قارلى بوران قۇتىرىپ, جول ءۇستىن قويۋ تۇمان باسىپ قالعاندىقتان, وڭىردە رەسپۋبليكالىق ماڭىزى بار 7, وبلىستىق ماڭىزعا يە 23 اۆتوكولىك جولى جابىلدى. ال مەكتەپتەر قاشىقتان وقىتۋعا اۋىستى.
پوليتسيا وبلىس تۇرعىندارىنا جولعا شىعۋعا بولمايتىنىن, كولىك جۇرگىزۋشىلەرگە قالا ىشىندە اراقاشىقتىق پەن جىلدامدىقتى ساقتاۋدى ەسكەرتكەن. ات قۇلاعى كورىنبەيتىن اقتۇتەكتە دالا تۇگىلى, قالا ىشىندە ءجۇرۋ قيىنداپ, جول-كولىك وقيعاسى جيىلەدى. مىسالى, قوستانايداعى اباي داڭعىلىنىڭ بويىندا 10 اۆتوكولىك ءبىر-بىرىمەن قاقتىعىسىپ, جاراقات العان 1 ادام اۋرۋحاناعا ءتۇستى.
بوراندى كۇنى جول جاعدايىن تۇراقتاندىرۋ ءۇشىن شىققان «قازاقاۆتوجول» سەرىكتەستىگىنىڭ 85 تەحنيكاسى توقتاۋسىز جۇمىس ىستەگەنىن دە ايتا كەتكەن ءجون. مەردىگەر مەكەمەلەر دە 526 تەحنيكا شىعارىپ, وبلىستىق جانە جەرگىلىكتى ماڭىزى بار جولداردى ارشىپ, اۆتوكولىك ءجيى جۇرەتىن جولدارعا قۇم-تۇز قوسپاسىن شاشۋمەن بولدى.
تجد-نىڭ مالىمەتى بويىنشا وبلىس اۋماعىندا 11 مىڭ 255 ادامدىق 257 جىلىتۋ پۋنكتى جۇمىس ىستەپ تۇر.
«اۋا رايىنىڭ قولايسىزدىعىنا بايلانىستى امانگەلدى, التىنسارين, دەنيسوۆ, اۋليەكول, جىتىقارا, مەڭدىقارا, سارىكول, ب.مايلين, ۇزىنكول, قامىستى, فەدوروۆ اۋداندارى مەن رۋدنىي قالاسىنا قاراستى 103 ەلدى مەكەن ەلەكتر قۋاتىنسىز قالدى. اتالعان ەلدى مەكەندەردە ەلەكتر جەلىلەرىن قالپىنا كەلتىرۋ جۇمىستارى ءجۇرىپ جاتىر. كاسىپورىندارمەن, ءتۇرلى مەكەمەلەرمەن تۇرعىلىقتى حالىقتى ۋاقىتشا باسپاناعا ورنالاستىرىپ, كيىم-كەشەك, ازىق-ت ۇلىك جانە سۋ, ىستىق تاماق, كولىكپەن قامتاماسىز ەتۋ جونىندە كەلىسىمشارت جاسالدى», دەپ حابارلادى وبلىس اكىمدىگى.
اقتۇتەك بوراننىڭ استىندا ءجۇرىپ جولدا قالعان تالاي ادامدى اراشالاپ قالعان وبلىستىق تجد قىزمەتكەرلەرىنىڭ ەرلىگىن ايتپاي كەتپەسكە بولماس. ماسەلەن, قۇتقارۋشىلار قوستومار اۋىلى ماڭىندا جاس بوسانعان ايەلدى قار قۇرساۋىنان قۇتقارىپ قالدى. جۇكتى ايەلدى اۋرۋحاناعا اكەلە جاتقان جەدەل جاردەم كولىگى جولدا قالىڭ قارعا باتىپ قالعان.
«اۋا رايىنىڭ قولايسىزدىعىنا قاراماستان, توتەنشە جاعداي دەپارتامەنتىنىڭ قۇتقارۋشىلار توبى جۇكتى ايەلدى جەدەل ەۆاكۋاتسيالاپ, دەر كەزىندە پەرزەنتحاناعا جەتكىزدى», دەپ مالىمدەدى تجد-نىڭ قوعاممەن بايلانىس قىزمەتى.
قوستاناي وبلىسى
