فوتو: قبتۋ
جاستارعا قولجەتىمدى ءارى ساپالى ءبىلىم بەرۋمەن قاتار, ستۋدەنتتەرگە جاڭا جاتاقحانالار سالۋ – ەلىمىزدەگى ماڭىزدى باعىتتاردىڭ ءبىرى. ستۋدەنتتەردى زاماناۋي ۇلگىدە سالىنعان, جايلى ءارى قاۋىپسىزدىك جاعى قاراستىرىلعان جاتاقحانالارمەن قامتاماسىز ەتۋگە باسىمدىق بەرىلگەن. قازاقستان-بريتان تەحنيكالىق ۋنيۆەرسيتەتى وسى باعىتتا الماتى قالاسى اكىمدىگىمەن, قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگىمەن ەتەنە جۇمىس ىستەپ جاتىر. بۇل رەتتە قبتۋ ستۋدەنتتەرگە 980 ورىندىق توعىز قاباتتى ەكى جاتاقحانا كورپۋسىنىڭ قۇرىلىسىن اياقتاپ, قولدانىسقا بەردى. سالتاناتتى ءىس-شاراعا الماتى قالاسى جاستار ساياساتى باسقارماسىنىڭ باسشىسى قايىرجان مەڭدىعاليەۆ, «NNEF» قوعامدىق قورىنىڭ قامقورشىلىق كەڭەسىنىڭ توراعاسى تيمۋر ق ۇلىباەۆ, «NNEF» قوعامدىق قورىنىڭ قۇرىلتايشىسى دينارا ق ۇلىباەۆا, قبتۋ رەكتورى ماراتبەك عابدۋللين, BI Group قۇرىلىس كومپانياسىنىڭ نەگىزىن قالاۋشى-كومپانيانىڭ ديرەكتورلار كەڭەسىنىڭ توراعاسى ايدىن راحىمباەۆ, جوعارى وقۋ ورنىنىڭ قىزمەتكەرلەرى, ستۋدەنتتەر مەن ولاردىڭ اتا-انالارى قاتىستى.
«وتكەن جىلى ءبىز ستۋدەنتتەرىمىزگە بارلىق جاعدايى جاسالعان جاتاقحانا اشامىز دەپ شەشىم قابىلدادىق. 10 ايدىڭ ىشىندە ءبىز ۇلكەن جۇمىس ىستەدىك. كورىپ وتىرعاندارىڭىزداي, جالپى اۋدانى 14.000 شارشى مەتردەن استام ەكى جاڭا عيماراتتا سىيىمدىلىعى 980 ورىندىق جاتاقحانا مەن سپورت كەشەنىنىڭ قۇرىلىسىن اياقتادىق. وسىلايشا, الماتى قالاسىنداعى ستۋدەنتتەردىڭ تۇرعىن ءۇي قاجەتتىلىگىن تولىعىمەن شەشكەن العاشقى ۋنيۆەرسيتەت اتانىپ وتىرمىز», دەدى قبتۋ رەكتورى ماراتبەك عابدۋللين.
ايتا كەتەيىك, ەلدە, ستۋدەنتتەر جاتاقحاناسى تاپشى, اسىرەسە بۇل ماسەلە الماتىدا قاتتى سەزىلىپ جاتىر. ماسەلەنىڭ وڭ شەشىمىن تابۋ ءۇشىن قازىرگى ۋاقىتتا مەگاپوليستە جاتاقحانا قۇرىلىسىن ءتيىمدى ۇيلەستىرۋ ماقساتىندا جوبالىق كەڭسە دە ىسكە قوسىلعان. جوبانى قولداۋعا 114 الەۋەتتى ينۆەستور ءوتىنىش بىلدىرگەنى ايتىلدى. الماتى اكىمى ەربولات دوساەۆتىڭ ايتۋىنشا, قالادا 2025 جىلدىڭ سوڭىنا دەيىن 12 مىڭ, 2030 جىلدىڭ سوڭىنا دەيىن تاعى 20 مىڭ جاتاقحانالىق ورىن اشىلادى. بۇل جاتاقحانا تاپشىلىعى ماسەلەسىن تولىعىمەن شەشەدى. وسى ورايدا جاتاقحانا تاپشىلىعى ماسەلەسىن شەشۋگە قازاقستان-بريتان تەحنيكالىق ۋنيۆەرسيتەتى العاشقىلاردىڭ ءبىرى بولىپ كىرىسكەن. ال قۇرىلىستى جوعارى وقۋ ورنى جەكە قاراجاتى ەسەبىنەن باستاعان.
«قبتۋ 980 ورىندىق ەكى جاتاقحانانى قولدانىسقا بەرىپ وتىر. بىلەسىزدەر, پرەزيدەنت تاپسىرماسىنا وراي, قالادا جاڭا جاتاقحانا قۇرىلىسى بەلسەندى تۇردە قولعا الىنعان. الماتىدا 35 جوعارى وقۋ ورنى بار, بۇل وقۋ ورىندارىندا جالپى 200 000-عا جۋىق ستۋدەنت ءبىلىم الىپ جاتىر, ال ونىڭ ىشىندە 124 000 ستۋدەنت باسقا قالادان كەلگەندەر. ياعني, بارلىق ستۋدەنتتەردىڭ 62%-ى الماتىعا باسقا وڭىرلەردەن كەلىپ وقىپ جاتقان ستۋدەنتتەر. وقۋ جىلىنىڭ باسىندا 95 جاتاقحانا بولسا, وندا 32 000 ستۋدەنت جاتاقحاناعا ورنالاسقان. ال جاتاقحاناعا 65 000-عا جۋىق ستۋدەنت تاپسىرىس بەرگەن. سوندىقتان جاتاقحانا تاپشىلىعى – 32 700 ورىن. قىركۇيەك ايىنىڭ سوڭىنا دەيىن 1500 ورىندىق 7 نىساندى ىسكە قوستىق. وسى ايدا 2 500 ورىندىق تاعى دا 7 نىسان ىسكە قوسىلادى. الماتى قالاسىنىڭ دامۋ باعدارلاماسى بويىنشا 2030 جىلعا دەيىن جاتاقحانا تاپشىلىعىن تولىعىمەن شەشۋىمىز قاجەت, ياعني 32 000 ورىندى قامتيتىن نىسانداردى قولدانىسقا بەرۋىمىز كەرەك», دەدى الماتى قالاسى جاستار ساياساتى باسقارماسىنىڭ باسشىسى قايىرجان مەڭدىعاليەۆ.
