رىباكينا ەكىنشى ماتچىن دۇنيەجۇزىلىك رەيتينگىدە 57-ورىندا تۇرعان رەسەيلىك اننا بلينكوۆامەن وتكىزدى. وسىعان دەيىن قوس قارسىلاس 2017 جىلى سانكت-پەتەربۋرگتە وتكەن تۋرنيردە كەزدەسىپ, وندا رەسەيلىك سپورتشى 5:7, 6:2, 6:3 ەسەبىمەن جەڭگەن ەدى.
بۇل جولى ءبىرىنشى پارتيادا ەسەپ 1:1 بولعان مەزەتتە بلينكوۆا برەيك جاساپ, سول باسىمدىعىن ساقتاپ قالدى – 6:4. ەكىنشى سەتتە دە رەسەيلىك تەننيسشى برەيكپەن العا كەتتى – 2:1. دەگەنمەن ءوز ويىنىن تابا باستاعان رىباكينا تارازى باسىن تەڭەستىردى – 2:2. ارتىنشا تاعى ءبىر برەيكپەن ءتامامدادى – 6:4.
ءۇشىنشى, شەشۋشى پارتيادا رىباكينا بوساڭسىعان ءساتتى قالت جىبەرمەگەن بلينكوۆا تاعى العا شىققانىمەن (3:1) جەرلەسىمىز ەسەپتى تەڭەستىرە الدى – 4:4. بلينكوۆا قايىرا برەيك جاساپ, ماتچقا دوپ بەرگەندە, ەسەپ قايتا تەڭەستى – 5:5.
ەسەپ 6:5 بولعان مەزەتتە رەسەيلىك سپورتشى ەكى ماتچبولىن ءمۇلت جىبەردى. ەسەسىنە جارتى ساعاتتان استام ۋاقىتقا سوزىلعان تاي-برەيكتە رىباكينا سەگىز ماتچبولىن پايدالانا المادى – 6:7 (20:22). 2 ساعات 46 مينۋتقا سوزىلعان اسا تارتىستى باسەكە بارىسىندا ە.رىباكينا 9 ەيس جاساپ, 8 برەيك-پوينتتىڭ بەسەۋىن ءمۇلت جىبەرگەن جوق. قارسىلاسى 3 ەيس, 5 برەيكپەن (6 برەيك-پوينت) كوزگە ءتۇستى.
سونداي-اق قازاقستاننىڭ جۇپتىق سىنداعى ءبىرىنشى, الەمنىڭ 44-راكەتكاسى اننا دانيلينا اۋستراليا اشىق چەمپيوناتىنىڭ ەكىنشى اينالىمىنا شىعا المادى. ال ەرلەر اراسىندا قازاقستاننىڭ ءبىرىنشى, الەمنىڭ 27-راكەتكاسى الەكساندر بۋبليك, الەكساندر نەدوۆەسوۆ جارىس جولىنان شىعىپ قالدى.
وسىلايشا, اۋستراليا اشىق چەمپيوناتىندا قازاقستاننىڭ بىردە-ءبىر تەننيسشىسى قالمادى.
