فوتو: ۇكىمەت. تەلەگرام
ءمينيستردىڭ ايتۋىنشا جىل قورىتىندىسىندا جۇقپالى اۋرۋلار بويىنشا ەپيدەميولوگيالىق احۋال تۇراقتى بولىپ, الدىن الۋ شارالارى ناتيجەسىندە 20 اسا قاۋىپتى جۇقپالى اۋرۋ تىركەلمەدى, ونىڭ اراسىندا وبا, تىرىسقاق, پوليوميەليت بار. سونداي-اق 39 ينفەكتسيا بويىنشا, ونىڭ ىشىندە كوروناۆيرۋس, روتاۆيرۋس, ءجىتى ىشەك ينفەكتسيالارى بويىنشا سىرقاتتانۋشىلىق تومەندەدى.
الدىن الۋ ماقساتىندا بىلتىر قاۋىپ-قاتەر توبىنا جاتاتىن 2,4 ملن ادام تۇماۋعا قارسى ەكپە العان, بۇل حالىقتىڭ 12%-ىن قۇرايدى.
جالپى ەپيدەميولوگيالىق ماۋسىم باستالعاننان بەرى ستاتسيونارلاردا 31 مىڭنان استام ناۋقاس ەمدەلگەن, 2 ملن-نان استام ناۋقاس امبۋلاتوريالىق ەم العان.
ەل بويىنشا بارلىعى 10 مىڭعا جۋىق ينفەكتسيالىق توسەك-ورىن قويىلدى, ولاردىڭ ىشىندە بالالار ءۇشىن شامامەن 3 مىڭ توسەك-ورىن قاراستىرىلعان.
بىلتىرعى جىل سوڭىندا ەلدە 29 مىڭنان استام قىزىلشا جۇقتىرۋ جاعدايى تىركەلدى, ونىڭ 80%-ى 14 جاسقا دەيىنگى بالالارعا تيەسىلى. 1 قاڭتاردان باستاپ 1 674 قىزىلشامەن سىرقاتتانۋشىلىق تىركەلدى.
احۋالدى تۇراقتاندىرۋ ءۇشىن وتكەن جىلى جوسپار بويىنشا ۆاكتسينالاۋ جۇرگىزىلدى, ناتيجەسىندە التى جاسقا دەيىنگى 700 مىڭعا جۋىق بالا ەكپە الدى. قازىرگى ۋاقىتتا قوسىمشا ۆاكتسينالاۋ اياسىندا 930 مىڭنان استام ادام ەكپە الدى, كۇن سايىن 20 مىڭنان استام ادام ۆاكتسينا الىپ وتىر.
