شىنىندا دا, بۇل اۋدان تۇرعىندارىنىڭ ۇيىمشىلدىعى, اسىرەسە مادەنيەتكە ەرەكشە كوڭىل بولەتىنى كوپتەن ايتىلىپ كەلە جاتىر. 2023 جىلى عانا مەكتەپ تۇلەكتەرى مەن مەتسەناتتاردىڭ دەمەۋشىلىگىمەن اۋداندا 77 ملن 400 مىڭ تەڭگە قاراجاتقا 45 جوبا جۇزەگە اسقان.
ايتپاقشى, باتىس قازاقستان وبلىسىندا جەكەلەگەن ازاماتتاردىڭ كۇشىمەن اشىلعان ءۇش اۋىل مۋزەيى بولسا, سونىڭ ۇشەۋى دە وسى قازتالوۆ اۋدانىندا. ولار – كوكتەرەك, اقپاتەر جانە قوشانكول اۋلىندا. كوكتەرەك اۋلىنداعى مۋزەي مارقۇم ۇستاز تولەگەن سەيىتكەرەەۆتىڭ كۇشىمەن اشىلسا, اقپاتەر مۋزەيىن ەڭبەك ارداگەرى كارىم وتەعۇلوۆ قۇراعان. ال قوشانكول اۋلىنداعى حالىقتىق مۋزەيدىڭ جادىگەرلەرى تەك قانا جىلقى تاقىرىبىنا جيناقتالعان. بۇلاردان بولەك اۋداندىق تاريحي-ولكەتانۋ مۋزەيى دە قىزمەت كورسەتىپ تۇر.
بيىل قازتالوۆ اۋدانىندا جاڭا باستاما قولعا الىندى. ياعني جىل باسىنان اۋدانداعى 16 وكرۋگتىڭ ورتالىعىنا «قازاق راديوسى» ورناتىلىپ, كوشەدە ساڭقىلداپ سويلەپ تۇراتىن بولدى. «الداعى جىلى وزگە ەلدى مەكەندەرىمىزدە دە وسى جۇمىستى جالعاستىرامىز», دەيدى اۋدان اكىمى.
اۋدان باسشىسىنىڭ ايتۋىنشا, بيىل 29 ملن 295 مىڭ تەڭگە قاراجات ءبولىنىپ, اۋداندا مادەنيەت ۇيلەرى مەن كلۋبتارىنىڭ ماتەريالدىق-تەحنيكالىق بازاسى جاڭارتىلعان. قايىڭدى اۋلىندا جاڭا مادەنيەت ءۇيى سالىنىپ جاتسا, قاراسۋ مەن قوشانكول مادەنيەت ۇيلەرىن كۇردەلى جوندەۋگە, قاراوزەندە كوپبەيىندى مادەني-سپورت كەشەنىن سالۋعا جوبالىق-سمەتالىق قۇجاتتاما جاسالىپ جاتىر ەكەن.
بيىل جازدا اۋدان ورتالىعىندا ساياسي قۋعىن-سۇرگىنگە ۇشىراعان جەرلەس قايراتكەر مانسۇر عاتاۋللينگە ارناپ «بەسەۋدىڭ حاتى» وبەليسكىسى اشىلعانىن بۇدان بۇرىن جازعان بولاتىنبىز. سونداي-اق «مەنىڭ كىشى وتانىم» اۋداندىق تاريحي-تانىمدىق ەكسپەديتسياسى ۇيىمداستىرىلىپ, 3 كەزەڭ بويىنشا زەرتتەۋ جۇمىسى جۇرگىزىلدى. 16 اۋىلدىق وكرۋگتى قامتىعان ەكسپەديتسيا بارىسىندا 200-دەن اسا كونە قۇلپىتاس, ەرتە تەمىر داۋىرىنە جاتاتىن 100-گە جۋىق وبا, ورتاعاسىرلىق قالا ورىندارى انىقتالىپ, قۇندى جادىگەرلەر مەن كەڭەستىك داۋىردەگى ەسكەرتكىشتەر تابىلدى. سونىمەن قاتار بىرقاتار ورتاعاسىرلىق تۇراق انىقتالىپ, جادىگەر جيناقتالدى. بۇل جۇمىستاردىڭ قورىتىندىسى ۇلكەن عىلىمي-تاجىريبەلىك كونفەرەنتسيامەن قورىتىندىلاندى.
قازتالوۆ اۋداندىق ورتالىقتاندىرىلعان كىتاپحانالار جۇيەسىنىڭ 39 كىتاپحاناسى بار ەكەنىن ايتقانبىز. بۇلاردىڭ ىشىندە 6 كىتاپحانا زاماناۋي ۇلگىدە جابدىقتالعان. جىل ىشىندە 1140 شارا ءوتىپ, 94 000 كورەرمەن قامتىلعان ەكەن.
اۋداندا جاس بۋىندى كىتاپقۇمارلىققا باۋلۋدىڭ كەرەمەت ءۇردىسى قالىپتاسىپ كەلەدى. بيىل وقۋشىلاردىڭ جازعى دەمالىسى كەزىندە «مەن وقىعان 30 كىتاپ» اتتى جوبا جاريالانىپ, وعان 5-11 سىنىپتا وقيتىن كىتاپسۇيەر 34 وقىرمان قاتىستى.
دەمەۋشىلەردىڭ كۇشىمەن 1 ميلليون تەڭگە جۇلدە قورى تىگىلگەن بايقاۋدىڭ قاتىسۋشىلارىنا ارنايى ديپلوم, 30 مىڭ تەڭگەلىك سەرتيفيكات تابىس ەتىلدى. ال كىتاپ وقۋدا وزىپ شىققان جانسايا بەكەت – 300 مىڭ تەڭگە, ءىى ورىن جۇلدەگەرى ءىلياس قايساعالي – 200 مىڭ, ال جۇلدەلى ءىىى ورىنعا يە بولعان تولعاناي قىدىرعاليەۆا مەن ايىم تولياتتي اتتى وقىرماندار 100 مىڭ تەڭگەلىك سەرتيفيكاتقا يە بولدى.
«بۇل سايىستى 2024 جىلى وبلىستىق دەڭگەيدە وتكىزەتىن بولامىز», دەيدى اۋدان باسشىسى.
باتىس قازاقستان وبلىسى
