قازىر جاستار تەاترىندا 25 جاس اكتەر جۇمىس ىستەيدى. ونەرلى جاستار اۋداندارعا, كورشىلەس وبلىستارعا گاسترولگە شىعىپ, شەتەلدىك تەاتر فەستيۆالدارىندا توپ جارىپ ءجۇر. بىراق وسى كەزگە دەيىن دەربەس عيماراتقا قول جەتكىزە الماپ ەدى. ءتىپتى تەاتردىڭ تىركەۋ كۋالىگى دە بولماعان. بۇل, ارينە, كورەرمەندى ساحنالىق قويىلىمدارمەن سۋسىنداتۋدى كوزدەگەن تالانتتى جاستاردىڭ ونەرىنە تۇساۋ بولارى داۋسىز.
مادەنيەت جانە اقپارات مينيسترلىگى مادەنيەت كوميتەتىنىڭ توراعاسى كۇمىس سەيىتوۆانىڭ ايتۋىنشا, ونەر ۇجىمى 66-شى بولىپ تىركەلگەن. تەاتر ۇجىمىنا تىركەۋ تۋرالى كۋالىك پەن دەربەس عيماراتتىڭ بەرىلۋىنە وراي وتكەن ءىس-شاراعا تانىمال ونەر وكىلدەرى قاتىستى. ونىڭ اراسىندا قازاقستاننىڭ ەڭبەك سىڭىرگەن قايراتكەرى, رەجيسسەر اسحات ماەميروۆ, كانن كينوفەستيۆالىنىڭ جۇلدەگەرى, بەلگىلى كينواكتريسا سامال ەسلياموۆا, تەاتر جانە كينو اكتەرلەرى, «دارىن» سىيلىعىنىڭ يەگەرلەرى ايان وتەپبەرگەن مەن اسىلحان تولەپوۆ, «سەرپەر» جاستار سىيلىعىنىڭ لاۋرەاتى, باتىس قازاقستان وبلىستىق كامەرالىق وركەسترىنىڭ ديرەكتورى سالتانات ابىلعازيەۆا مەن م.اۋەزوۆ اتىنداعى ۇلتتىق دراما تەاترىنىڭ اكتريساسى, «ساحناگەر» ۇلتتىق تەاتر سىيلىعىنىڭ لاۋرەاتى اجارلىم باعىتجانوۆا بار.
«اتىراۋ – ەل مادەنيەتىنە زور ۇلەس قوسىپ كەلە جاتقان ءوڭىر. قازاق مادەنيەتىنىڭ قايراتكەرلەرى, بەلگىلى تۇلعالار سالعان ءىزدى ونەرلى جاستار جالعاستىرۋدى قولعا الدى. جاستار تەاترىنا جوندەۋ جۇرگىزىلگەن د.نۇرپەيىسوۆا اتىنداعى مۇنايشىلار سارايىنىڭ عيماراتىن بەرۋ تۋرالى شەشىم قابىلدادىق», دەدى وبلىس اكىمىنىڭ ورىنباسارى جاسۇلان بيسەمبيەۆ.
تانىمال كومپوزيتور, قازاقستان جانە قىرعىزستاننىڭ ەڭبەك سىڭىرگەن قايراتكەرى, قازاقستاننىڭ ەڭبەك ەرى ءىليا جاقانوۆ جاس ۇجىمعا باتاسىن بەردى. ال جاستار تەاترىنىڭ ۇجىمى اعىلشىن دراماتۋرگى بەرنارد شوۋدىڭ «كلەوپاترا» تاريحي دراماسىن كورەرمەن نازارىنا ۇسىندى.
جاستار تەاترىنىڭ ەنشىسىندە حالىقارالىق بايقاۋلاردىڭ بىرنەشە جۇلدەسى بار. ماسەلەن, 2019 جىلى يسپانيانىڭ للورەت دە مار قالاسىندا وتكەن «Theatrical Talents» تەاترلار فەستيۆالىنە رەجيسسەر مۇقانعالي تومانوۆتىڭ «زاتمەنيە» قويىلىمىمەن قاتىسىپ, باس جۇلدەنى يەلەندى.
ال 2021 جىلى كەرچ قالاسىندا ۇدايى وتەتىن «بوسپورسكيە وگوني» اتتى حالىقارالىق انتيكالىق ونەر فەستيۆالىنە قاتىستى. بۇل فەستيۆالعا اتىراۋلىق جاستار «تسەزار جانە كلەوپاترا» پەساسىنىڭ جەلىسىمەن «كلەوپاترا» دراماسىنىڭ پرەمەراسىن ۇسىندى. باس رەجيسسەرى – مۇقانعالي تومانوۆ. فەستيۆال قورىتىندىسىندا اتىراۋلىق ونەر ۇجىمى باس جۇلدەنى يەلەنسە, «ۇزدىك ايەل بەينەسى» اتالىمى تەاتر اكتريساسى عايني كۋكاتوۆاعا بەرىلگەن ەدى.
اتىراۋ وبلىسى
