فوتو:abai.kz
ەڭبەك جانە حالىقتى الەۋمەتتىك قورعاۋ مينيسترلىگى, الەۋمەتتىك قورعاۋ سالاسىن دامىتۋدىڭ ۇلتتىق عىلىمي ورتالىعى جانە «قازاقستان حالقىنا» قوعامدىق قورى ەلىمىزدىڭ 4 وڭىرىندە ء«ۇي جاعدايىندا مۇگەدەكتىگى بار بالالاردى QH وڭالتۋ» جوباسىن ىسكە قوسۋ تۋرالى مەموراندۋمعا قول قويدى.
بۇل جوبا جۇيكە جۇيەسىنىڭ اۋرۋلارى مەن تىرەك-قيمىل اپپاراتىنىڭ بۇزىلۋلارى بار بالالار سانىنىڭ ديناميكالىق ءوسۋى تۇرعىسىنان وزەكتى بولىپ وتىر. جوبا مۇگەدەكتىگى بار بالالاردىڭ ءومىر ءسۇرۋ ساپاسىن جاقسارتۋعا, سونداي-اق ولاردىڭ وڭالتۋ الەۋەتىن ارتتىرۋعا باعىتتالعان.
«قاناتقاقتى جوبا ازىرگە اباي, قىزىلوردا, پاۆلودار وبلىستارى مەن شىمكەنت قالاسى قاتارلى 4 ءوڭىردى قامتيدى. ونى جەرگىلىكتى الەۋمەتتىك قورعاۋ سالاسىن دامىتۋدىڭ ۇلتتىق عىلىمي ورتالىعىنىڭ فيليالدارى جۇرگىزەدى. جوبانىڭ 1-كەزەڭى شەڭبەرىندە 4 فيليالدا وڭالتۋدىڭ تەحنيكالىق قۇرالدارىن (وتق) ىرىكتەۋ ءۇشىن بولىمشەلەر اشىلدى. وندا قۇرالداردى پايدالانۋ, سونداي-اق مۇگەدەكتىگى بار بالالار مەن ولاردىڭ زاڭدى وكىلدەرى ءۇشىن قاۋىپسىزدىك تەحنيكاسى بويىنشا وقىتۋ جۇرگىزىلەدى», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاماسىندا.
ەكىنشى كەزەڭدە فيليالداردىڭ كوپسالالى كوماندالارى مۇگەدەكتىگى بار بالالاردىڭ فۋنكتسيونالدىق جاي-كۇيى باقىلايدى, سونداي-اق مەديتسينالىق-الەۋمەتتىك كورسەتىلىمدەر مەن قارسى كورسەتىلىمدەر نەگىزىندە وڭالتۋدىڭ تەحنيكالىق قۇرالدارىن ۇسىنادى. وقىتۋدان كەيىن ۇسىنىلعان وتق ءار بالانىڭ جاعدايىنا بايلانىستى بەلگىلەنگەن كۋرس كەزەڭىندە ۇيدە وڭالتۋ جۇرگىزۋ ءۇشىن بالالارعا وتەۋسىز جالعا بەرىلەدى. جوبانى ىسكە اسىرۋ مۇگەدەكتىگى بار بالالاردىڭ قوعام ومىرىنە ەركىن ارالاسۋىنا مۇمكىندىك بەرەدى جانە ولارعا كەدەرگىسىز ورتا قالىپتاستىرادى.
