جەلتوقساننىڭ 25-ءى كۇنى «اتامەكەن» ونەر ورداسىندا «ازاتتىقتىڭ اق تاڭى» اتتى رەسپۋبليكالىق ايتىس باتىس قازاقستان وبلىسى اكىمدىگى, وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن, قادىر مىرزا ءالى اتىنداعى وبلىستىق مادەنيەت جانە ونەر ورتالىعى مەن «ايتىس اقىندارى مەن جىرشى-تەرمەشىلەردىڭ حالىقارالىق وداعى» بقو فيليالىنىڭ بىرلەسە ۇيىمداستىرۋىمەن ءوتتى.
سۋىرىپ سالما جىر بايگەسىنە اباي جولماعامبەتوۆ (ماڭعىستاۋ), ايبەك قاليەۆ (ارقالىق), اينابەك بيسەنعاليەۆ (بقو), ايتباي جۇماعۇلوۆ (قاراعاندى), باۋىرجان شيرمەدين ۇلى (بقو), ءبىرجان بايتۋوۆ (شىمكەنت), جانسايا مۋسينا (بقو), جۇلدىز قوجابەكوۆا (اقتوبە), قاينار الاگوزوۆ (اقتوبە), مەيىرمان شاكەنوۆ (بقو), مۇرادىم مەرلانوۆ (بقو), مۇحتار نيازوۆ (قىزىلوردا), تالعات مىقي (بقو), شالقارباي ءىزباساروۆ (اتىراۋ), شۇعايىپ سەزىمحان (الماتى), شىناربەك قابيەۆ (اتىراۋ) سىندى 16 اقىن قاتىستى.
جىر دوداسىن قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى, پارلامەنت ءماجىلىسىنىڭ دەپۋتاتى, اقىن امانجول ءالتاي جۇرگىزدى.
بۇل ايتىستىڭ ءبىر ەرەكشەلىگى – كوپتەن بەرى سىرقاتىنا بايلانىستى ايتىستان كورىنبەي جۇرگەن ءجۇرسىن ەرمان اعامىزدىڭ اقجايىققا ارنايى كەلىپ, قازىلار القاسىنا جەتەكشىلىك ەتۋى بولدى.
«ازاتتىقتىڭ اق تاڭى» دەپ اتالعان رەسپۋبليكالىق ايتىسقا قاتىسۋعا كەلگەن بارشا اقىنعا قۇتتى بولسىن ايتامىن. ەكى-ءۇش جىلدان بەرى مىنا سىرقاتتىڭ تىرناعىنا ءىلىنىپ قالىپ, ايتىستارعا بارا الماي ءجۇر ەدىم. وسى ايتىسقا ءوزىمدى ءوزىم قيناعانداي بولىپ كەلىپ وتىرمىن. ويتكەنى ايتىستىڭ استاناسى – الماتى مەن استانا بولسا, سودان كەيىنگى ىرگەلى وردا – وسى ورال. تالاي كەرەمەت دودالاردىڭ كۋاسى بولعان جۇرت بۇل. ەندى مىنا ءدىلمار اقىنداردان اتىنا زاتى ساي بولاتىن كەسەك جىر, كەستەلى ءسوز توسامىز. ايتىڭدار, تارتىنباڭدار! ايتىستىڭ سالتى سول – ايتۋ! بارشاڭىزعا اق ءجۇزدى, نۇرلى بولىڭدار, ايتىستان جاسىماي قايتىڭدار, تاسىپ قايتىڭدار دەگەن تىلەك ايتامىن. ايتىس قۇتتى بولسىن!» دەدى «وتان» وردەنىنىڭ يەگەرى, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان.
باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ ايتىستىڭ اشىلۋ سالتاناتىندا قۇتتىقتاۋ ءسوز سويلەپ, ايتىسكەر اقىندارعا اق جول تىلەدى.
بەس ساعاتتان اسا ۋاقىتقا سوزىلعان ايتىستىڭ قازىلار القاسى قاتارىندا مەملەكەتتىك سىيلىقتىڭ لاۋرەاتى عالىم جايلىباي, قازاقستان جازۋشىلار وداعىنىڭ مۇشەسى, اقىن قۇدايبەرلى مىرزابەك, مادەنيەت قايراتكەرى سەرىك قۇسانباەۆ, ءبىلىم بەرۋ سالاسىنىڭ ۇزدىگى, اقىن داريعا مۇشتانوۆا, قازاقستاننىڭ ەڭبەك سىڭىرگەن قايراتكەرى, اقىن ايتاقىن بۇلعاقوۆ, مادەنيەت قايراتكەرى, مەملەكەتتىك «دارىن» سىيلىعىنىڭ يەگەرى, اقىن بەكارىس شويبەكوۆ, «ايتىس اقىندارى مەن جىرشى-تەرمەشىلەردىڭ حالىقارالىق وداعى» بقو فيليالىنىڭ وكىلى باۋىرجان حاليوللا سىندى قالامگەرلەر بولدى. سايىس سوڭىندا قازىلار القاسى بارلىق اقىنعا بىردەي 500 000 تەڭگەدەن جۇلدە بەردى. اقىندار بقو اكىمىنىڭ العىسحاتىنا يە بولدى. بۇدان بولەك, قازاق ايتىسىنىڭ قاتەپتى قارا نارى, ابىزى اتانعان ءجۇرسىن ەرمانعا اقجايىق جۇرتىنىڭ اتىنان باقىتجان نارىمبەتوۆ شاپان جاۋىپ, تۇلپار مىنگىزدى. بيىل 60-قا تولعان اقىن سەرىك قۇسانباەۆقا اقجايىق ءوڭىرى ات مىنگىزىپ, يىعىنا شاپان جاپتى.
«ەلىمىزدىڭ قوس بىردەي ازاماتىنا ات مىنگىزىپ, قولداۋ كورسەتكەن جەرگىلىكتى مەتسەنات, ونەر, سپورت جانە ايتىس جاناشىرى قۇرمانعاليەۆ ماديار قۋانىش ۇلىنا اقجارما العىس بىلدىرەمىز», دەيدى وسى ءىس-شارانى ۇيىمداستىرۋشىلاردىڭ ءبىرى باۋىرجان حاليوللا.
باتىس قازاقستان وبلىسى
