فوتو: قورعانىس مينيسترلىگى
وعان قورعانىس مينيسترلىگىنىڭ, باس شتابتىڭ, ۇلتتىق قورعانىس ۋنيۆەرسيتەتىنىڭ, قۇرىلىمدىق بولىمشەلەردىڭ باسشىلارى, قارۋلى كۇشتەر تۇرلەرىنىڭ باس قولباسشىلارى, وڭىرلىك قولباسشىلىقتار اسكەرلەرىنىڭ, اسكەر تەكتەرىنىڭ قولباسشىلارى جانە اسكەري بولىمدەردىڭ كومانديرلەرى قاتىستى.
مينيستر نەگىزگى كۇش جاۋىنگەرلىك دايارلىقتىڭ ساپاسىنا جانە اسكەرلەردىڭ جاۋىنگەرلىك ازىرلىگىن ارتتىرۋعا باعىتتالۋى ءتيىس دەپ اتاپ ءوتتى. اسكەري ۇجىمدارداعى مورالدىق-پسيحولوگيالىق احۋال, جەدەل-تاكتيكالىق جۇمىس دەڭگەيىن جانە باسقارۋشى ورگانداردىڭ باسقارۋ شەشىمدەرىنىڭ ساپاسىن ارتتىرۋ ماسەلەلەرى دە نازاردا بولۋعا مىندەتتى.
قورعانىس ۆەدومستۆوسىنىڭ باسشىسى جەكە قۇرامنىڭ مەملەكەتتىڭ ەگەمەندىگى مەن اۋماقتىق تۇتاستىعىن قورعاۋ جونىندەگى جاۋىنگەرلىك مىندەتتەردى ورىنداۋعا دايىندىعى وسى فاكتورلارعا بايلانىستى دەدى.
– بيىل ەل اۋماعىندا بەس مەملەكەتتىڭ قاتىسۋىمەن اۋقىمدى وقۋ-جاتتىعۋلار وتەدى. ول جوعارى دەڭگەيدە ۇيىمداستىرىلۋى كەرەك. جاۋاپكەرشىلىك ايماعىندا قاۋىپسىزدىكتى قامتاماسىز ەتۋ مىندەتىن ورىنداۋ ماقساتىندا باۋىرلاس حالىقتار مەن قارۋلى كۇشتەر اراسىنداعى دوستىق قارىم-قاتىناستى ساقتاۋ ءبىز ءۇشىن وتە ماڭىزدى, – دەدى گەنەرال-پولكوۆنيك رۋسلان جاقسىلىقوۆ.
كەڭەستە قارۋلى كۇشتەردىڭ جاۋىنگەرلىك دايارلىعىنىڭ نەگىزگى مىندەتتەرى مەن ۇيىمداستىرۋ-شتاتتىق ءىس-شارالارى تۋرالى قورعانىس ءمينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى گەنەرال-لەيتەنانت مارات قۇسايىنوۆ باياندادى.
ول 2024 جىلعا 160-تان اسا جەدەل جانە 70 مىڭنان استام جاۋىنگەرلىك دايارلىق جونىندەگى ءىس-شارالار جوسپارلانعانىن ايتتى. باس شتاب باستىعى ولاردىڭ ىشىندەگى ەڭ ماڭىزدىسى اسكەري-تەڭىز كۇشتەرىنىڭ, اسكەري-اۋە كۇشتەرىنىڭ, «باتىس» وڭىرلىك قولباسشىلىعىنداعى ارنايى وپەراتسيالار كۇشتەرىنىڭ, ودان وزگە ازەربايجان, قىرعىزستان, تاجىكستان جانە وزبەكستان اسكەري كونتينگەنتتەرىنىڭ قاتىسۋىمەن وتەتىن «بىرلەستىك» وقۋ-جاتتىعۋى ەكەنىن اتاپ ءوتتى.
بۇدان باسقا گەنەرال-لەيتەنانت مارات قۇسايىنوۆ بيىل گەنەرال ساعادات نۇرماعامبەتوۆتىڭ ءجۇز جىلدىعىن مەرەكەلەۋ اياسىندا الماتىدا بوكستان, سامبودان حالىقارالىق چەمپيوناتتار وتكىزىلەتىنىن جانە العاش رەت قازاقشا كۇرەستەن تمد اسكەري قىزمەتشىلەرىنىڭ چەمپيوناتى وتەتىنىن حابارلادى.
– قازاقستاندا بارلىعى 33 جارىس وتەدى. سونىمەن بىرگە اسكەري سپورتشىلار 17 حالىقارالىق جارىستا دا باعىن سىنايدى. بيىل اسكەري قىزمەتشىلەردىڭ 35 حالىقارالىق تاكتيكالىق وقۋ-جاتتىعۋعا قاتىسۋى جوسپارلانىپ وتىر, ولاردىڭ التاۋى بىزدە وتەدى, – دەدى قورعانىس ءمينيسترىنىڭ ءبىرىنشى ورىنباسارى.
قارۋ-جاراق پەن اسكەري تەحنيكانى ساتىپ الۋ, كۇردەلى جوندەۋ جانە جاڭعىرتۋ ماسەلەلەرىن قورعانىس ءمينيسترىنىڭ قارۋ-جاراق جانە اسكەري تەحنيكا جونىندەگى ورىنباسارى گەنەرال-مايور باقىتبەك سىدىقوۆ ءوز بايانداماسىندا اتاپ ءوتتى.
قورعانىس ءمينيسترىنىڭ ورىنباسارى گەنەرال-لەيتەنانت سۇلتان كامالەتدينوۆ قارۋلى كۇشتەردەگى حالىقارالىق ىنتىماقتاستىقتىڭ, تاربيە جانە يدەولوگيالىق جۇمىستاردىڭ باستى شارالارىنا نازار اۋداردى.
تىلدىق قامتاماسىز ەتۋ مەن اسكەري ينفراقۇرىلىمدى دامىتۋدىڭ نەگىزگى شارالارىن قر قارۋلى كۇشتەرىنىڭ تىل باستىعى پولكوۆنيك ارمان مانسۇروۆ باياندادى.
كەڭەس قورىتىندىسى بويىنشا قورعانىس ءمينيسترى گەنەرال-پولكوۆنيك رۋسلان جاقسىلىقوۆ قورعانىس ۆەدومستۆوسىنىڭ نەگىزگى مىندەتتەرىن ايقىندادى. كوماندالىق قۇرامنىڭ كۇش-جىگەرى ورتالىق مەملەكەتتىك جانە جەرگىلىكتى اتقارۋشى ورگاندارمەن تىعىز ءوزارا ءىس-قيمىلدى ۇيىمداستىرۋعا باعىتتالماق. وتاندىق قورعانىس-ونەركاسىپ كەشەنىن, ۇلتتىق وندىرىستىك جانە جوندەۋ بازاسىن دامىتۋعا, جاۋىنگەرلىك دايارلىق ساپاسىن ارتتىرۋعا, ارميانى جوسپارلى قايتا جاراقتاندىرۋعا, اسكەري-وقىتىلعان رەزەرۆتىڭ ۇلەسىن ۇلعايتۋعا جانە ۆەدومستۆوارالىق ۇيلەستىرۋدى جاقسارتۋعا ەرەكشە نازار اۋدارىلادى.
