ءىس-شاراعا 9-13 جاس ارالىعىنداعى وقۋدا ۇزدىك, سپورتتا جەتىستىككە جەتكەن 300-گە جۋىق بالا قاتىستى. ولاردى مەكتەپتەگى قامقورشىلىق كەڭەس اتا-انالارىمەن بىرگە تاڭدادى. سونىمەن بىرگە كوپبالالى وتباسىنان شىققان, الەۋمەتتىك جاعىنان از قامتاماسىز ەتىلگەن وقۋشىلار دا جاڭاجىلدىق مەرەكەنىڭ قوناعى بولدى. قالا اكىمى عابيت سىزدىقبەكوۆ پرەزيدەنت قاسىم-جومارت توقاەۆتىڭ اتىنان بالالاردى جاڭا جىل مەرەكەسىمەن قۇتتىقتادى.
«جاڭا جىل جاعىمدى جاڭالىقتارعا, جاڭا جەڭىستەر مەن تولاعاي تابىستارعا باي جىل بولسىن! كەز كەلگەن جەڭىس پەن جەتىستىك ۇلكەن ەڭبەكپەن كەلەدى. ول ءۇشىن ءوزىڭدى جان-جاقتى دامىتۋ كەرەك. ساباققا زەيىن قويىپ, كوپ كىتاپ وقىپ, سپورتپەن اينالىسىپ, ونەرگە ۇمتىلۋ قاجەت. ۇلى ىستەر مەن بيىك بەلەستەردى باعىندىراتىن جاس ۇرپاق – سەندەرگە سەنىم ارتامىز. اتا-انالارىڭىزدى قۇرمەتتەڭىزدەر, ۇنەمى سەندەر ءۇشىن قۋانىپ جۇرەتىن بولسىن. كىشىگە قامقور بولىپ, ۇلگى-ونەگە كورسەتىپ جۇرىڭىزدەر», دەدى شاھار باسشىسى.
مەرەكەلىك ءىس-شارادا بالالار ءان شىرقاپ, بي بيلەدى. قىزىقتى ساحنالىق قويىلىمدار بالعىنداردىڭ كوڭىل كۇيىن ەرەكشە شاتتىققا بولەدى. سونىمەن بىرگە «مەيىر» بالەت توبىنىڭ جاس بيشىلەرى ءوز ونەرلەرىن كورسەتتى. وقۋشىلار سارايىنىڭ ۇستازدارى ءتۇرلى جانۋاردىڭ كەيپىندە بالالاردىڭ كوڭىلىن اۋلادى, مەكتەپتەن تىس ۇيىرمە تاربيەلەنۋشىلەرى, ساز مەكتەبىنىڭ سكريپكاشى شاكىرتتەرى دە ونەرلەرىن وقۋشىلارعا پاش ەتتى.
قالالىق ءبىلىم باسقارماسىنىڭ باسشىسى نۇرگۇل شامشيەۆانىڭ ايتۋىنشا, جىلداعى ءداستۇر بويىنشا وتەتىن پرەزيدەنتتىڭ جاڭاجىلدىق شىرشا مەرەكەسىندە بالالار 100 مىڭ تەڭگەنىڭ سەرتيفيكاتىنا, ءۇش تىلدە جازىلعان «اتامەكەن اڭىزى» كىتابىنا, سونداي-اق تاتتىلەرى بار سىيلىقتارعا يە بولدى.
شىمكەنت
