ءمينيستردىڭ مالىمەتىنشە, ەلىمىزدە 7,6 ملن ادام سپورتپەن جۇيەلى تۇردە شۇعىلدانادى, بۇل حالقىمىزدىڭ 38,5 پايىزىن قۇرايدى. دەنەشىنىقتىرۋ مەن سپورتتى دامىتۋدىڭ تۇجىرىمداماسىن ىسكە اسىرۋ جوسپارى بويىنشا 2029 جىلعا قاراي ەل تۇرعىندارىنىڭ جارتىسىن قامتۋ جوسپارلانعان. ماسەلەن, مەملەكەت باسشىسىنىڭ تاپسىرماسىنا سايكەس وسكەلەڭ ۇرپاقتىڭ سپورتتىق الەۋەتىن دامىتۋعا باسىمدىق بەرىلىپ وتىر. وسىعان بايلانىستى بيىل 250 مىڭنان اسا بالا مەن ءجاسوسپىرىمدى قامتۋ ءۇشىن جەرگىلىكتى اتقارۋشى ورگاندار 43,2 ملرد تەڭگە بولگەن. ناتيجەسىندە 220 مىڭ بالاعا ارنالعان ۆاۋچەرلەر ىسكە قوسىلدى. بۇل – 6 مىڭنان اسا سپورت سەكتسياcىنا تەگىن قاتىسۋعا مۇمكىندىك بەرەدى دەگەن ءسوز.
مينيستر سپورتتى ودان ءارى دامىتۋ ءۇشىن جاڭا ستراتەگيالىق رەفورمالار ەنگىزىلگەنىن جەتكىزدى. ماسەلەن, قازىر باس جاتتىقتىرۋشىلاردى كونكۋرستىق نەگىزدە تاعايىنداۋ, سونداي-اق ولاردىڭ وكىلەتتىكتەرىن كەڭەيتۋ ارقىلى مەملەكەتتىك جاتتىقتىرۋشىلاردىڭ مارتەبەسىن ارتتىرۋ ماسەلەسى تالقىلانىپ جاتىر. سونىمەن قاتار حالىقارالىق سپورت ۇيىمدارىندا وتاندىق مامانداردىڭ وكىلدىگى جانە الەمدىك دەڭگەيدەگى تورەشىلەردى دايارلاۋ بويىنشا جۇمىس كۇشەيتىلەدى. كاسىبي سپورت كلۋبتارىن ۇستاۋعا ارنالعان ليميت جانە سپورتپەن شۇعىلدانۋ ءۇشىن ەڭ تومەنگى جاس بەكىتىلەدى.
«قازىر ەلىمىزدە سپورتتىڭ 180 ءتۇرى دامىپ كەلەدى, ولاردىڭ تەك 59-ى حالىقارالىق وليمپيادا كوميتەتى تاراپىنان مويىندالعان. حالىقارالىق تاجىريبە نەگىزىندە «تىرەك» سپورتى تۇرلەرىنىڭ ءتىزىمىن قايتا قاراۋ قاجەتتىگى تۋىندادى. اتالعان ءتىزىمدى ايقىنداۋ كەزىندە ۇلتتىق سپورت تۇرلەرىنە نۇقسان كەلمەيدى», دەدى ە.مارجىقپاەۆ.
سونىمەن قاتار سالا باسشىسى مودۋلدىك ۇلگىدەگى تەز سالىناتىن از شىعىندى 100 سپورت نىسان سالىناتىنىن ايتتى.
«ەلىمىزدىڭ بارلىق سپورتتىق ينفراقۇرىلىمىنا اۋقىمدى تۇگەندەۋ جۇرگىزىلدى. ونىڭ قورىتىندىسى بويىنشا وڭىرلەردە جۇمىس ىستەپ تۇرعان نىسانداردىڭ ورتا ەسەپپەن 20%-ى تالاپقا ساي ەمەس ەكەنى انىقتالدى. وسىلايشا, سپورت ينفراقۇرىلىمىنا, اتاپ ايتقاندا, اۋىلدى ەلدى مەكەندەردە اسا مۇقتاج وڭىرلەردىڭ تىزبەسى ايقىندالادى. كەلەسى جىلدان باستاپ «مودۋلدىك ۇلگىدەگى تەز سالىناتىن از شىعىندى 100 سپورت نىسان» جوباسى ىسكە قوسۋ جوسپارلانىپ وتىر. الداعى ەكى جىلدا 113 جاڭا سپورت نىسانى سالىنۋ كەرەك. مەملەكەت-جەكەمەنشىك ارىپتەستىگى تەتىگىن قولدانا وتىرىپ قولدانىستاعى 26 نىسان قايتا جاڭارتىلادى. الماتى وبلىسىندا وليمپيادالىق دايىندىق بازاسىنىڭ قۇرىلىسى اياقتالىپ كەلەدى. بازا ءبىر ۋاقىتتا 2 300 سپورتشىعا 23 وليمپيادالىق سپورت تۇرىمەن اينالىسۋعا مۇمكىندىك بەرەدى. بۇل نىسان جىل بويى جۇمىس ىستەيدى. ۇلتتىق قۇرامالار مەن وبلىستىق كوماندالار ماڭىزدى جارىستار الدىندا تولىققاندى وقۋ-جاتتىعۋ جيىندارىن وتكىزە الادى. استانادا ۇلتتىق سپورت ۋنيۆەرسيتەتى سالىنىپ جاتىر. نىساندى 2025 جىلى قولدانىسقا بەرۋ جوسپارلانعان», دەدى مينيستر.
