گرانتتار جاڭا يدەيالار مەن باستامالاردى ىسكە اسىرۋعا ۇمتىلعان ەل ازاماتتارىنا بەرىلەدى. ۇمىتكەرلەردىڭ جوبالارى عىلىم, مادەنيەت, اقپاراتتىق تەحنولوگيالار, بيزنەس, مەديا باعىتتارى بويىنشا ىرىكتەلەدى. بيىل كونكۋرسقا 3 مىڭنان استام ءوتىنىش تۇسكەن. سالتاناتتى ءىس-شارادا ايدا بالاەۆا جەڭىمپازداردى ارنايى قۇتتىقتاپ, 3 ميلليون تەڭگەلىك گرانت سىيلىعىن تابىستادى.
ء«بىز ۇلكەن وزگەرىستەر داۋىرىندە ءومىر سۇرۋدەمىز. جاستارعا دۇرىس تاڭداۋ جاساۋ, سەنىمگە لايىق ازامات بولۋ, ءوزىن ءوزى دامىتۋ, وقۋ جانە ەڭبەك ارقىلى تابىسقا ۇمتىلۋ سياقتى ەڭ ماڭىزدى جاۋاپكەرشىلىك جۇكتەلگەن. مەملەكەت باسشىسى قاسىم-جومارت توقاەۆ جاستاردىڭ دامۋىنا, ولارعا جاڭا جانە اۋقىمدى مۇمكىندىكتەر اشۋعا ەرەكشە كوڭىل بولەدى. بار ءۇمىتىمىز – ەڭبەك پەن ءبىلىمنىڭ جولىمەن جۇرەتىن, ادامدىق قادىر-قاسيەتتىڭ ءمانىن تەرەڭ تۇسىنەتىن, اتا-بابا ءداستۇرىن قاستەرلەيتىن جاستاردا. بۇگىنگى بەرىلگەن گرانت – تاباندىلىقتارىڭىز بەن تالانتتارىڭىزدىڭ, قاجىرلى ەڭبەكتەرىڭىز بەن ادالدىقتارىڭىزدىڭ, قوعام ءۇشىن ماڭىزدىلىق پەن ءوز الەۋەتىڭىزدى مويىنداۋىڭىزدىڭ سىيى. بۇل قۇرمەت ودان ءارى دامۋ مەن ىنتالانۋعا جەتەلەسىن. ءاربىر قادامدارىڭىز جاڭا جەتىستىكتەر مەن جاڭالىقتارعا جول اشىپ, شىعارماشىلىق, عىلىمي, ىسكەرلىك يدەيالارىڭىز ەلىمىزدىڭ دامۋىنا ەلەۋلى ۇلەس قوسۋعا مۇمكىندىك بەرسىن. سىزدەر قازاقستاندى بۇدان دا زور كوركەيتەتىندەرىڭىزگە سەنەمىن!», دەدى مادەنيەت جانە اقپارات ءمينيسترى.
ۇزدىكتەر قاتارىندا قازاقستاننىڭ مادەني مۇراسىن ناسيحاتتاۋعا, حالىقتىق مادەني داستۇرلەر مەن ونەردى ىلگەرىلەتۋگە, IT سالاسىنداعى عىلىمي زەرتتەۋلەردى, ستارتاپتار مەن جوبالاردى, ەكونوميكانىڭ نەگىزگى سەكتورلارىنداعى كرەاتيۆتى بيزنەس يدەيالاردى ىسكە اسىرۋعا باعىتتالعان جوبالار بار. اتاپ ايتساق, «عىلىم» باعىتىندا داناگۇل بەكجانوۆا, ارايلىم سەرىكباي, ەركەبۇلان رايىمبەكوۆ, گۇلزات قايرانوۆا, ماۋلەن بەكتۇرعانوۆ, ءجاميلا ەركەباەۆا, «مادەنيەت» سالاسىندا ادەل ابدراحمانوۆا, اينۋرا پولاتوۆا, اراي دوسمۇحامبەتوۆا, ەكاتەرينا حۋدياكوۆا, راۋشان كيمران, ارايلىم قادىر, «اقپاراتتىق تەحنولوگيالار» بويىنشا باقىتجان ساريەۆ, سانيا ءابىلدينوۆا, قانات ءتاجىحان, ارعىن ساعاش, نۇرلان بيىمبەت, الۋا سۇلەيمەنوۆانىڭ جوبالارى گرانتقا لايىق بولدى.
ال «بيزنەس» باعىتىندا جەڭىمپاز بولعاندار – بەحرۋز ايمەتوۆ, داۋرەن بەكسەيتوۆ, گۇلسارا بولتەكوۆا, ارسەنا كۋشجانوۆا, ياروسلاۆا پيليپۋشكو, اناستاسيا كراۆچەنكو. سونداي-اق «مەديا» سالاسىندا جوبالارى ۇزدىك شىققاندار – الماس مارات ۇلى, ءاليمان اۋەسحانوۆا, يسلام شاراپ, جۇپار دۇيسەكوۆا, ەرلان ەراليەۆ, شالقار ساتتاروۆ.
ايتا كەتەيىك, مەملەكەت باسشىسى 2021 جىلى «تاۋەلسىزدىك ۇرپاقتارى» گرانتىن جاس وتانداستارىمىزدىڭ جاڭا جانە قولدانىستاعى باستامالارىن قولداۋ ماقساتىندا تاعايىنداعان ەدى. گرانت اياسىندا 63 ادام ءوز جوباسىن قازاقستاندا عانا ەمەس, شەتەلدە دە ءتۇرلى سالالاردا تابىستى جۇزەگە اسىرىپ جاتىر.
وعان قوسا ەلىمىزدە جاستاردى قولداۋ باعىتىندا 1992 جىلدان باستاپ ءداستۇرلى تۇردە عىلىمي, شىعارماشىلىق, كرەاتيۆتى قىزمەتپەن اينالىساتىن, سونداي-اق سپورت سالاسىندا جەتىستىكتەرى بار ازاماتتارعا «دارىن» مەملەكەتتىك جاستار سىيلىعى بەرىلەدى. سونىمەن قاتار جازۋشىلار مەن اقىندارعا ارنالعان پرەزيدەنتتىك ارناۋلى ادەبي سىيلىق, دارىندى عالىمدار د.ا.قوناەۆ اتىنداعى سىيلىقتار مەن عىلىمي ستيپەنديالار الادى.
