فوتو: polisia.kz
«جۇرگىزۋشىلەر مەن جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا بالاعات سوزدەر, قوقىس, ماس كۇيىندە جول ءجۇرۋ جانە تەمەكى شەگۋ سىندى قوعامدىق كولىكتەردەگى قۇقىق بۇزۋشىلىقتاردىڭ الدىن الۋعا باسا نازار اۋدارىلدى. وپەراتسيانىڭ بەس كۇنىندە پوليتسەيلەر 1,2 مىڭنان استام اكىمشىلىك قۇقىق بۇزۋشىلىقتى انىقتادى, ونىڭ ىشىندە بوتەننىڭ مۇلكىنە قاساقانا زاقىم كەلتىرۋ – 2, الكوگولدى ىشىمدىكتەردى ءىشۋ نەمەسە قوعامدىق ورىندارعا ماس كۇيىندە كەلۋ – 325, بەلگىلەنبەگەن ورىنداردا تەمەكى شەگۋ – 90, ونىڭ ىشىندە اۆتوبۋس جۇرگىزۋشىلەرى – 27, ۇساق بۇزاقىلىق – 51, قوعامدىق ورىنداردى لاستاۋ – 359, اۆتوبۋستاردا جانە ايالدامالاردا ءتيىسۋ – 431. مىسالى, ششۋچينسك جانە تاراز قالالارىندا ادامداردىڭ ەسكەرتۋلەرىن ەلەمەگەن ماس جولاۋشىلار ۇستالدى. ەر ادامدار ەكى جاعدايدا دا مارشرۋتتىق اۆتوبۋستاردا شۋ شىعارعان. ولاردىڭ ارقايسىسىنا قاتىستى قوعامدىق ورىنداردا ماس كۇيىندە جۇرگەنى ءۇشىن اكىمشىلىك حاتتاما تولتىرىلدى. سونداي-اق پاۆلودار وبلىسىندا ءتارتىپ ساقشىلارى اۆتوبۋس تەرەزەسىنەن قوقىس تاستاعان جولاۋشىنى جاۋاپقا تارتتى. قۇقىق بۇزۋشىعا قاتىستى جالپى پايدالانىمداعى ورىنداردى لاستاعانى ءۇشىن اكىمشىلىك حاتتاما جاسالدى. پوليتسيا قىزمەتكەرلەرى رەيد بارىسىندا قوعامدىق كولىكتىڭ جۇمىسىنا مىڭعا جۋىق جاسىرىن تەكسەرۋ جۇرگىزدى, سونىڭ ناتيجەسىندە 337 بۇزۋشىلىق انىقتالدى. وپەراتسيا بارىسىندا ىشكى ىستەر ورگاندارىنىڭ 4,6 مىڭنان استام قىزمەتكەرى جۇمىلدىرىلدى», دەلىنگەن اقپاراتتا.
رەسپۋبليكالىق الدىن الۋ ءىس-شاراسىنا جەرگىلىكتى اتقارۋشى ورگان وكىلدەرى مەن تۇرعىندار دا قاتىسىپ, قول ۇشىن سوزدى.
