Scopus – رەتسەنزيالانعان عىلىمي ادەبيەتتەردىڭ اۋقىمدى عىلىمي-مەتريالىق مالىمەتتەر بازاسى. وندا 5000 حالىقارالىق باسپانىڭ 20 مىڭنان استام جاريالانىمى بار. Scopus دەرەكتەرىنىڭ ساپاسى عىلىمي-زەرتتەۋ جۇمىسىن باعالاۋ ءۇشىن دەرەكقوردى پايدالاناتىن جەتەكشى جوعارى وقۋ ورىندارى مەن عىلىمي ۇيىمدار, سونداي-اق ۋنيۆەرسيتەتتەردىڭ الەمدىك رەيتينگتەرىن قۇراستىرۋ ءۇشىن رەيتينگتىك اگەنتتىكتەر تاراپىنان مويىندالعان. عىلىمعا بەت بۇرعاندار ءۇشىن Scopus-پەن جۇمىس ىستەۋ ماڭىزدى. زەرتتەۋدىڭ حالىقارالىق عىلىمي باسىلىمداردا جاريالانۋى عىلىمي بەدەلدى ارتتىرادى.
ال Scopus بازاسىنا ەنگەن «قازۇۋ حابارشىسى. ماتەماتيكا, مەحانيكا جانە ينفورماتيكا سەرياسى» عىلىمي باسىلىمى ماتەماتيكا, مەحانيكا جانە اقپاراتتىق تەحنولوگيالار سالاسىنداعى جاڭالىقتاردى, وزەكتى ماسەلەلەر مەن جەتىستىكتەردى جاريالايدى. جۋرنال جىلىنا 4 رەت ەلەكتروندى فورماتتا شىعارىلادى. ءبىرىنشى سانى جىلدىڭ 20 ناۋرىزىنا دەيىن, ەكىنشى ءنومىرى – 20 ماۋسىمعا دەيىن, ءۇشىنشى شىعارىلىم – 20 قىركۇيەككە دەيىن, ءتورتىنشى شىعارىلىمى 20 جەلتوقسانعا دەيىن جاريالانادى. Scopus مالىمەتتەر بازاسىنا «قازۇۋ حابارشىسى. «ماتەماتيكا, مەحانيكا جانە ينفورماتيكا سەرياسىنىڭ» ءبىرىنشى حابارشىسى جانە جالپى ءۇشىنشى عىلىمي باسىلىمى ەنىپ وتىر. بۇعان دەيىن بۇل ءىرى دەرەكقورعا ۋنيۆەرسيتەتتىڭ International Journal of Mathematics and Physics جانە Physical Sciences and Technology جۋرنالدارى ەنگىزىلگەن.
Scopus دەرەكتەر بازاسىنداعى مازمۇندى ىرىكتەۋ بويىنشا ساراپتامالىق كەڭەستىڭ ساياساتىنا سايكەس, وزەكتى عىلىمي ماقالالاردى جاريالاۋ جانە ونى دەرەكقورعا ەنگىزۋ حالىقارالىق اۋديتوريا ءۇشىن اسا ماڭىزدى ءارى نەگىزگى كورسەتكىش. «قازۇۋ حابارشىسى. «ماتەماتيكا, مەحانيكا جانە ينفورماتيكا سەرياسى» زەرتتەلەتىن سالاعا اكادەميالىق ۇلەس, Scopus جۋرنالىنداعى ماقالالارعا سىلتەمە جاساۋ, رەداكتورلار مەن اۆتورلاردىڭ گەوگرافيالىق تارالۋى, جاريالاۋ ەتيكاسىنىڭ انىق جانە جالپىعا قولجەتىمدى مالىمدەمەلەرى سياقتى باعالاۋ كورسەتكىشتەرى نەگىزىندە رەتسەنزيالانىپ تاڭدالىپ الىنعان.
باسىلىمعا اۆتورلار تاراپىنان بۇرىن جاريالانباعان, قازاق, ورىس نەمەسە اعىلشىن تىلدەرىندە جۋرنالدىڭ تاقىرىپتىق باعىتتارىنا سايكەس كەلەتىن جانە قولجازبا فورماتىنىڭ تالاپتارىنا سايكەس ازىرلەنگەن ماقالالار قابىلدانادى. سونداي-اق Creative Commons Attribution ليتسەنزياسىنىڭ شارتتارى بويىنشا اۆتورلار قولجازبالارىنا مورالدىق قۇقىقتارىن ساقتايدى, سونىمەن بىرگە باسقالارعا ماقالاسىن ەركىن جۇكتەۋگە, قايتا پايدالانۋعا, قايتا باستىرۋعا, وزگەرتۋگە, تاراتۋعا نەمەسە كوشىرۋگە مۇمكىندىك بەرە وتىرىپ, وسى جۇمىستىڭ اۆتورلىعىن مىندەتتى تۇردە راستاي وتىرىپ جانە وسى جۋرنالداعى بىرەگەي باسىلىمعا سىلتەمە جاساي الادى. وسى ارەكەتتەردىڭ بارلىعى ءۇشىن جۋرنالعا سىلتەمە كورسەتىلگەن كەزدە اۆتورلاردان نەمەسە باسپادان رۇقسات تالاپ ەتىلمەيدى.
جۋرنالدىڭ رەداكتسيالىق القاسى جەتەكشى وتاندىق جانە شەتەلدىك عالىمداردان قۇرالعان. Scopus-پەن قاتار, جۋرنال CrossRef, EBSCO, DOAJ, رەسەيلىك عىلىمي دايەكسوز يندەكسى, Web of Science سياقتى بەلگىلى عىلىمي-مەتريالىق دەرەكتەر قورلارىندا دا يندەكستەلەدى. بىلتىر جۋرنال Web of Science دەرەكتەر بازاسىنا ەنگىزىلىپ, بيىل يندەكستەۋ بازاسىنىڭ ءبىرىنشى يمپاكت-فاكتورىن الدى. جۋرنال جاريالانىمدارىنا بەدەلدى حالىقارالىق كونفەرەنتسيالاردىڭ جيناقتارىندا جانە رەيتينگى جوعارى عىلىمي جۋرنالداردا سىلتەمە بەرىلەدى.
«قازۇۋ حابارشىسى. «ماتەماتيكا, مەحانيكا جانە ينفورماتيكا سەرياسى» عىلىمي باسىلىمىنىڭ Scopus-قا ەنۋى – ۇلتتىق ۋنيۆەرسيتەتتىڭ ينتەرناتسيونالداندىرۋ جانە زەرتتەۋ ۋنيۆەرسيتەتىن قالىپتاستىرۋ باعىتىنداعى ناتيجەلى جۇمىستارىنىڭ ايقىن كورىنىسى. اتالعان جۋرنالداعى عىلىمي ماقالالار ۋنيۆەرسيتەتتىڭ حالىقارالىق عىلىمي بەدەلىن كوتەرۋگە لايىقتى ۇلەس قوسىپ كەلە جاتقانى Scopus دەرەكتەر بازاسىنىڭ ساراپتامالىق كەڭەسى تاراپىنان جوعارى باعالانىپ وتىر.