تۋريزم سالاسىندا دا وڭ وزگەرىستەر مول. ماسەلەن, بيىلعى 9 ايدىڭ قورىتىندىسى بويىنشا ىشكى تۋريستەر سانى 5,4 ملن بولعان, بۇل بىلتىرمەن سالىستىرعاندا 552 مىڭعا كوپ. شەتەلدىك تۋريستەر سانى 225 مىڭعا ارتىپ, 835 مىڭ ادامعا جەتكەن.
مينيسترلىكتىڭ مالىمەتىنشە, بىلتىر 40 ملرد تەڭگە قاراجاتقا 138 ينۆەستيتسيالىق جوبا ىسكە اسىرىلعان. بيىل 288 ملرد-قا 115 ينۆەستيتسيالىق جوبا جۇزەگە اسىرىلىپ جاتىر. جوبا اياسىندا 1,5 مىڭنان اسا ادام تۇراقتى جۇمىسپەن قامتىلىپتى. جالپى 2019 جىلدان باستاپ تۋريزم سالاسى توپ-10 باسىم تۋريستىك اۋماقتى دامىتۋ بويىنشا بەلسەندى جۇمىس جۇرگىزۋدى قولعا العان. كەيىنگى جىلدارى ىشكى دەمالىسقا سۇرانىستىڭ ارتۋى بايقالادى.
«تۋريزم سالاسىنداعى 2024 جىلدىڭ ەڭ باستى وقيعالارىنىڭ ءبىرى – قىتايداعى قازاقستان ءتۋريزمى جىلى بولماق. ءىس-شارانىڭ نەگىزگى ماقساتى – ەلىمىزدىڭ تۋريستىك الەۋەتىن ىلگەرىلەتۋ, مادەني تاجىريبە الماسۋ, ەكى ەل اراسىنداعى ءوزارا تۇسىنىستىك پەن دوستىقتى نىعايتۋ. قىتايداعى تۋريزم جىلى اياسىندا بەيجىڭ قالاسىندا اشىلۋ ءراسىمى, تۋريزم تۇرلەرى (ەكولوگيالىق, مەديتسينالىق, اگروتۋريزم, قالالىق, MICE جانە عارىشتىق تۋريزم) بويىنشا تاقىرىپتىق اپتالار وتكىزۋ, قىتايدىڭ 7 ءىرى قالاسىندا توپ-20 وتاندىق دەستيناتسيالاردىڭ تۇساۋكەسەرىن وتكىزۋ جوسپارلانىپ وتىر», دەدى ە.مارجىقپاەۆ.
قازىر ەلىمىزدە پاندەميادان كەيىن 80 باعىت بويىنشا حالىقارالىق اۋە قاتىناسى قالپىنا كەلتىرىلگەن. 74 ەلگە ۆيزاسىز رەجىم جاڭارتىلدى. بۇل ءتىزىمدى 100-گە دەيىن ارتتىرۋ جوسپارلانىپ وتىر. سونداي-اق ويىن بيزنەسىنىڭ جوسىقسىز سۋبەكتىلەرىمەن بەلسەندى كۇرەس جۇرگىزىپ جاتىر. ماسەلەن, 2023 جىلى سوتقا 14 تالاپ-ارىز جىبەرىلگەن, ناتيجەسىندە 7 بۋكمەكەرلىك كەڭسە, 5 توتاليزاتور جانە 1 ويىن اۆتوماتتارى زالى جۇمىسىن توقتاتقان. دەپۋتاتتىق كورپۋسپەن بىرلەسىپ ازاماتتاردى لۋدومانيادان جاس شەكتەۋىن 25 جاسقا دەيىن كوتەرۋ, بۋكمەكەر كەڭسەلەرى, ءباس تىگۋ تۋرالى كەز كەلگەن جارناماعا بارلىق جەردە تىيىم سالۋ ماسەلەسى قاراستىرىلىپ جاتقانى ايتىلدى.
