فوتو: ايگەرىم ماحامبەتقىزىنىڭ جەكە مۇراعاتىنان
ايگەرىمنىڭ كوڭىلىن ەۋروپاعا اۋدارعان العاشقى سەبەپ – ءبىلىم بەرۋ جۇيەسىندەگى «ەركىندىك» ەكەن.
«بىزدەگىدەي «قۇلادىڭ», «جازعا قالدىڭ» دەگەن ۇعىم جوق»
«ەۋروپاداعى وقۋ جۇيەسى دەسە, ەڭ ءبىرىنشى ويىما كەلەتىنى - ەركىندىك. دارىسكە ءوزىڭ ءۇشىن كەلەسىڭ. نەگە دارىسكە قاتىسپادىڭ, قايدا بولدىڭ دەپ ەشكىم تەرگەمەيدى. وي ەركىندىگى دامىعان. ەكىنشىدەن, تاڭداۋ ەركىندىگىنە شەكتەۋ جوق. ەگەر ەمتيحاننان تومەن بالل جيناپ قالساڭ, بىزدەگىدەي «قۇلادىڭ», «جازعا قالدىڭ» دەگەن ۇعىم جوق. ءبىر ەمتيحاندى بىرنەشە رەت تاپسىرا الاسىڭ. ەڭ كەرەمەتى, ەمتيحان ۋاقىتىن ءوزىڭ تاڭداۋعا مۇمكىندىك بەرىلگەن. ياعني, بىرنەشە ەمتيحان كۇنتىزبەسى جاريالانادى. وزىڭە ىڭعايلى ۋاقىتتى تاڭداپ, ەمتيحان تاپسىرا بەرەسىڭ. ۇشىنشىدەن, تەڭدىك. پروفەسسورلار قاتە جاۋاپ بەرسەڭ, جىلى قاراپ, بايىپپەن تۇزەيدى. كەيدە دوسى سياقتى سويلەسەدى. ءبىلىم بەرۋدە لابوراتوريالىق زەرتتەۋ جۇمىستارى, پراكتيكا, تەوريا وتە جاقسى دامىعان. ال ءوزىمىزدىڭ قازاقستانداعى وقۋ جۇيەسىن سىنعا العىم كەلمەيدى. استانادا وقىپ, ءوسىپ, تۇلەدىم. پروفەسسورلارىمىز ءبىلىمدى, بىلىكتى. الايدا, «ستۋدەنتتى قاتال ۇستاماسا, وقىماي قويادى» دەگەن تۇسىنىكتەن بولار, ستۋدەنتتىڭ كەلگەن كەتكەنىن تەكسەرىپ, كەيدە داۋىس كوتەرىپ جاتادى. ەۋروپانىڭ وقۋ جۇيەسىندەگى وسى تۇستى وتاندىق ءبىلىم بەرۋ بويىنا ءسىڭىرۋ كەرەك دەپ ويلايمىن», دەيدى ايگەرىم ماحامبەتقىزى.
قازاقستان ەۋروپانىڭ كوپتەگەن كوشباسشى ۋنيۆەرسيتەتتەرىمەن ىنتىماقتاستىق ورناتقان. وسى كەلىسىم نەگىزىندە قازاق جاستارى يتاليا, سلوۆاكيا, پولشا, تۇركيا, گرەتسيا, فرانتسيا ت.ب مەملەكەتتەردە تەگىن وقي الادى.
ىزدەنۋشىگە قويىلاتىن تالاپتاردىڭ ەگجەي-تەگجەيىن ايگەرىم ماحامبەتقىزى ءتۇسىندىرىپ بەردى.
«باكالۆرعا ءتۇسۋ ءۇشىن 12 جىلدىق ءبىلىم, ماگيستراتۋراعا ءتۇسۋ ءۇشىن 15 جىلدىق ءبىلىم كەرەك. ياعني, 11-سىنىپتان كەيىن كەز كەلگەن ۋنيۆەرسيتەت نە كوللەدجدە 1 كۋرس وقۋىڭىز كەرەك. 1-كۋرستا وقىپ ءجۇرىپ-اق يتالياعا وقۋعا تاپسىرا بەرۋگە بولادى. ويتكەنى وقۋعا تاپسىرۋ پروتسەسى 1 جىلعا سوزىلادى. ال ستۋدەنت ول ۋاقىتتا 1-كۋرستى اياقتاپ قويادى. موتيۆاتسيالىق حاتتى دا ساۋاتتى تولتىرۋ وتە ماڭىزدى. سونداي-اق قازاقستاننان ءسىزدى وقۋعا ۇسىناتىن ادامداردىڭ حاتى دا مازمۇندى بولۋ كەرەك. اتتەستات, 3*4 سۋرەت, پاسپورت ت.ب. قۇجاتتارمەن بىرگە اعىلشىن ءتىلىن بىلەتىنىڭىزدى دالەلدەيتىن سەرتيفيكات كەرەك. سونىمەن قاتار وسى كۇنگە دەيىنگى جەتىستىكتەرىڭىزدى قوسىمشا تىركەسە دە بولادى», دەيدى ول.
ريمدەگى لا-ساپيەنتسا ۋنيۆەرسيتەتىنىڭ ستۋدەنتى ۇبت تاپسىرماي-اق, IELTS قۇجاتىنسىز ەۋروپانىڭ ۇزدىك ۋنيۆەرسيتەتتەرىندە تەگىن وقۋ تەتىكتەرى بار ەكەنىنە دە نازار اۋداردى.
