تسيفرلاندىرۋ ءمينيسترىنىڭ مالىمەتىنشە, قازىرگى تاڭدا وبلىس يننوۆاتسيالىق ءونىم كولەمى بويىنشا ءبىرىنشى ورىندا تۇر. باعدات مۋسين قوستاناي وبلىسىندا يننوۆاتسيالىق ءونىمدى دامىتۋ ەكونوميكالىق الەۋەتتى جاقسارتۋعا, ينۆەستيتسيالاردى تارتۋعا, جاڭا جۇمىس ورىندارىن قۇرۋعا, باسەكەگە قابىلەتتىلىكتى ارتتىرۋعا جانە ءوڭىردىڭ تەحنولوگيالىق تۇرعىدان ىلگەرىلەۋىنە ىقپال ەتەتىنىن ايتتى.
وبلىس اكىمى قۇمار اقساقالوۆ ءوڭىردىڭ ينۆەستيتسيالىق تارتىمدىلىعىن ارتتىرۋ ءۇشىن تسيفرلاندىرۋ جانە يننوۆاتسيالاردى ەنگىزۋ ماسەلەلەرىنە كوپ كوڭىل بولىنەتىنىن ءبىلدىردى. اكىمنىڭ سوزىنشە, كەيىنگى 5 جىل ىشىندە وسى باعىتتا 48 ملرد تەڭگەگە 300-گە جۋىق تسيفرلىق جوبا ىسكە اسىرىلعان. مۇنىڭ 37 ملرد تەڭگەسىن جەكە ينۆەستورلار قۇيىپ وتىر.
«مىسالى, سوكولوۆ-سارىباي تاۋ-كەن بايىتۋ وندىرىستىك بىرلەستىگىنە قاراستى قورجىنكول جانە سوكولوۆ-سارىباي كەن ورىندارىندا «اقىلدى كارەر» اۆتوماتتاندىرىلعان جۇيەسى ىسكە قوسىلدى. ينۆەستيتسيا كولەمى 1 ملرد تەڭگەدەن اسادى», دەدى وبلىس اكىمى.
باعدات مۋسين مينيسترلىك «KazSat» بايلانىس سپۋتنيگى بويىنشا قوستاناي وبلىسىنىڭ 43 اۋىلىن ينتەرنەتپەن قامتاماسىز ەتۋدى, 2025 جىلدىڭ سوڭىنا دەيىن 87 5G بازالىق ستانساسىن ورناتۋدى, «Starlink» تەحنولوگياسى ارقىلى 180 اۋىلدىق مەكتەپتى ينتەرنەتكە قوسۋدى جانە 325 اۋىلعا تالشىقتى-وپتيكالىق بايلانىس جەلىسىن جەتكىزۋدى جوسپارلاپ وتىرعانىن ايتتى. ءمينيستردىڭ ايتۋىنشا, جول كارتاسى شەڭبەرىندە 226 اۋىلدا ءموبيلدى ينتەرنەت بايلانىسىنىڭ ساپاسىن جاقسارتۋ, جەرگىلىكتى اتقارۋشى ورگاندار ەسەبىنەن 161 اۋىلعا مۇنارا انتەننا ورناتۋ كوزدەلگەن.
باعدات مۋسين جۇمىس ساپارى اياسىندا قوستانايداعى وبلىستىق سپورتتىق باعدارلامالاۋ فەدەراتسياسىنىڭ وكىلدىگىن رەسمي تۇردە اشتى.
«بۇگىنگى تاڭدا سپورتتىق باعدارلامالاۋ – زياتكەرلىك سپورتتىڭ كەلەشەگى بار سالاسى. مۇندا جاستار باعدارلامالاۋ ءتىلىن پايدالانا وتىرىپ, كۇردەلى ماتەماتيكالىق ەسەپتەردى شەشەدى. ءبىزدىڭ وقۋشىلار مەن ستۋدەنتتەر IOI جانە ICPC سياقتى حالىقارالىق جارىستاردا تۇراقتى تابىستارعا جەتىپ, رەيتينگتە جوعارى ورىنداردى يەلەنىپ كەلەدى. سوندىقتان بۇگىن اشىلىپ وتىرعان وكىلدىك سپورتتىق باعدارلامالاۋدى دامىتۋدا جانە دارىندى باعدارلاماشىلاردىڭ جاڭا بۋىنىن قالىپتاستىرۋعا سەپتىگىن تيگىزەدى دەگەن سەنىمدەمىن», دەدى مينيستر.
جاڭا ورتالىقتا بالالار مەن جاسوسپىرىمدەرگە ارنالعان سپورتتىق باعدارلامالاۋ جارىستارى وتەتىن بولادى. مۇنداي ءىس-شارالار جاستاردىڭ زياتكەرلىك سپورتقا دەگەن قىزىعۋشىلىعىن دامىتۋعا ىقپال ەتپەك.
باعدات مۋسين ودان كەيىن قوستانايداعى حالىققا قىزمەت كورسەتۋ ورتالىقتارىنىڭ بىرىنە باس سۇقتى. «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما باسشىسى ميرجان جاڭاباەۆ مينيسترگە قوستاناي قالاسىنداعى حالىققا قىزمەت كورسەتۋ ورتالىعىنىڭ 2-ءبولىمى جوندەۋدەن ءوتىپ, ارقالىقتا جاڭا حالىققا قىزمەت كورسەتۋ ورتالىعى اشىلعانىن جەتكىزدى. مينيستر وڭىردە قوسىمشا حالىققا قىزمەت كورسەتۋ ورتالىقتارىن اشۋدىڭ ماڭىزدى ەكەنىن ايتىپ, الداعى جىلى قوستاناي قالاسى مەن اۋدانداردا جۇمىس ىستەپ تۇرعان حقكو فيليالدارىن جاڭعىرتۋدى تاپسىردى.
قوستاناي وبلىسى
