كوش كۆوتاسى كوبەيدى

ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىمەن قانداستار مەن قونىس اۋدارۋشىلاردى قابىلداۋعا ارنالعان 2024 جىلعى وڭىرلىك كۆوتاسى 9 483 ادام دەپ بەلگىلەندى. بۇل 2023 جىلمەن سالىستىرعاندا 554 ادامعا ارتىق.

«بۇيرىقتىڭ ماقساتى – ۇكىمەت ايقىن­دايتىن وڭىرلەردە قانداستار مەن ىشكى قونىس اۋدارۋشىلاردى وڭتايلى قونىستاندىرۋ. 2024 جىلى وڭىرلىك كۆوتا وبلىستار بو­يىنشا قانداستارعا پاۆلودار وبلىسى – 902, قوستاناي وبلىسى – 550, اقمولا وبلىسى – 285, شىعىس قازاقستان وبلىسى – 269, سولتۇستىك قازاقستان وبلىسى – 207, اباي وبلىسى – 220 ادامعا, ال ىشكى قونىس اۋدارۋشىلارعا سولتۇستىك قازاقستان وبلىسى – 2 702, پاۆلودار وبلىسى – 2 603, قوستاناي وبلىسى – 950, شىعىس قازاقستان وبلىسى – 372, اباي وبلىسى – 255, ۇلىتاۋ وبلىسى – 132, قاراعاندى وبلىسى 36 ادامعا بەرىلەدى», دەلىنگەن مينيسترلىك حابار­لا­ماسىندا.

بۇعان قوسا, قانداستار مەن قونىس اۋدارۋشىلاردى قابىلداۋعا ارنالعان وڭىرلىك كۆوتا الاتىن ادامدارعا مەملەكەتتىك قولداۋ شارالارى كورسەتىلەدى. اتاپ ايتقاندا, كوشىپ-قونۋى ءۇشىن وتباسىنىڭ ءاربىر مۇشەسىنە 70 اەك بىرجولعى سۋبسيديا بەرىلسە, 12 اي ىشىندە ءبىر وتباسىنا 15-تەن 30 اەك-كە دەيىن تولەنەتىن تۇرعىن ءۇيدى جالداۋ جانە كوممۋنالدىق قىزمەتتەرگە اقى تولەۋ بويىنشا شىعىستاردى جابۋعا سۋبسيديا بەرىلەدى. سونىمەن قاتار قىسقامەرزىمدى كاسىپتىك وقىتۋعا جولداما, جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ, تۇرعىن ءۇي ساتىپ الۋعا ەكونوميكالىق موبيلدىلىك سەرتيفيكاتتارىن بەرۋ قاراستىرىلعان.

رەسمي دەرەك بويىنشا, 1991 جىلدان باستاپ 2024 جىلعى 1 قاڭتار ارالىعىندا 1 ملن 128,37 مىڭ قازاق تاريحي وتانىنا ورالعان. 2023 جىلى 21,3 مىڭ قازاق اتاجۇرتقا كەلىپ, قانداس مارتەبەسىن الىپتى.