فوتو: gov.kz
بەرەل قورىمىنان تابىلعان ايەلدەر كيىمدەرىنىڭ جانە ات ابزەلدەرىنىڭ عىلىمي رەكونسترۋكتسيالارى كورمەدەگى ەڭ كوز تارتاتىن جادىگەرلەردىڭ ءبىرى بولدى. سونىمەن قاتار VIII عاسىردا ءومىر سۇرگەن جاۋىنگەر-مۋزىكانتتىڭ رەكونسترۋكتسياسى, قاتونقاراعاي اۋدانى قاراقابا قورىمىنان تابىلعان مۋزىكالىق اسپاپتار, دۋلىعا ماسكاسى, اشەكەيلەنگەن جاۋىنگەرلىك بەلبەۋ, قىناپ, قىلىش, ساداق, جەبەلەر, قيماق قاعاناتى جاۋىنگەرىنىڭ قارۋ-جاراقتارى, كيىمدەرى تانىستىرىلدى.
توقىما بۇيىمدارىنىڭ رەكونسترۋكتسيالارى ۆەنگريا شەبەرحاناسىندا ارنايى تابيعي جىبەك ماتادان جاسالعان.
كورمەنىڭ ماڭىزدى ەلەمەنتى - №11 بەرەل قورعانىنان (ب.ز.د. IV-III عع.) تابىلعان ات ابزەلدەرى بولىپ تابىلادى. ات ابزەلدەرىنىڭ سالتاناتتى اشەكەيلەرى ونىڭ دارەجەسىنە قاراي ەرەكشە كەرەك-جاراقتارى بولۋىمەن, اتاپ ايتقاندا, التىن ورنەكتەرمەن بەزەندىرىلگەن اعاش ءمۇيىز ماسكاسىمەن جانە بىلعارىمەن ەرەكشەلەنەدى. ەرشىك پوليمورفتى جانۋارلاردىڭ بەينەلەرىمەن بەزەندىرىلگەن.
كوشپەلىلەر داۋىرىندەگى زەرگەرلىك بۇيىمدار وركەنيەت دامۋىنىڭ ەڭ بيىك دەڭگەيىن, سونداي-اق, وتكەن عاسىرلارداعى زەرگەرلەردىڭ تاماشا شەبەرلىگىن كورسەتىپ, قازاق حالقىنىڭ تاريحىنا جاڭاشا كوزقاراسپەن قاراۋعا مۇمكىندىك بەرەدى.
سونداي-اق سول كۇنى مۋزەيدە زەينوللا ساماشەۆتىڭ «كونە تۇرىك بەينەلەۋ ونەرى» اتتى كىتابىنىڭ تۇساۋكەسەر ءراسىمى ءوتتى.