قبتۋ-دىڭ جاڭا جاتاقحانالار ەسكى كورپۋستاردىڭ ورنىندا سالىنعان. وسى ارالىقتا ماگيسترانتتار مەن ستۋدەنتتەر ءۇيىنىڭ قىزمەتكەرلەرى ستۋدەنتتەردى جايلى جاتاقحانامەن قامتاماسىز ەتۋمەن قاتار, بارلىق قىزمەتتەردى كوشىرىپ, ينفراقۇرىلىمداردىڭ ودان ءارى تولىققاندى جۇمىس ىستەۋى جولىندا ۇلكەن ءىس اتقارعان. ايتايىق, جاڭا عيماراتتاردىڭ قۇرىلىسى 2023 جىلعى اقپاندا باستالىپ, جەلتوقساندا تولىق اياقتالعان.
«ستۋدەنتتەردىڭ جاقسى ءبىلىم الىپ, جان-جاقتى دامۋىنا جاعداي جاساپ وتىرعاندارىڭىزعا العىسىمىزدى جەتكىزگىم كەلەدى. ۋنيۆەرسيتەتتىڭ بىزگە كورسەتكەن قولداۋىن باعالايمىز. جاڭا جاتاقحانا اكادەميالىق وتباسىمىز ءۇشىن پروگرەستىڭ سيمۆولىنا اينالىپ, ستۋدەنتتەردىڭ قۇتتى ءۇيى اتانسىن», دەدى ديانا سەرىكباەۆا.
جاڭادان سالىنعان جاتاقحانا كورپۋستارىندا دەمالاتىن ورىن, اسبولمەلەر, وقۋ بولمەلەرى, 120 ورىندىق اكت زالى, 70 ورىندىق اسحانا, كىر جۋاتىن ورىندار, توسەك-ورىنداردى قابىلدايتىن جانە تاپسىراتىن بولمەلەرى قاراستىرىلعان. ءار جاتاقحانا كورپۋسىندا ەكى ليفت, بەينەباقىلاۋ كامەرالارى مەن Wi-Fi ورناتىلعان, ءار بولمەنىڭ جۋىناتىن بولمەسى مەن دارەتحاناسى جەكە. ايتا كەتەيىك, جاتاقحانادا مۇمكىندىگى شەكتەۋلى ستۋدەنتتەرگە ارنايى جابدىقتالعان بولمەلەر دە بار. اتالعان عيماراتتاردىڭ قۇرىلىسى قبتۋ-دىڭ جەكە قاراجاتى ەسەبىنەن جۇرگىزىلگەن, ال مەردىگەر بولىپ اشىق تەندەر ارقىلى BI-Group قۇرىلىس كومپانياسى تاڭدالعان.
«جاستارعا وسىنداي فورماتتاعى عيماراتتى سالىپ بەرۋ ءبىز ءۇشىن ۇلكەن قۋانىش. قبتۋ ەلىمىزدەگى ۇزدىك وقۋ ورىندارىنىڭ ءبىرى, تەحنيكالىق ءبىلىم بەرەتىن ۇزدىك وقۋ ورنى. بىزگە سەنىم ارتقاندارىڭىز ءۇشىن العىسىمدى بىلدىرەمىن», دەدى BI Group قۇرىلىس كومپانياسىنىڭ نەگىزىن قالاۋشى-كومپانيانىڭ ديرەكتورلار كەڭەسىنىڭ توراعاسى ايدىن راحىمباەۆ.
جاتاقحانادان بولەك قبتۋ سىيىمدىلىعى 198 ورىندىق تريبۋناسى بار ويىن زالىنان تۇراتىن ءۇش قاباتتى سپورت كەشەنىنىڭ قۇرىلىسىن اياقتاعان. جاڭادان سالىنعان سپورت كەشەنىندە ستۋدەنتتەر ۇستەل تەننيسى, بوكس, كۇرەس, فۋتزال, ۆولەيبول, باسكەتبول, گاندبول جانە باسقا دا سپورت تۇرلەرىمەن اينالىسۋعا جاعداي جاسالعان. ودان بولەك حورەوگرافيا ساباقتارىن وتكىزۋگە ارنالعان زال, جاتتىعۋ زالى دا وسى سپورت كەشەنىندە قاراستىرىلىپتى.
وسىلايشا, قازاقستان-بريتان تەحنيكالىق ۋنيۆەرسيتەتى ستۋدەنتتەردى جاتاقحانامەن تولىق قامتاماسىز ەتىپ وتىرعان ەلدەگى ءبىلىم وردالارىنىڭ ءبىرى اتانىپ وتىر.