«مۇنداي تالاپتى قاي ۋنيۆەرسيتەت قويمايتىنىن جەكەلەگەن ۋنيۆەرسيتەتتەردىڭ رەسمي سايتىنان باقىلاۋ كەرەك. ەۋروپا ۋنيۆەرسيتەتتەرىندە ۇبت جۇيەسى قاراستىرىلماعان. تاڭداعان ەلدىڭ ءتىلىن بىلسەڭىز تەگىن وقۋ مۇمكىندىگى مولايا تۇسەدى. ال اعىلشىن تىلىندە ءبىلىم الۋ اقىلى. شامامەن جىلىنا 5000 ەۋرونى قۇرايدى. ەۋروپا ەلدەرىنىڭ ىشىندە قازاقستان ازاماتتارى ءۇشىن قولجەتىمدىسى پولشا مەملەكەتى. مۇندا اعىلشىن تىلىندە وقۋ – 2500 ەۋرو. پولياك تىلىندە وقۋ تەگىن. سلوۆاكيا مەملەكەتىندە 2014 جىلى بارلىق شەتەلدىك ستۋدەنتتەر ءۇشىن تەگىن جوعارى ءبىلىم بەرۋ تۋرالى زاڭ قابىلدانعان. سوندىقتان ەل ستۋدەنتتەرىنىڭ تاڭداۋى كوبىنە وسى ەلگە ءتۇسىپ جاتادى. ال يتاليا ۋنيۆەرسيتەتتەرى 2019-2021 جىلدارعا دەيىن IELTS-سىز كوپ ماماندىققا گرانت بەرەتىن. قازىر سانى قىسقاردى. كەي ماماندىقتار عانا گرانت بولەدى. 2024 جىلدان باستاپ وقۋ ۆيزاسىن الۋ ءۇشىن IELTS سەرتيفيكاتى قۇجاتتار تىزىمىنە ەنەدى», دەپ ناقتىلادى كەيىپكەرىمىز.
ايگەرىمنەن ەۋروپا ەلىنە وقۋعا تۇسكەن ستۋدەنتتەردىڭ جەكە-باس قاۋىپسىزدىگى مەن الەۋمەتتىك جاعدايى, ونىڭ ىشىندە, جاتاقحانا, شاكىرتاقى جايى قالاي رەتتەلەتىنىن دە سۇرادىق.
«ەۋروپادا ءار ادام ءوز ومىرىنە ءوزى جاۋاپتى»
«مەن وقيتىن يتاليانىڭ لا-ساپيەنتسا ۋنيۆەرسيتەتىندە ستۋدەنتتەر تەگىن وقۋمەن قاتار ءبىر جىلعا 7200 ەۋرو ستيپەنديا مەن جاتاقحانا ۇتىپ الۋ قاراستىرىلعان. ال مەديتسينالىق ساقتاندىرۋدى ستۋدەنت ۆيزا تاپسىرۋ كەزىندە ءوزى جاساتادى. تاعى ءبىر جەڭىلدىك - ستۋدەنتتەرگە اپتاسىنا ەكى رەت 5 ەۋرو كولەمىندە (2500تگ) ازىق-ت ۇلىك بەرىلەدى. ستۋدەنتتەر بوس ۋاقىتى بولسا, جۇمىس ىستەي الادى. ەۋروپادا وقۋ گرانتىن ۇتىپ العان ازاماتتار ءۇشىن بەرىلەتىن شاكىرتاقى كولەمى ءار ۋنيۆەرسيتەتتە ءار ءتۇرلى», دەدى ايكەرىم.
ءبىزدىڭ كەيىپكەر ەۋروپادا وقۋدىڭ توپ – 5 ارتىقشىلىعىنا توقتالدى.
«1. جوعارىدا اتاپ وتكەنىمدەي – ەركىندىك, تەڭدىك;
2. شەنگەن ايماعىندا ەركىن ءارى كوپ شىعىنسىز ساياحاتتاۋ:
3. الەمنىڭ بارلىق ەلىنە جارايتىن «ديپلوم»;
4. ەۋروپالىق ۋنيۆەرسيتەتتەر الەمنىڭ جەتەكشى كومپانيالارىمەن ىنتىماقتاستىق ورناتقان. شاكىرت قولىنا وقۋ ءبىتىردى دەگەن قۇجاتىن العاننان كەيىن كەدەرگىسىز سول كومپانيالارعا جۇمىسقا ورنالاسا الادى.
5. وقۋ بىتىرگەننەن كەيىن ەۋروپادا زاڭدى قالۋ مۇمكىندىگى قاراستىرىلعان. وسى تۇستا وزىق تاجىريبە, ساپالى ءبىلىم, كرەاتيۆ يدەيامەن ەلگە ورالۋ ارتىقشىلىعىن دا قوسقىم كەلەدى».
ايگەرىم ماحامبەتقىزى بۇگىندە ءوز وقۋ ورتالىعىن اشىپ, قازاق جاستارىن ەۋروپا ۋنيۆەرسيتەتتەرىندە وقۋىنا كوپىر بولىپ وتىر. بيىل جىلى وسى ورتالىق ارقىلى 5 ازامات يتاليادا تەگىن وقۋ گرانتىن ۇتىپ العان. تاۋەلسىزدىك بۇيىرتقان وسىنداي ەنشى ارقىلى ەۋروپادا وقىپ ءجۇر تالاي قازاق بالاسى.
