داۆوستا دۇنيەجۇزىلىك ەكونوميكالىق فورۋمنىڭ 54-ءشى جىل سايىنعى وتىرىسى ءوتىپ جاتىر. ءىس-شاراعا 60-تان استام مەملەكەت جانە ۇكىمەت باسشىلارى, 300-گە جۋىق مينيسترلەر جانە باسقا دا ساياسي كوشباسشىلار قاتىسۋدا.
«The Race to Reskill» تالقىلاۋىندا گەنەراتيۆتى جاساندى ينتەللەكتىنىڭ اسەرى, جۇمىس ورىندارىنا تسيفرلىق ترانسفورماتسيا, ادامدار مەن مەكەمەلەردىڭ قازىرگى ەكونوميكادا وركەندەۋى ءۇشىن قاجەت داعدىلار سياقتى تاقىرىپتار تالقىلاندى.
ءوز سوزىندە Coursera باس ديرەكتورى قازاقستان تۋرالى ۇكىمەت پەن بيزنەس اراسىنداعى ينستيتۋتسيونالدىق ىنتىماقتاستىقتىڭ تابىستى ۇلگىسى رەتىندە ايتىپ, قازاقستان عىلىم جانە جوعارى ءبىلىم مينيسترلىگىمەن ارىپتەستىكتىڭ جەتىستىكتەرىن ءبولىستى.
ء«بىز قازاقستاننىڭ عىلىم جانە جوعارى ءبىلىم مينيسترلىگىمەن جۇمىس ىستەۋ بارىسىندا ۇكىمەت پەن بيزنەستىڭ, ۇكىمەت پەن جوعارى وقۋ ورىندارىنىڭ اراسىنداعى ىنتىماقتاستىقتى كورىپ وتىرمىز. ۇكىمەت نەسيە بەرۋ جۇيەسىنە قارسى ەمەس, ءىس جۇزىندە 25 ءتۇرلى مەملەكەتتىك جانە جەكە ءبىلىم بەرۋ باعدارلامالارىنا 1000 ليتسەنزيا بەرە وتىرىپ, سالالىق ليتسەنزيالىق سەرتيفيكاتتارعا سۋبسيديا ءبولۋ ارقىلى دەمەۋشىلىك جاسايدى. وسىلايشا, ۋنيۆەرسيتەتتەر ستۋدەنتتەرگە قولجەتىمدى وقۋ باعدارلامالارىنا وزگەرىستەر ەنگىزە الاتىن مۇمكىندىكتەردى كورۋى ماقساتىندا قارجىلىق كەدەرگىگە تاپ بولماس ءۇشىن باعدارلامانى پيلوتتىق ىسكە قوسۋعا دەمەۋشىلىك جاسالادى», دەپ اتاپ ءوتتى د.مادجونكالدا.
قازىر 25 وڭىرلىك جوعارى وقۋ ورىندارىنىڭ 47 248 ستۋدەنتى Coursera پلاتفورماسىندا 70 112 كۋرستان ءوتىپ, سەرتيفيكاتتار الدى. اتاپ ايتقاندا, 27 مىڭ كۋرس قازاق تىلىندە, 2600 كۋرس اعىلشىن تىلىندە, 1300-گە جۋىق كۋرس ورىس تىلىندە ءوتتى. تاڭدالعان كۋرستار IT, كاسىپكەرلىك, فيزيكا جانە بيزنەس سالالارىن قامتيدى. بۇگىنگى تاڭدا Coursera-نىڭ 4000-نان استام ۇزدىك كۋرسى قازاق تىلىنە اۋدارىلدى.
ەسكە سالا كەتەيىك, 2022 جىلدىڭ قىركۇيەگىندە ىنتىماقتاستىقتى دامىتۋ جانە قازاقستان ازاماتتارىنىڭ جەتەكشى شەتەلدىك پروفەسسورلاردىڭ كۋرستارىنا قولجەتىمدىلىگىن كەڭەيتۋ ماقساتىندا قازاقستاننىڭ عىلىم جانە جوعارى ءبىلىم مينيسترلىگى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى جانە Coursera كومپانياسى اراسىندا ءوزارا تۇسىنىستىك تۋرالى مەموراندۋمعا قول قويىلدى.
