جەڭىستى دە جەمىستى جىل

• 2023 جىلدىڭ باستى سپورتتىق ءىس-شاراسى – جازعى ازيا ويىندارى. بىل­تىر قىتايدىڭ حانچجوۋ قالاسىندا وتۋگە ءتيىس بولعان ءىرى سپورتتىق باسە­كە بيىل 23 قىركۇيەك پەن 8 قازان ارا­لى­عىنا اۋىستىرىلعان ەدى. بايراقتى با­سە­كەگە ءوز تاريحىندا سەگىزىنشى مارتە قا­تىس­قان قازاقستان قۇراماسى العاش رەت ازيا ويىندارى ارقىلى پاريج وليمپياداسىنىڭ ليتسەنزياسىنا دا تالاستى. ءدۇبىرلى دوداعا ءبىزدىڭ ەلدىڭ اتىنان 524 سپورتشى قاتىسىپ, سپورتتىڭ 30 تۇرىنەن باق سىنادى. ولار 10 التىن, 22 كۇمىس, 48 قولا جۇلدەگە يە بولدى. جالپى, مەدال سانى كوپ بولعانىمەن, ساپاسى جاعىنان بۇل تاريحتاعى ەڭ ناشار ازيا ويىندارى ەكەنىن دە ەستەن شىعارماعان ءجون. ازيا ويىندارىندا توعىز سپورت ءتۇرى بويىنشا پاريج وليمپياداسىنىڭ ليتسەنزياسى ساراپقا سالىنىپ, قازاقستان ساپىنان قامشىبەك قوڭقاباەۆ, كارينا يبراگيموۆا (بوكس), گەورگي بورودا-دۋدوچكين, ەلەنا پوتاپەنكو (قازىرگى بەسسايىس) جولداما الدى.
• بوكستان مامىر ايىندا تاشكەنت تورىندە وتكەن الەم چەمپيوناتىندا قازاق­ستان قۇراماسى ءتورت التىن (سانجار تاشكەنباي, ماحمۇد سابىرحان, اس­لانبەك شىمبەرگەنوۆ, نۇربەك ورالباي) ولجالادى. مۇنداي ناتيجەگە قازاقستان تەك 2013 جىلى الماتىداعى الەم بىرىن­شىلىگىندە عانا قول جەتكىزگەن-ءدى. تاش­كەنتتە مىرزاعالي ايتجانوۆ باپتايتىن قۇ­راما 13 سالماق بويىنشا 4 ال­تىن, 1 كۇ­مىس مەدال ەنشىلەدى. بۇل تاريحي جە­ڭىس ەكەنى ءسوزسىز.
• كەيىنگى جىلدارى فۋتبولدان ۇلتتىق قۇرامامىزدىڭ جىگەرگە تولى جەڭىستى جولىن ايتپاي ءوتۋ مۇمكىن ەمەس. ەۋرو-2024 ءتۋرنيرىنىڭ ىرىكتەۋ كەزەڭى اياسىندا جەرلەستەرىمىز فينالدىق كەزەڭگە شىقپاسا دا, العاش رەت 18 ۇپاي جينادى. ءوز الاڭىمىزدا دانيادان جەڭىستى (3:2) تارتىپ الۋىمىز, اسحات تاعىبەرگەننىڭ قاقىراتا تەپكەن سوققىسىنىڭ UEFA-دا ۇزدىك گول اتانۋى ءار جانكۇيەردىڭ ەسىندە. فۋتبولشىلارىمىزدىڭ جانكەشتىلىگى دە جانكۇيەردىڭ بويىنا سەنىم ۇيالاتىپ, ستاديونعا ورالتتى. فينلياندياعا قارسى ويىندا 30 019 جانكۇيەر جينالسا, بىرەر ايدان كەيىن سان-مارينومەن بولعان كەزدەسۋدە 30 100 جانكۇيەر ماتچتى تاماشالاپ, رەكوردتى جاڭارتتى.

