالىق چاندجۋن كيممەن بىرگە ەكىنشى اينالىمعا شىقتى. ولار باستاپقى كەزدەسۋىندە يسپانيالىق يزان ۆالەنتينە/نيدەرلاندتىق تەيس بوگاردتى قاپى قالدىردى – 6:3, 7:5.
ومارحانوۆ پەن كيم ءبىر-ءبىرىن جاقسى بىلەدى. ەندى ەكى تەننيسشى جەكەلەي سىندا ءۇشىنشى اينالىمدا ءوزارا ءبىر-بىرىمەن كەزدەسەدى. وسىعان دەيىن ەكەۋى ءبىر رەت شەبەرلىك بايقاسىپ, وندا ءامىر جەڭگەن ەدى. ال اسىلجان ارىستانبەكوۆا بەلورۋسسيالىق يۋليا پەرەپيحينامەن بىرگە اۋستراليالىقتار رەني الەيم/الانا ءسيباسيچتى 6:1, 6:3 ەسەبىمەن ۇتىپ, ەكىنشى اينالىمعا ءوتتى.
