4 قاڭتارعا قاراعان ءتۇنى ساعات 01:25 شاماسىندا پاۆلودار وبلىسىنىڭ باياناۋىل اۋدانىندا «مايقايىڭالتىن» اق اۋماعىندا, مايقايىڭ كەنىشى شاحتاسىنىڭ جانىندا تازارتۋ كەڭىستىگىنە 4 جولاۋشىسى بار اۆتوبۋس قۇلادى. قيراندىنىڭ الدىن الا ۇزىندىعى − 150-200 م, ەنى − 500 م, تەرەڭدىگى − 150 م.
اپات كەزىندە اۆتوبۋستا 4 ادام بولعان. ونىڭ ۇشەۋى كااقق روش پاۆلودار فيليالىنىڭ قۇتقارۋشىلارى, ال بىرەۋى جۇرگىزۋشى بولعان ەكەن. شاحتادان 33 جۇمىسشى ەۆاكۋاتسيالاندى, ولاردىڭ ءومىرى مەن دەنساۋلىعىنا قاۋىپ تونگەن جوق.
«جەدەل شتاب ۇيىمداستىرىلدى. پاۆلودار وبلىسىنىڭ اكىمى اسايىن بايحانوۆ, تجد مەن جەرگىلىكتى اتقارۋشى ورگانداردىڭ باسشىلىعى وقيعا ورنىنا باردى. پسيحولوگتار جۇمىس ىستەپ جاتىر. اۆاريالىق-قۇتقارۋ جۇمىستارىنا «مايقايىڭالتىن» اق كاسىبي اسكەريلەندىرىلگەن اۆاريالىق-قۇتقارۋ قىزمەتتەرى, جەرگىلىكتى اتقارۋشى ورگانداردىڭ كۇشتەرى مەن قۇرالدارى, سونداي-اق تج دەپارتامەنتىنىڭ قۇتقارۋشىلارى, بارلىعى 44 ادام, 13 تەحنيكا مەن ءبىر ۇشقىشسىز ۇشۋ اپپاراتى (درون) جۇمىلدىرىلدى», دەلىنگەن تجد حابارلاماسىندا.
