كرەاتيۆتى تۋريزم سالاسى بويىنشا قورشاعان ورتانى قورعاۋ تاقىرىبىنا ارنالعان «ەگو-دان ەكو-عا دەيىنگى» ەكولوگيالىق فوتوسۋرەتتەر كورمەسى اشىلدى. جوباعا قاتىسۋشىلاردىڭ جۇمىسى نەگىزىنەن تابيعاتقا بەيجاي قاراماۋدى ناسيحاتتايدى. سونىمەن قاتار حالىقارالىق تۋريزم جانە مەيماندوستىق ۋنيۆەرسيتەتىندە قۇندى دارىستەر مەن سەمينارلار ءوتىپ, فورۋم اياسىندا بايقاۋ جەڭىمپازدارى ماراپاتتالدى.
سونداي-اق «Karavansaray» كەشەنى اۋماعىندا الەمدەگى ءىرى قالالار ءومىرىنىڭ اجىراماس بولىگىنە اينالعان, اسىرەسە ەلدىڭ كرەاتيۆ يندۋسترياسىنىڭ نەگىزى سانالاتىن «Street Performance Fest» ءىس-شاراسى ءوتتى. ءدال سول كۇنى تۇركىستان قالاسىنىڭ تۇرعىندارى مەن قوناقتارى breaking, hip hop, all styles ستيلدەرى بويىنشا بي فەستيۆالىن تاماشالادى.
ءىس-شارا اياسىندا تۇركىستان وبلىسى بويىنشا ەكولوگيالىق اۆتوتۋر ۇيىمداستىرىلىپ, وعان قازاقستان, رەسەي, وزبەكستان, قىرعىز ەلىنەن كەلگەن كاسىبي اۆتوساياحاتشىلار قاتىستى. ولار وڭتۇستىك وڭىردەگى اقمەشىت ۇڭگىرلەرى, لەڭگىر (بىركولىك), اقسۋ-جاباعىلى, قازىعۇرت, سارىاعاش, سونداي-اق ارىستان باب, ساۋران, قوجا احمەت ياساۋي, كۇلتوبە سياقتى تابيعي ورىندارى مەن تاريحي-مادەني كورىكتى جەرلەرىمەن تانىستى. سونىمەن قاتار تۇركىستان قالاسىنىڭ كونگرەسس-ورتالىعىندا «Kazakhstan Creative Tourism Forum- 2023» كرەاتيۆتى تۋريزم بويىنشا اۋقىمدى فورۋم ۇيىمداستىرىلدى.
«فورۋمنىڭ ماقساتى – ساياحاتشىلاردىڭ جاڭا بۋىنىن قالىپتاستىرۋ, تۋريستىك ۇيىمداردىڭ باسەكەگە قابىلەتتىلىگىن ارتتىرۋ, سونداي-اق ەلىمىزدە كرەاتيۆتى كلاستەرلەر مەن كرەاتيۆتى يندۋستريالار ورتالىقتارىن قۇرۋ جانە دامىتۋ, ەلىمىزدە ءتۋريزمنىڭ بارلىق ءتۇرىن دامىتۋ جانە ىلگەرىلەتۋ ماقساتىندا ساراپشىلار قاۋىمداستىعىن ءبىر الاڭدا جيناۋ», دەيدى ۇيىمداستىرۋشىلار.
تۇركىستان – ءتۇبى ءبىر, تاريحى ورتاق تۇركى حالىقتارىنىڭ ءتۇپ قازىعى, رۋحاني ورداسى. قالا وبلىس ورتالىعىنا اينالعالى جىل ساناپ كوركەيىپ كەلەدى. تۇركىستان تۇركى حالىقتارىنىڭ عانا ەمەس, دۇنيە جۇزىندەگى كونەنىڭ كوزى سانالادى. مۇندا جىل سايىن الەمنىڭ تۇكپىر-تۇكپىرىنەن جانە ەلىمىزدىڭ ءار ايماعىنان ميلليونداعان تۋريست كەلەدى.
«پرەزيدەنتتىڭ كرەاتيۆتى يندۋستريانى ءار وبلىس ورتالىعىندا دامىتۋ تۋرالى تاپسىرماسىنا سايكەس تۇركىستاندا كرەاتيۆتى يندۋستريانىڭ ۇلكەن فەستيۆالى ءوتتى. بۇل باعىتتى دامىتۋ مەملەكەت تاراپىنان تالانتتى جاستاردى قولداۋدا وتە ماڭىزدى. اتالعان ءىس-شارالاردىڭ نەگىزگى ماقساتى – وڭىردەگى ەكونوميكالىق بەلسەندىلىكتى ارتتىرۋ جانە جاڭا جۇمىس ورىندارىن اشۋ», دەيدى تۋريزم جانە سپورت ءمينيسترىنىڭ ورىنباسارى ەرجان ەركىنباەۆ.
تۇركىستان – ەجەلدەن ساۋدا-ساتتىقتىڭ ورتاسى, رۋحانيات ورداسى. وندا ۇلت وركەنيەتىنىڭ سالت-ءداستۇرى مەن قولونەرى ساقتالعان. سوندىقتان دا ونىڭ تۋريستىك الەۋەتى جوعارى. اسىرەسە تۋريزم كلاستەرىنىڭ باسىم باعىتى كولىك ينفراقۇرىلىمى قولايلى جولعا قويىلعان. تۇركىستان قالاسى – تاريحي ءتۋريزمنىڭ التىن ۇياسى. وندا تۋريستەرگە تولىقتاي ساپالى قىزمەت كورسەتە الاتىن ورىندار دا جەتەرلىك.
تاريحي تۋريزم وشاقتارى – تابيعاتى اسەم, شەجىرەلى ولكە. وبلىستاعى يۋنەسكو-نىڭ مادەني مۇرالار تىزىمىنە ەنگىزىلگەن قوجا احمەت ياساۋي كەسەنەسى, كونە وتىرار, ساۋران قالاشىقتارى, ارىستان باب, بايدىبەك اتا, دومالاق انا كەسەنەلەرى مەن اقمەشىت ۇڭگىرى, تۇلكىباس اۋداندارىنىڭ قايتالانباس اسەم تابيعاتى, اقسۋ-جاباعىلى, قاراتاۋ قورىقتارى, سايرام-وگەم مەملەكەتتىك ۇلتتىق تابيعي پاركى – تالاي ساياحاتشىلاردى تامساندىرعان مەكەندەر ءارى تۋريستەردى ماگنيتشە تارتا بەرمەك.
