ماۋلەن اشىمباەۆ ەل پرەزيدەنتى قاسىم-جومارت توقاەۆ ادام قۇقىقتارىن قورعاۋ جانە وسى سالاداعى زاڭنامانى جەتىلدىرۋ ماسەلەلەرىنە ءاردايىم باسا ءمان بەرىپ كەلە جاتقانىن اتاپ ءوتتى. مەملەكەت باسشىسى بىلتىر ءساۋىر ايىندا «قازاقستان رەسپۋبليكاسىنىڭ ادام قۇقىقتارى سالاسىنداعى ودان ءارى شارالارى تۋرالى» جارلىققا وزگەرىستەر ەنگىزگەن بولاتىن. وندا ايەلدەرگە قاتىستى كەمسىتۋشىلىكتى جويۋ, مۇگەدەكتىگى بار ادامداردىڭ مۇددەسىن ەسكەرۋ, قىلمىستىق سوت تورەلىگى سالاسىندا جازانى ورىنداۋ جانە ازاپتاۋ مەن قاتىگەزدىكتىڭ الدىن الۋ ماسەلەلەرى نازارعا الىندى.
پالاتا توراعاسى پارلامەنت تاراپىنان قولدانىستاعى قۇقىق قورعاۋ تەتىكتەرىن كۇشەيتۋ باعىتىندا جۇيەلى جۇمىس جۇرگىزىلىپ جاتقانىن دا تىلگە تيەك ەتتى. كەيىنگى جىلدارى وسى سالادا بىرقاتار زاڭ قابىلداندى. ونىڭ ىشىندە قۇقىق قورعاۋ ورگاندارى مەن سوت جۇيەسىنىڭ قىزمەتىن رەتتەيتىن جانە قىلمىستىق پروتسەستى ىزگىلەندىرۋدى كوزدەيتىن قۇقىقتىق اكتىلەر بار.
«ادام قۇقىقتارىن قورعاۋ ماسەلەسى قاشاندا پارلامەنت سەناتىنىڭ نازارىندا. كونستيتۋتسيالىق رەفورمانىڭ ناتيجەسىندە ازاماتتاردىڭ قۇقىقتارى مەن بوستاندىقتارىن قورعاۋدىڭ ۇلتتىق جۇيەسى جاڭا دەڭگەيگە كوتەرىلدى. مەملەكەت باسشىسىنىڭ جارلىققا قول قويۋى جانە 9 باسىم باعىتتى قۇرايتىن ادام قۇقىقتارى مەن زاڭ ۇستەمدىگى سالاسىنداعى ءىس-قيمىل جوسپارىنىڭ بەكىتىلۋى بۇل سالاداعى كەلەسى ماڭىزدى قادام بولعانى انىق. الداعى ۋاقىتتا پارلامەنت بالا قۇقىقتارى جونىندەگى وڭىرلىك ۋاكىلدەردىڭ مارتەبەسىن كۇشەيتۋگە, وتباسىنداعى تۇرمىستىق زورلىق-زومبىلىق سالاسىنداعى قىلمىستىق زاڭنامانى قاتاڭداتۋعا, سونداي-اق, ەڭبەك قاۋىپسىزدىگى سالاسىنداعى زاڭنامالىق تالاپتاردى ارتتىرۋعا باعىتتالعان زاڭدار قابىلدايدى», دەدى ماۋلەن اشىمباەۆ.
سەنات توراعاسى كەڭەس مۇشەلەرىنىڭ وسى سالاداعى كاسىبي جانە ومىرلىك تاجىريبەلەرى مول ەكەنىنە نازار اۋدارىپ, وسىنداي وتىرىستا ادام قۇقىقتارى مەن زاڭ ۇستەمدىگىن قورعاۋ جۇيەسىن ودان ءارى دامىتۋ پەرسپەكتيۆالارىن تالقىلاۋدىڭ ماڭىزدى ەكەنىن ايتتى.
وتىرىس بارىسىندا سەناتورلار كەڭەسىنىڭ مۇشەلەرى – پالاتانىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى نۇرلان بەكنازاروۆ, قازاقستاننىڭ ەڭبەك سىڭىرگەن قايراتكەرى, فيلولوگيا عىلىمدارىنىڭ دوكتورى, پروفەسسور ءادىل احمەت, ۇلتتىق قۇرىلتاي مۇشەسى, «قازاقستان زاڭگەرلەر وداعى» رقب توراعاسى سەرىك اقىلباي, مەملەكەت قايراتكەرى سەرگەي گروموۆ, «قازاقستانداعى پارلامەنتاريزمدى دامىتۋ قورى» قق پرەزيدەنتى زاۋرەش باتتالوۆا, تاعى باسقا قاتىسۋشىلار ءسوز سويلەدى.