• فۋتزالدان ۇلتتىق قۇرامامىز ىرىكتەۋ كەزەڭىندە التى ويىندا دا جەڭىسكە جەتىپ, قاتارىنان 3-مارتە الەم چەم­پيو­ناتىنىڭ فينالدىق كەزەڭىنە جول­داما الدى. ەندى وتانداستارىمىز 2024 جىلى تاشكەنتتە چەمپيوندىققا تالاس­پاق. ەستەرىڭىزدە بولسا, 2021 جىلى جەر­لەستەرىمىز الەم بىرىنشىلىگىنىڭ جارتىلاي فينالىنا دەيىن جەتكەن ەدى.
• ەركىن كۇرەستەن ەلىمىز دەربەس قۇ­راما رەتىندە 1993 جىلدان بەرى الەم چەمپيوناتىنا قاتىسىپ كەلە جاتسا دا, تەك 27-الەم بىرىنشىلىگىندە عانا توپ جارۋ بۇيىرعان ەكەن. 92 كيلو سالماقتا ونەر كورسەتكەن ريزابەك ايتمۇحان توپ جاردى.
• سەمسەرلەسۋدەن شىلدە ايىندا يتا­ليا­نىڭ ميلان قالاسىندا وتكەن الەم چەمپيوناتىندا 32 جاستاعى رۋسلان قۇربانوۆ 243 قاتىسۋشىنىڭ اراسىنان ەل تاريحىندا العاش رەت قولا جۇلدەگە قول جەتكىزگەنى دە تولايىم تابىسىمىزدىڭ ءبىرى ەكەنىن تىلگە تيەك ەتە كەتەيىك.
• سپورتتىق گيمناستيكادان قىركۇيەك ايىنىڭ سوڭىندا بەلگيانىڭ انتۆەرپەن قالاسىنداعى الەم چەمپيوناتىندا ميلاد كاريمي كوپسايىس باعدارلاماسىندا 3-ورىنعا تۇراقتادى. ەل تاريحىندا 26 جىلدان كەيىن جۇلدە العان جەرلەسىمىز پاريج وليمپياداسىنىڭ ليتسەنزياسىن يەلەندى.
• كاسىپقوي بوكستان جانىبەك ءالىم­حان ۇلى (15-0, 10 KO) WBO جانە IBO تۇ­جىرىمدارى بويىنشا ورتا سال­ماق­­تاعى الەم چەمپيونى اتاعىنا قول جەتكىزدى. بۇيىرسا, كەلەر جىلى ول تانىمال بوكسشىلارعا قارسىلاس اتانۋى ابدەن مۇمكىن.
• سپورتتىڭ كولەڭكەلى تۇستارىن دا ايتايىق. لاتۆيا مەن فينليانديا تاراپى ءوز جەرىندە وتەتىن الەم چەمپيوناتىنا رەسەي مەن بەلارۋس ازاماتتىعى بار حوككەيشىلەر مەن باپكەرلەردى كىر­گىزۋگە تىيىم سالدى. سالدارىنان قازاق­ستان قۇراماسىنىڭ باپكەرى اندرەي سكا­بەلكا (بەلارۋس), قوس ازاماتتىعى بار دميتري شەۆچەنكو, الەكسەي ماكليۋكوۆ, ەگور پەتۋحوۆ, انتون سا­گادەەۆ سىندى حوككەيشىلەر الەم بىرىن­شىلىگىنە بارۋ قۇقىعىنان ايىرىلدى. 2004 جىلدان بەرى قازاقستاندا قوس ازاماتتىققا تىيىم سالىنعاندىقتان, قۇراماداعى شۆەد, كانادالىق سپورتشىلار دا ورنىن بوساتۋعا ءماجبۇر بولدى. ناتيجەسىندە, ۋنيۆەرسيادادا جاقسى ونەر كورسەتكەن, ەل چەمپيونى اتانعان «نوماد» كلۋبىنىڭ جات­تىقتىرۋشىسى عالىم مامبەتاليەۆ ۇلتتىق قۇرامانىڭ تىزگىنىن ۇستادى. ول وزىنە جاقسى تانىس ماكسيم مۋحامەتوۆ, باتىرلان مۇراتوۆ, ماكسيم مۋسوروۆ, ءمادي دي­حانبەك, دانيل بۋتەنكو, ءالي­حان ومىر­بەكوۆ, ارتەم كورولەۆ, اباي ماڭ­عىس­باەۆتى ۇلتتىق قۇراماعا شا­قىردى. لەگيونەرلەردىڭ ورنىن «با­رىس» ساپىنان قوسىلعان تا­ميرلان گايتاميروۆ پەن 19 جاستاعى دىن­مۇ­حامەد قايىرجان دا جوقتاتقان جوق. وسىلايشا, الەم چەمپيوناتىندا 10 حوككەيشىمىز دەبيۋتتىك ويىنىن وتكىزدى. ناتيجەسىندە, قازاقستان قۇراماسى ءۇش ويىندا جەڭىلىپ جا­تىپ, جەڭىسكە جەتتى (نورۆەگيا 4:3 (بۋل­ليت), سلوۆاكيا 4:3 (ب), سلوۆەنيا (4:3).

كەلەر جىلى حوككەيدەن قازاقستان قۇراماسىنان بولەك, جاستار مەن جاس­وسپىرىمدەر قۇرامالارى دا جوعارى ەلي­تالىق ديۆيزيوندا ونەر كورسەتەتىنىن ماقتان ەتىپ ايتۋعا بولادى.

• شاحماتتان پولشادا وتكەن قىز­دار اراسىنداعى كوماندالىق الەم چەمپيوناتىندا قازاقستان قۇرا­ماسى ال­عاش رەت جۇلدەگەرلەر قاتا­رىنان كو­­رىندى. كو­ماندالىق الەم چەم­­پيو­ناتىنا ەلىمىز­دىڭ رەيتينگتەگى №1 شاح­­­ماتشىسى جانسايا ابدىمالىك پەن ءۇشىنشى ورىنداعى دينارا سا­دۋا­قاسوۆا ءتۇرلى سەبەپكە بايلا­نىستى بارا ال­مادى. ولاردىڭ ورنىنا ءبيبىسارا اساۋباەۆا, مەرۋەرت كا­ماليدەنوۆا, الۋا نۇرمانوۆا, ءامينا قايىر­بەكوۆا, كسەنيا بالاباەۆا, اسەل سەرىكبايعا ءۇمىت ارتىلدى.

مىنە, بۇل جىل وسىنداي جەڭىس­تەرمەن ەستە قالدى.